ആദ്യം ഓടിനടന്നു, പിന്നീട്​ മര്യാദക്കാരനായി; മെട്രോയിൽ യാത്രക്കാരനായി കുരങ്ങനും -വിഡ​ിയോ

ന്യൂഡൽഹി: ഡൽഹി മെട്രോയിൽ യാത്രക്കാരനായി കുരങ്ങനും. ഓടുന്ന മെട്രോയുടെ ഒരു കോച്ചിൽ യാത്രക്കാർക്കൊപ്പം സഞ്ചരിക്കുന്ന കുരങ്ങന്‍റെ വിഡിയോയാണ്​ ഇപ്പോൾ വൈറൽ.

കോച്ചിന്​ അകത്ത്​ ആദ്യം കുരങ്ങൻ ഓടിനടക്കുന്നതും കമ്പികളിൽ വലിഞ്ഞുകയറുന്നതും വിഡിയോയിൽ കാണാം. യാത്രക്കാൻ ബഹളം വെക്കുന്നതോടെ ഒരു യാത്രക്കാരന്​ സമീപമെത്തി മര്യാദക്കാരനായി ഇരിക്കുന്നതും വിഡിയോയിലുണ്ട്​. സംഭവം നടക്കുന്നത്​ ഡൽഹി മെട്രോയിലെ യമുന സ്​റ്റേഷനെന്ന്​ ഒരാൾ പറയുന്നത്​ കേൾക്കാം.

അതേസമയം, ഡൽഹി മെട്രോ സംഭവം സ്​ഥിരീകരിക്കാൻ തയാറായില്ല. എന്നാൽ വിഡിയോ ട്വിറ്ററിൽ പങ്കുവെച്ചതിന്​ ശേഷം കോച്ച്​ വിവരങ്ങൾ ഉൾപ്പെടെ പങ്കുവെക്കാൻ ആവശ്യപ്പെട്ടിരുന്നു.

വിഡിയോ വൻതോതിൽ പ്രചരിച്ചതോടെ നിരവധി പേരാണ്​ പ്രതികരണവുമായി രംഗത്തെത്തിയത്​.