പുതുവത്സരാഘോഷത്തിന്​ ഇത്ര വിലയോ​? 1.25കോടിയുടെ ബിൽ വൈറൽ

ദുബൈ: പുതുവൽസരാഘോഷം അടിപൊളിയായി സമാപിച്ചപ്പോൾ സാമൂഹിക മാധ്യമങ്ങളിൽ ചർച്ചയായത്​ ഒരു റസ്റ്ററൻറ് ബിൽ. ദുബൈ ഡൗൺടൗണിൽ പുതുവൽസര രാവിൽ ചിലവഴിച്ച ഒരാൾക്ക്​ ലഭിച്ച​ 6.20ലക്ഷം ദിർഹമിന്‍റെ(ഏകദേശം 1.25കോടി രൂപ) ബി​ല്ലാണ്​ വൈറലായത്​. റസ്റ്ററൻറ്​ നടത്തിപ്പുകാരനായ മെർട്​ തുർക്​മെൻ എന്നയാളാണ്​ ബിൽ ഇൻസ്റ്റഗ്രാം വഴി പങ്കുവെച്ചത്​. 18പേർക്ക്​ ഒരുക്കിയ സൗകര്യങ്ങൾക്കാണ്​ ഇത്രയും ബില്ലായത്​. ആർക്കാണ്​ ബില്ല്​ നൽകിയതെന്നോ മറ്റു വിവരങ്ങളോ ലഭ്യമാക്കിയിട്ടില്ല. ‘ആദ്യത്തേതല്ല, അവസാനവുമല്ല’ എന്ന കാപ്​ഷനോടെയാണിത്​ പോസ്റ്റ്​ ചെയ്തത്​. ബിൽ ശ്രദ്ധിക്കപ്പെട്ടതോടെ വളരെ വേഗത്തിൽ മറ്റു സാമൂഹിക മാധ്യമങ്ങളിലും ആളുകൾ പങ്കുവെച്ചു.

നേരത്തെ അബൂദബിയിലെ ഒരു റസ്റ്ററന്‍റിലെ ബില്ലും സമാനമായ രീതിയിൽ വൈറയാലിരുന്നു. 6.15ലക്ഷം ദിർഹമാണ്​ ഇതിലുണ്ടായിരുന്നത്​. ദുബൈയിൽ ശനിയാഴ്ചത്തെ ഗംഭീരമായ പുതുവത്സരാഘോഷങ്ങൾ കാണുന്നതിനായി വിനോദസഞ്ചാരികളും താമസക്കാരും ഡൗൺടൗൺ ഭാഗത്താണ്​ പ്രധാനമായും റസ്റ്റോറന്‍റുകൾ തെരഞ്ഞെടുത്തത്​. ബുർജ്​ ഖലീഫക്ക്​ സമീപത്താണ്​ ലോകത്തെ നിരവധി സെലിബ്രിറ്റികളും ആഘോഷത്തിന്​ എത്തിയിരുന്നത്​. ഇന്ത്യൻ ക്രിക്കറ്റ്​ താരം വിരാട്​ കോഹ്​ലിയും നടിയും ഭാര്യയുമായ അനുഷ്ക ശർമയും പുതുവൽസര രാവിൽ ബുർജ്​ ഖലീഫക്ക്​ സമീപത്ത്​ നിൽക്കുന്ന ചിത്രം പുറത്തുവിട്ടിരുന്നു.

സാമൂഹിക മാധ്യമങ്ങളിൽ വൈറലായ ബിൽ