രണ്ടുപേർ, രണ്ട് ആചാരം, മൂന്ന് കല്യാണം... മതവികാരം വ്രണപ്പെട്ടവർക്കുവേണ്ടി ഈ പോസ്റ്റ്​

ഹിന്ദു ആചാരപ്രകാരവും മുസ്​ലിം ആചാരപ്രകാരവും ഇതര സമുദായത്തിൽപ്പെട്ട യുവതിയെ വിവാഹം കഴിച്ചതിനെ തുടർന്നുണ്ടായ 'പൊല്ലാപ്പുകൾക്ക്​' ഫേസ്​ബുക്ക്​ പോസ്റ്റിലൂടെ മാധ്യമപ്രവർത്തകന്‍റെ മറുപടി. മാധ്യമപ്രവർത്തകനായ ബാദുഷ ജമാൽ ആണ്​ 'രണ്ടുപേർ, രണ്ട് ആചാരം, മൂന്ന് കല്യാണം' എന്ന തലക്കെട്ടിൽ പോസ്റ്റ്​ ഇട്ടത്​. കോട്ടയം പാല രാമപുരം സ്വദേശിനി അനുഷ അമ്മുവിനെയാണ്​ ബാദുഷ വിവാഹം കഴിച്ചത്​.

ഈമാസം 13ന് പാലാ രാമപുരം മൈക്കിൾ പ്ലാസ ഓഡിറ്റോറിയത്തിൽ വച്ച് ഹിന്ദു ആചാരപ്രകാരവും 16ന് നെയ്യാറ്റിൻകര സ്വദേശാഭിമാനി ടൗൺ ഹാളിൽ വച്ച് മുസ്​ലിം ആചാരപ്രകാരവുമായിരുന്നു വിവാഹം. 'വിവാഹങ്ങൾ' ഭംഗിയായി നടന്നെന്നും പക്ഷേ, തന്‍റെയോ ഭാര്യയുടെയോ വീട്ടുകാർക്ക്​ ഇല്ലാത്ത ശുഷ്​കാന്തിയും വെപ്രാളവുമായിരുന്നു നാട്ടുകാരിൽ ചിലർക്കെന്ന്​ ബാദുഷ പറയുന്നു. അങ്ങിനെ സ്​​ക്രീൻ​ ഷോട്ടുകളും വിവാഹ ഫോ​ട്ടോകളും ​സമൂഹ മാധ്യമങ്ങളിൽ പ്രചരിച്ചുതുടങ്ങി. അതുകണ്ട ചിലരുടെ മതവികാരം വ്രണപ്പെട്ടുവെന്നും അവർക്കുവേണ്ടിയാണ്​ ഈ പോസ്​റ്റെന്നും ബാദുഷ വ്യക്​തമാക്കുന്നു. രണ്ട്​ ചടങ്ങുകളിലെയും ഫോ​ട്ടോയും പങ്കുവെച്ചിട്ടുണ്ട്​.

ബാദുഷ ജമാലിന്‍റെ പോസ്റ്റ്​ ഇപ്രകാരമാണ്​- പ്രിയപ്പെട്ടവരെ, ഞാൻ മുന്നേ പറഞ്ഞ പോലെ എന്‍റെ വിവാഹമായിരുന്നു. ഡിസംബർ 13ന് ഹിന്ദു ആചാരപ്രകാരം കോട്ടയത്ത് വച്ചും 16ന് മുസ്​ലിം ആചാരപ്രകാരം നെയ്യാറ്റിൻകര വച്ചും (സ്ക്രീൻ ഷോട്ട് സ​െപ്ലെ ചെയ്യുന്നവർക്കായി പ്രത്യേകം എഴുതുന്നത്). വളരെ ഭംഗിയായി നടന്നു. വിവാഹത്തിന് എന്‍റെ വീട്ടുകാർക്കോ അവളുടെ വീട്ടുകാർക്കോ ഇല്ലാത്ത ശുഷ്‌കാന്തിയും വെപ്രാളവുമായിരുന്നു എന്‍റെ നാട്ടുകാരിൽ ചിലർക്ക്. അവർ പിന്നെ സ്ക്രീൻ ഷോട്ടുകളും വിവാഹ ഫോട്ടോസും സ​െപ്ലെ ചെയ്യാൻ തുടങ്ങി. ഫോട്ടോ കണ്ട ചിലരുടെ മതവികാരം വ്രണപ്പെട്ടുവത്രെ. അങ്ങനെ വ്രണപ്പെട്ടവർക്ക് വേണ്ടിയാണ് ഈ പോസ്റ്റും. ഒരുപാട് പറയാൻ ഉണ്ടെങ്കിലും ഇപ്പോ പറയുന്നില്ല. വിവാഹം വിചാരിച്ചതിലും ഭംഗിയായി നടന്നു. കൂടെ നിന്നവർക്കും കൂട്ടത്തിൽ നിന്ന് കുത്തിയവർക്കും (കുത്തിയവർ 3ജി ആയതല്ലേ അതിന് പ്രത്യേക നന്ദി) നന്ദി.