ആളൊഴിഞ്ഞ വിമാനത്തില്‍ ഹിറ്റ്​ പാട്ടിന്​ തകർപ്പൻ ഡാൻസ്​ കളിച്ച എയര്‍ ഹോസ്റ്റസ് ഇതാ

ആളൊഴിഞ്ഞ വിമാനത്തിൽ ഹിറ്റ്​ സിംഹള ഗാനത്തിനൊപ്പിച്ച്​ ചുവടുവെക്കുന്ന എയർ ഹോസ്റ്റസിന്‍റെ വീഡിയോ വൈറലാണിപ്പോൾ. മൂന്നുദിവസം കൊണ്ട്​ മൂന്നുകോടിയോളം പേർ ആണ്​ വീഡിയോ കണ്ടിരിക്കുന്നത്​. ഇന്‍റിഗോ എയർലൈൻസിലെ എയർ ഹോസ്റ്റസ്​ ആയത്ത്​ ആണ്​ തകർപ്പൻ ഡാൻസ്​ കളിച്ച്​ വൈറലായത്​. ഇപ്പോഴും സമൂഹ മാധ്യമങ്ങളിൽ വൈറലായി ഓടുന്ന ശ്രീലങ്കൻ ഗായിക യോഹാനി ഡിലോക ഡിസിൽവയുടെ 'മണികെ മഗെഹിതെ' എന്ന കവർ സോങിനൊപ്പമാണ്​ ആയത്ത്​ ഡാൻസ്​ കളിച്ചത്​.

View this post on Instagram

A post shared by Aᴀʏᴀᴛ urf Afreen (@_aayat_official)

യൂനിഫോമിൽ തന്നെ ചുവടുവച്ച ആയത്തിന്‍റെ വീഡിയോ സുഹൃത്തുക്കളാണ് പകർത്തി സമൂഹമാധ്യമങ്ങളിൽ പോസ്റ്റ് ചെയ്തത്. പിന്നാലെ വീഡിയോക്ക്​ ലൈക്കിന്‍റെയും ഷെയറിന്‍റെയും പ്രളയം ആയിരുന്നു. ആയത്തിന്‍റെ ഇൻസ്റ്റഗ്രാം അക്കൗണ്ടിൽ മാത്രം 26 ലക്ഷത്തിലേറെ പേർ ലൈക്ക്​ ചെയ്​തു. വീഡിയോ വൈറലായതോടെ ആയത്തിന്‍റെ യുട്യൂബ്​ ചാനലായ 'ലൈഫ്​ ക്യാമറ ആഫ്രീൻ (Life camera Aafreeeen!), ഇന്‍റസ്റ്റഗ്രാം അക്കൗണ്ടും സൂപ്പർ ഹിറ്റായി. മുമ്പും ആയത്തിന്‍റെ ഇൻസ്റ്റഗ്രാമിലെ വീഡിയോകൾ ഹിറ്റായിട്ടുണ്ട്​. 1.45 ലക്ഷം ഫോളോവേഴ്​സാണ്​ ആയത്തിന്​ ഇൻസ്റ്റയിലുള്ളത്​. ഡാൻസ്​ വീഡിയോകളും വിനോദയാത്രയിലെ ഫോ​ട്ടോകളും ഒക്കെയാണ്​ ഇതിലുള്ളത്​.

ഈ വർഷം മേയിലാണ്​ യോഹാനിയുടെ ഡിസിൽവയുടെ കവർ സോങ്​ 'മണികെ മഗെഹിതെ' ഹിറ്റായത്​. 2020ൽ സതീശൻ രത്​നായക ഇറക്കിയ പാട്ടിന്‍റെ കവർ സോങ്​ ആണിത്​. ഇതുവരെ എട്ടുകോടിയോളം കാഴ്ചക്കാരെ കിട്ടിയ ഗാനം ആയിരക്കണക്കിന്​ ഷോർട്ട്​ വീഡിയോകളിലും റീലുകളിലുമാണ്​ ഉപയോഗിക്കപ്പെട്ടത്​. അത്ര മികച്ചതാണ്​ ഈ പാട്ടിന്‍റെ ഇമ്പവും താളവും. കവർ സോങ്​ പാടിയ 28കാരിയായ യോഹാനി പാ​ട്ടെഴുത്തുകാരി, റാപ്പർ, യുട്യൂബർ, ബിസിനസുകാരി, നീന്തൽതാരം, വാട്ടർപോളോ താരം എന്നീ നിലകളിലും പ്രശസ്​തയാണ്​. ഗിറ്റാർ വായനയിലൂടെ സംഗീതരംഗത്തെത്തിയ യോഹാനി യു.കെ, ആസ്​ത്രേലിയ എന്നിവിടങ്ങളിലെ ഉപരിപഠനത്തിനുശേഷം 2019ൽ ശ്രീലങ്കയിൽ തിരികെയെത്തിയ ശേഷമാണ്​ പാട്ടിന്‍റെ വഴിയിൽ താരമായത്​. ടിക്​ടോക്​ വീഡിയോകളിലൂടെയും കവർ സോങുകളിലൂടെയും കേരളത്തിലടക്കം ലക്ഷക്കണക്കിന്​ ആരാധകരെയാണ്​ യോഹാനി സ്വന്തമാക്കിയിരിക്കുന്നത്​. 'മണികെ മഗെഹിതെ'യുടെ മലയാളം വേർഷനും യോഹാനി കേരളത്തിലെ ആരാധകർക്കായി സമ്മാനിച്ചു.