പശ്ചിമഘട്ട ജൈവ വൈവിധ്യമേഖലയിൽ പുതിയ തേനീച്ചയെ കണ്ടെത്തി മലയാളി ഗവേഷകർ

തിരുവനന്തപുരം: 200​ വർഷത്തിലേറെ ഇടവേളക്ക്​ ശേഷം ഇന്ത്യയിൽ പുതിയ ഇനം തേനീച്ചയെ പശ്ചിമഘട്ട ജൈവ വൈവിധ്യമേഖലയിൽനിന്ന്​ മലയാളി ഗവേഷക സംഘം കണ്ടെത്തി. ഇരുണ്ട നിറമായതിനാൽ 'എപിസ്​ കരിഞ്ഞൊടിയൻ' എന്ന​ ശാസ്ത്രീയ നാമമാണ്​ നൽകിയത്. 'ഇന്ത്യൻ ബ്ലാക്ക്​ ഹണിബീ' എന്നാണ്​ പൊതുനാമം. വാണിജ്യാടിസ്ഥാനത്തിൽ കൃഷി ചെയ്യാവുന്ന ഇനത്തിൽപെട്ട തേനീച്ചയാണെന്നാണ്​ കണ്ടെത്തലുകൾ സൂചിപ്പിക്കുന്നത്.

കേരള കാർഷിക സർവകലാശാലയുടെ തിരുവനന്തപുരം കരമനയിലുള്ള ഇന്‍റഗ്രേറ്റഡ്​ ഫാമിങ്​ സിസ്റ്റം റിസർച് സ്​റ്റേഷനിലെ അസി. പ്രഫസർ ഡോ. ഷാനസ് എസ്​, ചേർത്തല എസ്.എൻ. കോളജ്​ ജന്തുശാസ്ത്ര വിഭാഗത്തിലെ ഗവേഷക ജി. അഞ്ജു കൃഷ്ണൻ, കൊണ്ടോട്ടി ഇ.എം.ഇ.എ കോളജിലെ ബയോടെക്​നോളജി വിഭാഗം മേധാവി ഡോ. കെ. മഷ്ഹൂർ എന്നിവരടങ്ങിയ ഗവേഷക സംഘമാണ് പുതിയ ഇനം തേനീച്ചയെ കണ്ടെത്തിയത്.

സെപ്റ്റംബർ ലക്കം 'എന്‍റമോൺ' ജേണലിൽ ഇതുസംബന്ധിച്ച പഠനം പ്രസിദ്ധീകരിച്ചു. 1798ൽ ഡെൻമാർക്​​ ശാസ്ത്രജ്ഞനായ ജോഹാൻ ക്രിസ്ത്യൻ ഫാബ്രിഷ്യസ് കണ്ടെത്തി രേഖപ്പെടുത്തിയ 'എപിസ് ഇൻഡിക്കയാണ്' ഇന്ത്യയിൽനിന്ന് അവസാനമായി കണ്ടെത്തിയ തേനീച്ച. ഇതിനുശേഷം ആദ്യമായാണ് ഇന്ത്യയിൽ പുതിയ ഇനം തേനീച്ചയെ കണ്ടെത്തുന്നത്​. എപിസ് കരിഞ്ഞൊടിയന്‍റെ കണ്ടുപിടിത്തത്തോടെ ലോകത്ത്​ ഇതുവരെ കണ്ടുപിടിച്ച തേനീച്ച ഇനങ്ങളുടെ എണ്ണം 11 ആയി.

മറ്റുള്ളവയിൽനിന്ന്​ വ്യത്യസ്തമായി 'ഇന്ത്യൻ ബ്ലാക്ക് ഹണിബീ'കൾ കൂടുതൽ തേൻ ഉൽപാദിപ്പിക്കും. കട്ടി കൂടുതലുള്ള തേനുമാണ്​. ഇതു​ വ്യവസായിക സാധ്യത വർധിപ്പിക്കുന്നു. ഗോവ, കർണാടക, കേരള-തമിഴ്നാട്​ പശ്ചിമഘട്ടത്തിന്‍റെ ചിലഭാഗങ്ങൾ എന്നിവിടങ്ങളിലാണ് എപിസ്​ കരിഞ്ഞൊടിയൻ കണ്ടുവരുന്നത്. ഇന്‍റർനാഷനൽ യൂനിയൻ ഫോർ കൺസർവേഷൻ ഓഫ്​ നേചറിന്‍റെ (ഐ.യു.സി.എൻ) റെഡ്​ ലിസ്റ്റ്​ വിഭാഗങ്ങളുടെയും മാനദണ്ഡങ്ങളുടെയും അടിസ്ഥാനത്തിൽ കേരളത്തിൽ ഈ തേനീച്ചയെ വംശനാശ ഭീഷണി നേരിടുന്ന ഇനമായി തരംതിരിച്ചിട്ടുണ്ട്​. എപിസ് സെറാന തേനീച്ചയിൽനിന്ന്​ പരിണാമം സംഭവിച്ചുണ്ടായ കരിഞ്ഞൊടിയന്​ പശ്ചിമഘട്ടത്തിലെ ചൂടിനോടും ഈർപ്പത്തോടും പൊരുത്തപ്പെടാൻ ശേഷിയുണ്ട്​.