111 വയസ്സ്​- ഈ ആസ്​ത്രേലിയക്കാരന്‍റെ ആയുസ്സിന്‍റെ രഹസ്യമറിഞ്ഞാൽ ആരും കോഴിയ​ുടെ തലയിലൊന്ന്​ തപ്പിനോക്കും

മെൽബൺ: 111 വയസ്സുണ്ട്​ ഡെക്​സ്റ്റർ ക്രുഗർ എന്ന ആസ്​ത്രേലിയക്കാരന്​. ആസ്​​േ​ത്രലിയയിലെ ഏറ്റവും ​​​പ്രായമുള്ളയാൾ. 111 വയസ്സും 125 ദിവസവും ഡെക്​സ്റ്റർ പൂർത്തിയാക്കിയത്​ ചൊവ്വാഴ്ചയാണ്​. ഒന്നാം ലോകമഹായുദ്ധം കണ്ട ജാക്ക്​ ലോക്കറ്റായിരുന്നു ഇതിന്​ മുമ്പ്​ ആസ്​​ത്രേലിയയിലെ 'കാരണവർ'. 2002ൽ മരിക്കു​േമ്പാൾ ജാക്കിന്​ ഉണ്ടായിരുന്നതിനേക്കാൾ രണ്ട്​ ദിവസം കൂടുതൽ പ്രായമുണ്ട്​ ഇപ്പോൾ ഡെക്​സ്റ്ററിന്​.

ക്വീൻസ്​ലാൻഡ്​ സ്​റ്റേറ്റിലെ റോമ എന്ന നഗരത്തിൽ കഴിയുന്ന ഡെക്​സ്റ്റർ ആസ്​ത്രേലിയൻ ബ്രോഡ്​കാസ്റ്റിങ്​ കോർപറേഷന്​ നൽകിയ അഭിമുഖത്തിൽ തന്‍റെ ആയുസ്സിന്‍റെ രഹസ്യത്തെ കുറിച്ച്​ പറയുന്നതാണ്​ ഇപ്പോൾ സമൂഹ മാധ്യമങ്ങളിൽ ചർച്ച വിഷയമായിരിക്കുന്നത്​. കോഴിയുടെ തലച്ചോർ ആണ്​ തന്‍റെ ആരോഗ്യത്തിന്‍റെ രഹസ്യമെന്ന്​ ഡെക്​സ്റ്റർ പറയുന്നു. 'കോഴിയുടെ തലച്ചോർ. നിങ്ങൾക്കറിയാമോ? കോഴികൾക്ക്​ തലയുണ്ട്​. അതിനുള്ളിൽ കുഞ്ഞ്​ തലച്ചോറും. ഒരൊറ്റ കടിക്കേ ഉള്ളൂ അത്​. പക്ഷേ, എന്ത്​ രുചിയാണ്​ അതിനെന്ന്​ അറിയാമോ?' -ഡെക്​സ്റ്റർ ചോദിക്കുന്നു.

തന്‍റെ പിതാവിന്‍റെ ഓർമ്മശക്​തി അവിശ്വസനീയമാണെന്നാണ്​ 74കാരനായ മകൻ ഗ്രെഗ്​ ക്രുഗർ പറയുന്നത്​. 'വളരെ ലളിതമായ ഭക്ഷണവും ചിട്ടയായ ജീവിതരീതിയുമാണ്​ അദ്ദേഹത്തെ ഇൗ പ്രായത്തിലും ചുറുചുറുക്കോടെ ഇരുത്തുന്നത്​. ഇപ്പോൾ ആത്​മകഥ എഴുതാനുള്ള ഒരുക്കത്തിലാണ്​ അദ്ദേഹം'- മകൻ പറഞ്ഞു.

ആസ്​ത്രേലിയയുടെ ചരിത്രത്തിലെ ഏറ്റവും പ്രായമേറിയ പുരുഷൻ ഡെക്​സ്റ്റർ ക്രുഗർ ആണെന്ന്​ ആസ്​ത്രേലിയൻ ബുക്ക്​ ഓഫ്​ റെക്കോർഡ്​സ്​ സ്​ഥാപകൻ ജോൺ ടെയ്​ലർ പറഞ്ഞു. 2002ൽ മരിച്ച ക്രിസ്​റ്റിന കൂക്ക്​ ആണ്​ ആസ്​​േ​ത്രലിയയിൽ ഇതുവരെ രേഖപ്പെടുത്തിയതിൽ ഏറ്റവും പ്രായമുള്ള വ്യക്​തി. 114 വയസ്സും 148 ദിവസവും പ്രായമുള്ളപ്പോളാണ്​ ക്രിസ്റ്റിന മരിക്കുന്നത്​.