ഓടുന്ന​ ബസ് സൂപ്പർമാൻെറ വസ്​ത്രമണിഞ്ഞ്​​ തടഞ്ഞുനിർത്തുന്നതിനിടെ അപകടം; അമ്പരപ്പ്​ മാറാതെ കാഴ്​ചക്കാർ - വിഡിയോ

ഓടുന്ന​ ബസ്​ സൂപ്പർമാൻെറ​ വേഷം ധരിച്ച് തടഞ്ഞുനിർത്തുന്നതായുള്ള ഹാസ്യകലാകാരൻെറ അഭിനയം ഒടുവിൽ കാഴ്​ചക്കാരെ കൊണ്ടെത്തിച്ചത്​​ അമ്പരപ്പിൽ. ബ്രസീലിലെ ബാര ഡോസ്​ കോക്വിറോസിലാണ്​ സംഭവം.

ലൂയിസ് റിബീറോ ഡി ഗ്രാൻഡെ എന്ന 35കാരൻ സൂപ്പർമാൻെറ വേഷവുമണിഞ്ഞ്​ മൈക്കും പിടിച്ച്​ നടുറോഡിൽ നിൽക്കുന്നതാണ്​ വിഡിയോയിൽ ആദ്യം കാണുക. ഇതിനിടയിൽ പിന്നിൽനിന്ന്​ ബസ്​ വരുന്നുണ്ട്​. ബസ്​ താൻ കൈകാണിക്കുന്നതിന്​ അനുസരിച്ച്​ നിൽക്കുമെന്ന്​ കരുതിയെങ്കിലും അയാളുടെ ദേഹത്ത്​ വന്ന്​ മുട്ടുകയായിരുന്നു. ഇതോടെ അമ്പരന്ന്​ പോയ യുവാവ്​ സ്വബോധം തിരിച്ചുപിടിച്ച്​ വീണ്ടും മൈക്കിൽ സംസാരിക്കാൻ തുടങ്ങി.

തന്നെ ശരിക്കും ഉരുക്ക് കൊണ്ടാണ് നിർമിച്ചതെന്ന് ഇപ്പോൾ മനസ്സിലായെന്ന്​ അദ്ദേഹം പറയുന്നുണ്ട്​. കൂടാതെ ബസിന്​ ബ്രേക്കില്ലെന്നും അയാൾ പറയുന്നത്​ കേൾക്കാം. എന്നാൽ, ബസിൻെറ ദൂരം താൻ മനസ്സിലാക്കിയതിൽ പിഴവ്​ സംഭവിച്ചെന്ന്​ ലൂയിസ്​ ഒരു പ്രാദേശിക വാർത്താ ഏജൻസിയോട് പറഞ്ഞു. അപകടം തൻെറ തെറ്റാണെന്നും വിഡിയോയിൽ പറഞ്ഞതുപോലെ ബസിന്റെ ബ്രേക്കുകളിൽ പ്രശ്‌നമില്ലെന്നും അദ്ദേഹം കൂട്ടിച്ചേർത്തു.

'ഈ അഭ്യാസം ഞാൻ സ്​ഥിരമായി ചെയ്യാറുണ്ട്​. എന്നാലിവിടെ എനിക്ക്​ തെറ്റുപറ്റി. അതൊരു അപകടത്തിലാണ്​ കലാശിച്ചത്​. ദൈവത്തിൻെറ കൈ അവിടെ ഉണ്ടായിരുന്നതിനാൽ ഒന്നും സംഭവിച്ചില്ല. ദൈവത്തിൻെറ ഒരു അത്ഭുതം അവിടെ നടക്കുകയും എന്നെ സംരക്ഷിക്കുകയും ചെയ്തു' -ലൂയിസ്​ പറഞ്ഞു.

അതേസമയം, റോഡിൽ പാലിക്കേണ്ട മര്യാദകൾ സംബന്ധിച്ച് പ്രസ്​താവനയിറക്കി​ സ്വകാര്യ ബസ്​ കമ്പനി ഇദ്ദേഹത്തിനെതിരെ രംഗത്തുവന്നിട്ടുണ്ട്​.