കാറിൽ കുടുങ്ങി ഭീമൻ കരടി; പുറത്തിറക്കാൻ കാറിന്‍റെ ഉടമയും -വൈറൽ വിഡിയോ

വാഷിങ്​ടൺ: കാറിലോ ബൈക്കിലോ യ​ാത്ര ചെയ്യു​േമ്പാൾ വന്യമൃഗങ്ങൾ ആക്രമിക്കുന്നത്​ പതിവാണ്. എന്നാൽ കാറിൽ ഒരു വന്യമൃഗം അകപ്പെട്ടാലോ. അതും ഒരു കരടി. ടെന്നസിയിലെ ഗാറ്റ്​ലിൻബർഗിലെ ഒരു വിഡിയോയാണ്​ സമൂഹമാധ്യമങ്ങളിൽ ഇപ്പോൾ വൈറൽ.

പുറത്ത്​ നിർത്തിയിട്ടിരിക്കുന്ന ഒരു കാറിൽ ഭീമൻ കരടി കുടുങ്ങിയതാണ്​ വിഡിയോ. കാറിനകത്ത്​ അകപ്പെട്ട കരടിക്ക്​ ഡോർ തുറക്കാതെ പുറത്തുകടക്കാനും കഴിയില്ല. കാറിന്‍റെ ഉടമയായ ജോസഫ്​ ഡീലും സുഹൃത്തുക്കള​ും കരടിയെ കാറിൽനിന്ന്​ പുറത്തിറക്കാനുള്ള പല വഴികളും അന്വേഷിച്ചു. എന്നാൽ എല്ലാം പരാജയപ്പെട്ടതോടെ ഡോർ തുറന്ന്​ കരടിയെ ഇറക്കിവിടാനായിരുന്നു ശ്രമം.

കാർ ആരു തുറക്കുമെന്ന ചോദ്യത്തിൽ ഉത്തരം കാറിന്‍റെ ഉടമയായ ജോസഫ്​ ഡീലിലുമെത്തി. ഡീൽ കാർ തുറക്കു​േമ്പാൾ സുഹൃത്തുക്കൾ കരടിയെ ഒാടിക്കാനായി ശബ്​ദമുണ്ടാക്കും. കരടി ആക്രമിക്കുമോ എന്ന ഭയം ഉണ്ടെങ്കിലും ധൈര്യത്തേ​ാടെ ദൗത്യം പൂർത്തിയാക്കാനായി ഇവരുടെ പരിശ്രമം.

സംഭവത്തിന്‍റെ ദൃശ്യങ്ങൾ സുഹൃത്തുക്കളിൽ ഒരാൾ വിഡിയോയിൽ പകർത്തുകയും ചെയ്​തു. ഡീൽ കാർ തുറക്കുന്നതും കരടി കാറിൽനിന്ന്​ പുറത്തിറങ്ങുന്നതും വിഡിയോയിൽ കാണാം. സുഹൃത്തുക്കൾ കൈയടിക്കുകയും ഉച്ചത്തിൽ ശബ്​ദമുണ്ടാക്കുകയും ചെയ്യുന്നതോടെ കരടി ഓടി​േപ്പാകുന്നതും വിഡിയോയില​ുണ്ട്​. കരടി ആക്രമിക്കാത്തതിന്‍റെ ആശ്വാസം പങ്കുവെച്ചാണ്​ സമൂഹമാധ്യമങ്ങളിൽ വിഡിയോ പ്രത്യക്ഷപ്പെട്ടത്​. കാറിന്​ സാരമായ കേടുപാടുകൾ പറ്റിയിട്ടുണ്ട്​. ടിക്​ടോകിൽ പങ്കുവെച്ച വിഡിയോ നിരവധിപേർ​ ഇതിനോടകം കണ്ടു​.

കരടികൾക്ക്​ പേരുകേട്ട സ്​ഥലമാണ്​ ടെന്നസിയിലെ ഗാറ്റ്​ലിൻബർഗ്​. വിനോദസഞ്ചാര കേന്ദ്രമായ ഇവിടെ കരടികൾക്കായി പ്രത്യേക കേന്ദ്രങ്ങളും ഒരുക്കിയിട്ടുണ്ട്​. കരടി ആക്രമിക്കാനെത്തുകയാണെങ്കിൽ ഉച്ചത്തിൽ ശബ്​ദമുണ്ടാക്കി ഓടിക്കുക മാത്രം ചെയ്യണമെന്നാണ്​ അധികൃതരുടെ നിർദേശം.