ഇതാ ഒരു വെറൈറ്റി ഫൈൻ! വിവാഹ വിരുന്നിന്​ വരാതിരുന്ന അതിഥികൾക്ക്​​ 17,000 രൂപയുടെ ബില്ലയച്ച്​ ദമ്പതികൾ

ചിക്കാഗോ: ലോക്​ഡൗൺ സമയത്ത്​ വിവിധ ഇനം ​ൈഫന​ുകൾ കണ്ട മലയാളികൾക്ക്​ മുന്നിലേക്ക്​ ഇതാ ഒരു വെറൈറ്റി ഫൈൻ. വിവാഹ വിരുന്നിന്​ വരാതെ 'പറ്റിച്ച' അതിഥികളിൽ നിന്ന്​ ഫൈൻ ഈടാക്കാനുള്ള ശ്രമത്തിലാണ്​ ചിക്കാഗോയിലെ ദമ്പതികൾ​. മുൻകൂട്ടി അറിയിക്കാതെ വിരുന്നിൽ പ​ങ്കെടുക്കാഞ്ഞതിനെ തുടർന്നുള്ള നഷ്​ടം നികത്താൻ 240 ഡോളർ (ഏകദേശം 17639.23 രൂപ) നൽകണമെന്ന്​ ആവശ്യപ്പെട്ടാണ്​ ഇവർ അതിഥികൾക്ക്​ ബില്ല്​ അയച്ചിരിക്കുന്നത്​. തുക അടക്കുന്നതിന്​ ഒരു മാസത്തെ സാവകാശവും നൽകിയിട്ടുണ്ട്​്​. ഒരു അതിഥിക്ക്​ റിസപ്​ഷൻ ഡിന്നറിനും മറ്റും ഇവർക്ക്​ ചെലവായ തുകയാണ്​ 240 ഡോളർ.

ഡൗഗ്​-ഡെഡ്ര സിമ്മൺസ്​ ദമ്പതികളാണ്​ തങ്ങളുടെ വിവാഹ വിരുന്നിൽ പ​ങ്കെടുക്കാതെ നഷ്​ടം വരുത്തിവെച്ച അതിഥികൾക്ക്​ ഇ-മെയിലിലൂടെ ബിൽ അയച്ചുകൊടുത്തത്​. ജമൈക്കയിലെ റോയൽട്ടൻ നെഗ്രിൽ റിസോർട്ട്​ ആൻഡ്​ സ്​പായിലായിരുന്നു ഇവരുടെ വിവാഹ വിരുന്ന്​. 'വിവാഹ വിരുന്നിൽ പ​ങ്കെടുക്കുന്നവരുടെ അവസാനവട്ട കണക്കെടുപ്പിൽ നിങ്ങൾ ഉറപ്പായും പ​ങ്കെടുക്കുമെന്ന്​ പറഞ്ഞതിനാലാണ്​ ഈ ഇൻവോയ്​സ്​ നിങ്ങൾക്ക്​ അയക്കുന്നത്​. വിരുന്നിൽ ഒരാൾക്ക്​ ചെലവായ തുകയാണ്​ ഇതിൽ കാണിക്കുന്നത്​. നിങ്ങൾ വരില്ലയെന്ന്​ മുൻകൂട്ടി വിവരം നൽകാതിരുന്നതിനാൽ, ഈ തുക നേരത്തേ അടച്ച ഞങ്ങൾക്ക്​ നഷ്​ടം ഉണ്ടായിരിക്കുകയാണ്​. അതുകൊണ്ട്​ ഈ തുക നിങ്ങൾ ഓൺലൈൻ പേയ്​മെന്‍റ്​ സംവിധാനങ്ങൾ വഴി (സെല്ലെ അല്ലെങ്കിൽ പേപാൽ) അയക്കാവുന്നതാണ്​. ദയവായി ഞങ്ങളെ ബന്ധപ്പെടുകയും ഏത്​ പേയ്​മെന്‍റ്​ മാർഗമാണ്​ നിങ്ങൾക്ക്​ അഭികാമ്യമെന്ന്​ അറിയിക്കുകയും ചെയ്യുക. നന്ദി'- എന്ന കുറിപ്പും ബില്ലിനൊപ്പം വെച്ചിട്ടുണ്ട്​.

നാല്​ തവണയിലേറെ ഓരോ അതിഥികളെയും വിളിച്ച്​ അവരുടെ സാന്നിധ്യം ഉറപ്പാക്കിയ ശേഷമാണ്​ ഭക്ഷണത്തിനും മറ്റുമുള്ള തുക അടച്ചതെന്ന്​ ദമ്പതികൾ പറയുന്നു. ഫേസ്ബുക്ക് പോസ്റ്റിലൂടെയാണ്​ ദമ്പതികൾ ഇതുസംബന്ധിച്ച വിവരങ്ങൾ പുറംലോകത്തെ അറിയിച്ചത്​. തുടർന്ന് നിരവധി പേർ ഈ പോസ്റ്റ് ഏറ്റെടുത്തു. ആതിഥേയരുടെ വിഷമതകൾ മനസിലാക്കണമെന്ന് പറഞ്ഞ് ഒരു വിഭാ​ഗം പോസ്റ്റിനെ അനുകൂലിച്ചപ്പോൾ, വിചിത്രമെന്നാണ് മറ്റ് ചിലർ പോസ്റ്റിനെ വിശേഷിപ്പിച്ചത്. തങ്ങളെ അനുകൂലിച്ച്​, സമാന അനുഭവങ്ങൾ പങ്കുവെച്ച്​ നിരവധി പേർ സന്ദേശമയച്ചെന്ന്​ ദമ്പതികൾ അറിയിച്ചു. ഓരോ വിവാഹത്തിനും പിറന്നാൾ ആഘോഷത്തിനുമെല്ലാം നിരവധി പണം പണം ചെലവാകാറുണ്ടെന്നും അതിഥികൾ എത്താൻ സാധിക്കില്ലെന്ന് മുൻകൂട്ടി അറിയിച്ചാൽ ആതിഥേയരുടെ പണം പാഴായി പോകില്ലെന്നുമാണ്​ പലരും ചൂണ്ടിക്കാണിക്കുന്നത്​.