കൈയക്ഷരം​ ചതിച്ചു- ഭീഷണിക്കത്ത്​ ബാങ്ക്​ ജീവനക്കാരന്​ മനസ്സിലായില്ല; കാത്തുനിന്ന്​ മടുത്ത്​ കള്ളന്‍റെ മടക്കം

അധ്യാപകർ കൈയക്ഷരം നന്നാക്കണമെന്ന്​ പറയു​ന്നത്​ ഓർക്കുന്നുണ്ടാകും. ആരും ഈ വാക്കുകളെ അധികം മുഖവിലക്കെടുക്കാറില്ല. എന്നാൽ, വളരെ ആസൂത്രണം ചെയ്​ത്​ നടപ്പാക്കിയ ഒരു കൃത്യത്തിൽനിന്ന്​ കൈയക്ഷരം മോശമായതിനാൽ പിന്മാറേണ്ടിവ​ന്നാലോ? അതാണ്​ ഇംഗ്ലണ്ട്​ ഹാസ്റ്റിങ്​സിലെ സെന്‍റ്​ ലിയോനാർഡ്​സ്​ സ്വദേശിയായ അലൻ സ്ലാറ്ററിക്ക്​ സംഭവിച്ചതും.

ഈ വർഷം മാർച്ച്​ 18ന്​ ദീർഘകാലം നീണ്ട പ്ലാനി​ങ്ങോടെ ബാങ്ക്​ കൊള്ളയടിക്കാൻ എത്തിയതായിരുന്നു അലൻ. ഭീഷണിക്കത്ത്​ കൈമാറി പണം തട്ടാനായിരുന്നു അലന്‍റെ നീക്കം. ഈസ്റ്റ്​ബോണിലെ ബാങ്കിലെത്തിയ അലൻ ഭീഷണിക്കത്ത്​ ജീവനക്കാരന്​ കൈമാറുകയും ചെയ്​തു. എന്നാൽ, കൈയക്ഷരം ചതിച്ചതോടെ ജീവനക്കാരന്​ അലൻ കവർച്ചക്കെത്തിയതാണെന്ന്​ പിടികിട്ടിയില്ല. അൽപ്പം ക്ഷമയോടെ അവിടെ നിന്നെങ്കിലും ബാങ്കിൽനിന്ന്​ അലന്​ മടങ്ങേണ്ടിവന്നു.

പിന്നീട്​, ജീവനക്കാർ കുറിപ്പ്​ പരസ്​പരം കൈമാറി വായിച്ചതോടെയാണ്​ ഭീഷണിക്കത്താണെന്ന്​ മനസിലായത്​. ഉടൻ തന്നെ ബാങ്ക്​ അധികൃതർ പൊലീസിനെ വിവരം അറിയിക്കുകയും ചെയ്​തു. 'നിങ്ങളുടെ ജോലി തടസപ്പെടുത്തില്ല. എത്രയും വേഗം 10 -20 പൗണ്ട്​ കൈമാറണം. മറ്റു ഉപഭോക്താക്കളെക്കുറിച്ച്​ ചിന്തിക്കുക' -എന്നായിരുന്നു സന്ദേശം. കുറിപ്പിന്​​ പുറമെ സി.സി.ടി.വി ദൃശ്യങ്ങളും ​െപാലീസ്​ ശേഖരിച്ചു. എന്നാൽ, ദൃശ്യങ്ങളിൽനിന്ന്​ അലനെ കണ്ടെത്താൻ പൊലീസിന്​ കഴിഞ്ഞിരുന്നില്ല.

മാർച്ച്​ 26ന്​ മറ്റൊരു ബാങ്ക്​ ലക്ഷ്യമിട്ടായിരുന്നു അലന്‍റെ പ്രവർത്തനം. കൈയക്ഷരം നന്നാക്കിയെഴുതിയതോടെ വിദ്യ ഫലിക്കുകയും ജീവനക്കാരൻ 2400 പൗണ്ട്​ കൈമാറുകയും ചെയ്​തു. ബാങ്ക്​ അധികൃതർ പൊലീസിൽ വിവരം അറിച്ചതോടെ സി.സി.ടി.വി ഉൾപ്പെടെ പരിശോധനക്ക്​ വിധേയമാക്കി. ഇതോടെ രണ്ടും ഒരാളാണെന്ന്​​ പൊലീസ്​ ഉറപ്പിച്ചു. മൂന്നാമതൊരു ബാങ്കിൽ കവർച്ചക്ക്​ ശ്രമി​​െച്ചങ്കിലും ജീവനക്കാരൻ അലന്​ നേരെ തിരിഞ്ഞതോടെ അവിടെനിന്ന്​ രക്ഷപ്പെടുകയായിരുന്നു.

പിന്നീട്​ പൊലീസ്​ നടത്തിയ അന്വേഷണത്തിൽ 63കാരനെ പിടികൂടുകയായിരുന്നു. മോഷണത്തിനും മോഷണ ശ്രമത്തിനും പൊലീസ്​ കേസെടുത്തു. കവർച്ചയുടെയും കവർച്ച ശ്രമത്തിന്‍റെയും വിശദാംശങ്ങളും പൊലീസ്​ വെബ്​സൈറ്റിൽ പങ്കുവെച്ചു.