'വിലക്കയറ്റത്തിനെതിരെ ശബ്​ദമുയർത്തൂ' സമൂഹമാധ്യമങ്ങളിൽ കാമ്പയിനുമായി കോൺഗ്രസ്​

ന്യൂഡൽഹി: വിലക്കയറ്റത്തിനെതിരെ കോൺഗ്രസിന്‍റെ നേതൃത്വത്തിൽ സമൂഹമാധ്യമങ്ങളിൽ ഹാഷ്​ടാഗ്​ കാമ്പയിൻ. 'വിലക്കയറ്റത്തിനെതിരെ ശബ്​ദമുയർത്തൂ (സ്​പീക്ക്​ അപ്​ എഗെയ്​ൻസ്റ്റ്​ പ്രൈസ്​ റൈസ്​)' എന്ന ഹാഷ്​ടാഗോടെയാണ്​ കാമ്പയിൻ.

രാജ്യത്ത്​ പെട്രോൾ, ഡീസൽ, പാചക വാതകം, ഭക്ഷ്യവസ്​തുക്കൾ തുടങ്ങിയവയുടെ വില കുതിച്ചുയരുന്നതിനെതിരെയാണ്​ പ്രതിഷേധം. പ്രതിഷേധത്തിന്​​ പിന്തുണയുമായി നേതാക്കളായ​ രാഹുൽ ഗാന്ധി, പ്രിയങ്ക ഗാന്ധി, സചിൻ പൈലറ്റ്​, ശശി തരൂർ തുടങ്ങിയവർ രംഗത്തെത്തി. ഇന്ധനവില വർധന സർക്കാർ വരുമാന മാർഗമായാണ്​ കാണുന്നതെന്നായിരുന്നു​ രാഹുൽ ഗാന്ധിയുടെ പരാമർശം.​

'വിലക്കയറ്റം ഒരു ശാപമാണ്​. കേന്ദ്രം നികുതി ലഭിക്കുന്നതിനുവേണ്ടി മാത്രം ജനങ്ങളെ വിലക്കയറ്റത്തിന്‍റെ ചതുപ്പിലേക്ക്​ തള്ളിയിടുന്നു. രാജ്യത്തിന്‍റെ നാശത്തിനിനെതിരെ നിങ്ങളും ശബ്​ദമുയർത്തൂ' -രാഹുൽ ഗാന്ധി ട്വീറ്റ്​ ചെയ്​തു. കേന്ദ്രം ഈടാക്കുന്ന അമിത നികുതി ചൂണ്ടിക്കാട്ടിയായിരുന്നു വിമർശനം. വിലക്കയറ്റത്തിനെതിരായ കോൺഗ്രസിന്‍റെ പ്രചാരണ കാമ്പയിൻ വിഡിയോയും അ​േദ്ദഹം ട്വീറ്റിൽ പങ്കുവെച്ചു.

വെള്ളിയാഴ്ച രാവിലെ 10 മണിക്കാണ്​ കോൺഗ്രസിന്‍റെ നേതൃത്വത്തിൽ സമൂഹ മാധ്യമ കാമ്പയിൻ ആരംഭിച്ചത്​. സ്​പീക്ക്​ അപ്​ എഗെയ്​ൻസ്റ്റ്​ പ്രൈസ്​ റൈസ് ഹാഷ്​ടാഗ്​ വഴി വിലക്കയറ്റം സംബന്ധിച്ച ആശങ്കകൾ വിഡിയോയിലൂടെ ലൈവിലൂടെയോ പങ്കുവെക്കാൻ ആവശ്യപ്പെടുകയായിരുന്നു. രാജ്യത്തിന്‍റെ വിവിധ ഭാഗങ്ങളിൽനിന്നുള്ള ജനങ്ങളുടെ വിഡിയോ ഇന്ത്യൻ നാഷനൽ കോൺഗ്രസിന്‍റെ ഔദ്യോഗിക ട്വിറ്റർ പേജിലൂടെ പങ്കുവെക്കും.

സാധാരണക്കാരുടെ പ്രശ്​നങ്ങളെ അവഗണിച്ച്​ വിലക്കയറ്റത്തിനെതിരെ കേന്ദ്രം ന്യായങ്ങൾ നിരത്തുന്നതിന്​ എതിരെയായിരുന്നു പ്രിയങ്ക ഗാന്ധിയുടെ പ്രതിഷേധം. 'പണപ്പെരുപ്പം ഉയരുന്നതിന്​ കേന്ദ്രം പല ന്യായങ്ങളാണ്​ നിരത്തുന്നത്​. ശൈത്യകാലം, മുൻ സർക്കാറുകളുടെ നയങ്ങൾ, ജനങ്ങൾ അധികം സഞ്ചരിക്കാത്തതിനാൽ ടിക്കറ്റ്​ ചാർജ്​ കൂടുന്നു തുടങ്ങിയവയെല്ലാം ഇതിൽ ഉൾപ്പെടും. പെട്രോൾ -ഡീസൽ വില ഉയർത്തുന്നതിന്​ യാതൊരു വിധ നിയന്ത്രണങ്ങളും രാജ്യത്ത്​ ഇന്ന്​ ഇല്ലാതായിരിക്കുന്നു. സാധാരണക്കാരന്‍റെ പ്രശ്​നങ്ങളെ ഒതുക്കി നിർത്തി പകരം ന്യായങ്ങൾ നിരത്തുകയാണ്​ കേന്ദ്രം' -പ്രിയങ്ക ഗാന്ധി ട്വീറ്റ്​ ​ചെയ്​തു.

രാജ്യത്ത്​ പെട്രോൾ -ഡീസൽ, പാചകവാതക വില ദിനംപ്രതി കുതിച്ചുയരുകയാണ്​. രാജ്യത്തിന്‍റെ വിവിധ ഭാഗങ്ങളിൽ ​െ​പട്രോൾ വില നൂറ്​ കടന്നു. ഇതിനെതിരെ രാജ്യത്തിന്‍റെ വിവിധ ഭാഗങ്ങളിൽ പ്രതിപക്ഷ പാർട്ടികളുടെ നേതൃത്വത്തിൽ പ്രതിഷേധ പരിപാടികളും സംഘടിപ്പിച്ചിരുന്നു.Congress campaign against price rise