'നീ എങ്ക പോയ് ഒളിഞ്ചാലും വിടമാട്ടേ കണ്ണാ..'- പെൺകുട്ടിയെ അധിക്ഷേപിച്ച യുവാവിനെ പൊലീസ്​ അറസ്റ്റ്​ ചെയ്യുന്ന വിഡിയോ വൈറൽ

കൊല്ലം: ഇൻസ്റ്റ​ഗ്രാമിലൂടെ പെൺകുട്ടിയെ അധിക്ഷേപിച്ച യുവാവിനെ പൊലീസ് അറസ്റ്റ് ചെയ്തുകൊണ്ടുപോകുന്ന വിഡിയോ സമൂഹ മാധ്യമങ്ങളിൽ വൈറലാകുന്നു. 'ഹൊസൂരല്ല, നീ എങ്ക പോയ് ഒളിഞ്ചാലും ഉന്നൈ വിടമാട്ടേ കണ്ണാ..' എന്ന തലക്കെട്ടിൽ കേരള പൊലീസിന്‍റെ ഫേസ്ബുക്ക് പേജിലാണ്​ വീഡിയോ പോസ്റ്റ്​ ചെയ്​തിരിക്കുന്നത്​.

പെൺകുട്ടിയെ അധിക്ഷേപിച്ച യുവാവിനെതിരെ കൊല്ലം ചടയമംഗലം പൊലീസ് കഴിഞ്ഞ ദിവസമാണ്​ കേസെടുത്തത്​. 'ലിജോസ് സ്ട്രീറ്റ് റൈഡര്‍ 46' എന്ന ഇന്‍സ്റ്റഗ്രാം ഐഡിയിലൂടെ പെണ്‍കുട്ടിക്കെതിരെ അധിക്ഷേപകരമായ പരാമര്‍ശം നടത്തിയെന്നാണ് കേസ്. പൊലീസിനെ യുവാവ്​ വെല്ലുവിളിക്കുകയും ചെയ്​തിരുന്നു.

തുടർന്ന്​ കർണാടകയിലെ ഹൊസൂരിൽ ഒളിവിൽ കഴിയുകയായിരുന്ന യുവാവിനെ പൊലീസ്​ കുടുക്കുകയും ചെയ്​തു. ഇയാളെ അറസ്റ്റ്​ ചെയ്തുകൊണ്ടുപോകുന്ന വിഡിയോ ആണ് 'ഹൊസൂരല്ല, നീ എങ്ക പോയ് ഒളിഞ്ചാലും ഉന്നൈ വിടമാട്ടേ കണ്ണാ..' എന്ന തലക്കെട്ടിൽ കേരള പൊലീസ്​ ഫേസ്​ബുക്ക്​ പേജിൽ പോസ്റ്റ്​ ചെയ്​തതും സംഗതി വൈറലായതും.​

പെണ്‍കുട്ടി ഇന്‍സ്റ്റഗ്രാം ലൈവില്‍ വന്നപ്പോള്‍ യുവാവ്​ അധിക്ഷേപിക്കുകയും പിന്നീട് ലൈവ് വിഡിയോ ചെയ്ത് തെറിവിളിക്കുകയും അധിക്ഷേപ പരാമർശങ്ങൾ നടത്തുകയുമായിരുന്നു. ഇവരുടെ ഇന്‍സ്റ്റഗ്രാം ഇൻബോക്സിലേക്ക് സഭ്യമല്ലാത്ത ശബ്​ദസന്ദേശങ്ങള്‍ അയച്ചെന്നും പരാതിയുണ്ടായിരുന്നു.