'നാട്ടു നാട്ടു...' -രാംചരണിനൊപ്പം ഹിറ്റ് പാട്ടിന് ചുവടുവെച്ച് ആനന്ദ് മഹീന്ദ്ര -VIDEO

ഗോൾഡൻ ഗ്ലോബ് പുരസ്കാരം നേടിയ ആർ.ആർ.ആറിലെ 'നാട്ടു നാട്ടു' പാട്ടിന് നടൻ രാംചരണിനൊപ്പം ചുവടുവെച്ച് മഹീന്ദ്ര ഗ്രൂപ് ചെയർമാൻ ആനന്ദ് മഹീന്ദ്ര. ഇതിന്‍റെ വിഡിയോ ആനന്ദ് മഹീന്ദ്ര ട്വിറ്ററിൽ പങ്കുവെച്ചു. ഇലക്ട്രിക് റേസിങ് ചാമ്പ്യൻഷിപ്പായ ഹൈദരാബാദ് ഇ-പ്രിക്സിൽ പങ്കെടുക്കാനെത്തിയതായിരുന്നു ഇരുവരും.

'മത്സരത്തിൽ പങ്കെടുക്കാൻ പറ്റിയതിനൊപ്പം ലഭിച്ച യഥാർഥ ബോണസാണ് രാംചരണിൽ നിന്ന് നാട്ടു നാട്ടു പാട്ടിന്‍റെ സ്റ്റെപ്പുകൾ പഠിക്കാനായി എന്നത്' -ആനന്ദ് മഹീന്ദ് ട്വീറ്റ് ചെയ്തു. ഓസ്കാർ പുരസ്കാരം നേടട്ടെയെന്ന് ആശംസകളും നേർന്നു.

നാട്ടു നാട്ടു ഗാനത്തിന് ഓസ്കാർ നോമിനേഷൻ ലഭിച്ചിട്ടുണ്ട്. ഒറിജിനൽ സോങ് വിഭാ​ഗത്തിലാണ് ​ഗാനത്തിന് നാമനിർദേശം ലഭിച്ചിരിക്കുന്നത്. ഗോൾഡൻ ​ഗ്ലോബിലും അഭിമാനാർഹമായ നേട്ടമാണ് ആർ.ആർ.ആറും നാട്ടു നാട്ടു ​ഗാനവും കൈവരിച്ചത്. മികച്ച ഒറിജിനൽ സോങ് എന്ന വിഭാ​ഗത്തിലാണ് നാട്ടു നാട്ടുവിലൂടെ സം​ഗീത സംവിധായകൻ എം.എം. കീരവാണി പുരസ്കാരം സ്വന്തമാക്കിയത്. കാലഭൈരവ, രാഹുല്‍ സിപ്ലിഗുഞ്ജ് എന്നിവര്‍ ചേര്‍ന്നാണ് ഗാനം ആലപിച്ചത്. പ്രേം രക്ഷിത് ആയിരുന്നു നൃത്തസംവിധാനം.