അന്യഗ്രഹ ജീവികളുടെ ആക്രമണമോ? ആകാശത്തുനിന്ന്​ വീണത്​ കൂറ്റൻ ഐസ്​ കട്ട, ഉറവിടമറിയാതെ കുഴങ്ങി അധികൃതർ

​ഫ്ലോറിഡ: അസാധാരണമായുണ്ടായ ഒരു സംഭവമാണ്​ ഫ്ലോറിഡയിലും സമൂഹമാധ്യമങ്ങളിലും ഇപ്പോൾ പ്രധാനചർച്ച. അതിനുകാരണം വീടിന്​ മുകളിൽ വീണ ഒരു കൂറ്റൻ തണുത്തുറഞ്ഞ ഐസ്​കട്ടയും.

ഐസ്​കട്ട വീണതോടെ വീടി​െൻറ മേൽക്കൂരയടക്കം തകരുകയും ചെയ്​തു. മാർട്ടിൻ കൗണ്ടി ഷെരീഫ്​ ഒാഫിസി​െൻറ ഫേസ്​ബുക്ക്​ പേജിലൂടെയാണ്​ സംഭവം പുറത്തറിയുന്നത്​. തകർന്ന മേൽക്കൂരയുടെയും അതിന്​ താഴെ വീണുകിടക്കുന്ന ഐസ്​കട്ടയുടെയും ചിത്രം പ​ങ്കുവെച്ചായിരുന്നു പോസ്​റ്റ്​.

പോസ്​റ്റ്​ വൈറലായതോടെ വീടിന്​ മുകളിൽ ഐസ്​കട്ട വീഴാനുള്ള സാധ്യത തേടുകയായിരുന്നു സമൂഹമാധ്യമങ്ങൾ. ഐസ്​കട്ട വീണ്​ മേൽക്കൂരയിൽ വലിയ വിള്ളലുണ്ടായിരിക്കുന്നത്​ പോസ്​റ്റ്​ ചെയ്​ത ചിത്രത്തിൽ കാണാം. കൂടാതെ താഴെ വീണ ഐസ്​കട്ട ഉടയാതെ നിലത്തുകിടക്കുന്നതും ചി​ത്രത്തിലുണ്ട്​.

ഐസ്​ വീണ്​ ആർക്കും പരിക്കേറ്റതായി റി​പ്പോർട്ട്​ ചെയ്​തിട്ടില്ലെന്നും ഫേസ്​ബുക്ക്​ പേജിലൂടെ അറിയിച്ചു. മറ്റു നാശനഷ്​ടങ്ങളും റിപ്പോർട്ട്​ ചെയ്​തിട്ടില്ല. എന്നാൽ ഐസ്​ എവിടെനിന്നാണ്​ വന്നതെന്ന കാര്യത്തിൽ വ്യക്തതയില്ലെന്നും അവർ പങ്കുവെച്ചു.

ഇതോടെ ഐസ്​കട്ടയുടെ ഉറവിടം തേടുകയായിരുന്നു സോഷ്യൽ മീഡിയ. അന്യഗ്രഹ ജീവികളുടെ ആക്രമണമായിരിക്കുമെന്നായിരുന്നു ചിലരുടെ പ്രതികരണം. എന്നാൽ, വിമാനത്തിൽനിന്ന്​ വീണതാകാമെന്നായിരുന്നു ചിലരുടെ അഭിപ്രായം. ആരുടെയും തലയിൽ വീഴാതെ വീടിന്​ മുകളിൽ വീണത്​ ഭാഗ്യമായി കരുതുന്നവരും ചെറുതല്ല.