കറുത്തവംശക്കാരിയായതിനാൽ വിവാഹവസ്​ത്രം ധരിക്കാനായില്ല; പതിറ്റാണ്ടുകൾക്ക്​ശേഷം 94കാരിക്ക്​ ആഗ്രഹ പൂർത്തീകരണം

വെള്ള ഗൗണിൽ വധുവിനെപ്പോലെ അണിയിച്ചൊരുക്കുകയായിരുന്നു അലബാമയിലെ 94കാരിയെ. മുത്തശ്ശിയുടെ പതിറ്റാണ്ടുകൾ നീണ്ട ആഗ്രഹ പൂർത്തീകരണത്തിന്​ കൂട്ടുനിന്നത്​ കൊച്ചുമക്കളും.

വെള്ളഗൗൺ അണിഞ്ഞ്​ വധുവിനെപ്പോലെ അണിഞ്ഞൊരുങ്ങണമെന്നായിരുന്നു മുത്തശ്ശിയുടെ ആഗ്രഹം. സ്വന്തം വിവാഹത്തിൽ വെള്ള വസ്​ത്രമണിഞ്ഞ്​ എത്താൻ സാധിക്കാതെ വന്നതോടെ ആഗ്രഹം ഉള്ളിലൊതുക്കി പതിറ്റാണ്ടുകളോളം 94 കാരിയായ മാർത്ത മേയ്​ ഒഫീലിയ മൂൺ ടക്കർ കഴിഞ്ഞു. 1952 ലായിരുന്നു മാർത്തയുടെ വിവാഹം. അക്കാലത്ത്​ കറുത്തവർഗക്കാരെ ബ്രൈഡൽ ഷോപ്പുകളിൽ പ്രവേശിപ്പിക്കില്ലായിരുന്നു. അതിനാൽ തന്നെ സാധാരണ വസ്​ത്രം ധരിച്ചായിരുന്നു മാർത്തയുടെ വിവാഹചടങ്ങുകളും.

ആഗ്രഹം തിരിച്ചറിഞ്ഞ കൊച്ചുമക്കൾ മുത്തശ്ശിക്കായി ബ്രൈഡൽ സ്​റ്റോറിൽ അപ്പോയ്​ൻമെന്‍റ്​ ബുക്ക്​ ചെയ്​തു. തുടർന്ന്​ മുത്തശ്ശിയെ അവിടെയെത്തിച്ച്​ നവവധുവിനെപ്പോലെ ഒരുക്കുകയായിരുന്നു. വിവാഹവസ്​ത്രമണിഞ്ഞ്​ നിൽക്കുന്ന മുത്തശ്ശിയുടെ വിഡിയോ വൈറലായി. വിഡിയോയിൽ പുഞ്ചരിച്ച്​ നിൽക്കുന്ന 94കാരിയെ കാണാം.

'മുത്തശ്ശി ഞങ്ങൾക്കായി ഒരുപാട്​ ത്യാഗം ചെയ്​തു. അതിനാൽ അവരുടെ ആഗ്രഹ പൂർത്തീകരണത്തിനായി ഞാൻ പരിശ്രമിച്ചു. ഇതെനിക്ക്​ വിലമതിക്കാനാകാത്തതാണ്​' -കൊച്ചുമകൾ ആഞ്ചല ​സ്​ട്രോസിയർ പറയുന്നു.

വിവാഹവസ്​ത്രം അണിഞ്ഞ്​ ഒരുങ്ങാൻ സാധിച്ചതിൽ താൻ വളരെയധികം സന്തോഷവതിയാണെന്ന്​ മുത്തശ്ശി പ്രതികരിച്ചു. വിവാഹവസ്​ത്രം അഴിച്ചുവെക്കാൻ തോന്നുന്നില്ലെന്നായിരുന്നു മുത്തശ്ശിയുടെ മറ്റൊരു കമന്‍റ്​.

വിഡിയോക്ക്​ കീഴിൽ നിരവധിപേർ സന്തോഷം പങ്കുവെച്ചെത്തി. കൂടാതെ കറുത്തവർഗക്കാർക്ക്​ വിവാഹവസ്​ത്രം ധരിക്കാൻ പാടില്ലെന്ന വിലക്കിനെതിരെ ഞെട്ടൽ രേഖപ്പെടുത്തുകയും ചെയ്​തു.