ആ പിതാവിനെ മകൻ ഉപേക്ഷിച്ചതല്ല; അഗതിമന്ദിരത്തിലെ നൊമ്പരച്ചിത്രത്തിന്​ പിന്നിൽ നമ്മളറിയാത്തൊരു കഥയുണ്ട്​

തന്നെ അഗതിമന്ദിരത്തിലാക്കി മടങ്ങുന്ന മകനെ വിഷമത്തോടെ നോക്കിനിൽക്കുന്ന പിതാവിനെയാണ്​ എല്ലാവരും ആ ചിത്രത്തിൽ കണ്ടത്​. മനസ്സില്ലാമനസ്സോടെ പിതാവിനെ അവിടെയാക്കി പോകു​േമ്പാൾ ഓ​ട്ടോയിലിരുന്ന കണ്ണീരണിഞ്ഞ ആ മകനെ ആരും കണ്ടില്ല. പകരം ആ മകനെ വില്ലനാക്കി കഥകൾ മെനയുകയായിരുന്ന പലരും. ഒടുവിൽ ചിത്രം പകർത്തിയയാൾ തന്നെ രംഗത്തെത്തി, ആ നൊമ്പരദൃശ്യത്തിന്​ പിന്നിലെ യാഥാർഥ്യം വെളിപ്പെടുത്താൻ...

'അനാഥാലയത്തിലാക്കി മടങ്ങുന്ന മകനെ നോക്കി നിൽക്കുന്ന അച്ഛൻ' എന്ന തലക്കെട്ടോടെ കഴിഞ്ഞ ദിവസങ്ങളിൽ സമൂഹമാധ്യമങ്ങളിൽ വൈറലായ ചിത്രത്തെക്കുറിച്ചാണ്​ ഫാ. സന്തോഷിന്‍റെ വെളിപ്പെടുത്തൽ. ഈ ചിത്രം ദുർവ്യാഖ്യാനിക്കപ്പെടുകയായിരുന്നെന്ന്​ ഫാ. സന്തോഷ് ചൂണ്ടിക്കാട്ടുന്നു. പത്തനംതിട്ട ജില്ലയിലെ തുമ്പമണ്ണിനടുത്തു പുന്നകുന്നിൽ പ്രവർത്തിക്കുന്ന അനാഥർക്കും നിർധനരായ രോഗികൾക്കുമുള്ള ആശ്രയകേന്ദ്രമായ ബെത് സേഥായുടെ നടത്തിപ്പുകാരനാണ്​ ഫാ. സന്തോഷ്.

ചിത്രത്തിൽ കാണുന്നത് പത്തനംതിട്ട തണ്ണിത്തോട് സ്വദേശിയായ വയോധികനാണെന്ന്​ അദ്ദേഹം പറയുന്നു. അദ്ദേഹത്തിന്‍റെ മകൻ തൃശൂരിൽ ഒരു വനമേഖലയ്ക്ക് അടുത്തുള്ള തോട്ടത്തിൽ ടാപ്പിങ്​ തൊഴിലാളിയാണ്​. ഭാര്യ അകന്നു കഴിയുന്നതിനാൽ പിതാവിനെ പരിചരിക്കാൻ വേറെ ആരുമില്ല. പിതാവിനെ കാട്ടിലേക്കു കൊണ്ടുപോകാനുള്ള ബുദ്ധിമുട്ട് കാരണം വീട്ടിൽ ഒറ്റയ്ക്കാക്കിയാണ് മകൻ ജോലിക്കു പോയിരുന്നത്. എന്നാൽ, വയോധികൻ വീട്ടിൽ തനിച്ചാണെന്ന്​ നാട്ടുകാരിൽ നിന്നറിഞ്ഞ പൊലീസ്​ പിതാവിനെ സുരക്ഷിതമായി എവിടെയെങ്കിലും ആക്കണമെന്ന്​ മകനോട്​ നിർദേശിച്ചു. ജോലിക്കു പോകാതെ നിലനിൽക്കാൻ സാധിക്കില്ലെന്ന സാഹചര്യം വന്നതോടെയാണ്​ മകൻ പിതാവിനെ ബത് സേഥായിൽ ആക്കിയത്​.

പിതാവിനെ അഗതിമന്ദിരത്തിലാക്കി പോകുന്നതിന്‍റെ എല്ലാ വിഷമവും ആ മകനുണ്ടായിരുന്നെന്ന്​ ഫാ. സ​ന്തോഷ്​ പറയുന്നു. മകൻ യാത്ര പറഞ്ഞ് ഓട്ടോയിൽ കയറുമ്പോൾ പിതാവ്​ നിസ്സഹായതയോടെ നോക്കിനിൽക്കുന്നതാണ്​ ആ ചിത്രത്തിലുള്ളത്. ആ സമയം മകൻ കണ്ണുകളടച്ച് ഓട്ടോറിക്ഷയിൽ കുനിഞ്ഞിരിക്കുകയായിരുന്നു. ഇതിനിടെ പകർത്തിയതാണ് ആ ചിത്രമെന്ന്​ പറയുന്ന ഫാ. സ​ന്തോഷ്​ ഒരു കാര്യം കൂടി പറയുന്നു. ഈ കാഴ്ച കണ്ട്​ തൊട്ടടുത്ത്​ ബത്​ സേഥായിൽ കഴിയുന്ന തന്‍റെ പിതാവും ഉണ്ടായിരുന്നു. ഫാ. സന്തോഷിന്‍റെ പിതാവടക്കം 23 അന്തേവാസികളാണ്​ ഇവിടെ കഴിയുന്നത്​. തെരുവിൽ അലഞ്ഞു നടക്കുന്നവരെ കണ്ടെത്തി പുതിയ ഒരു ജീവിതം നൽകാനുള്ള ശ്രമമാണ്​ ബത്​ സേഥായിൽ നടക്കുന്നതെന്ന്​ ഫാ. സന്തോഷ് പറയുന്നു. ഇതിനു പുറമേ തിരുവനന്തപുരത്ത് ആർ.സി.സിക്കു സമീപം നിർധനരായ കാൻസർ രോഗികൾക്ക് സൗജന്യ ഭക്ഷണവും താമസ സൗകര്യവുമൊരുക്കി 'തണൽ വീട്' എന്ന കാൻസർ കെയർ ഹോമും നടത്തുന്നുണ്ട്​.

ഫാ. സന്തോഷിന്‍റെ ഫേസ്ബുക്ക്​ കുറിപ്പിന്‍റെ പൂർണരൂപം:

ഞാൻ പകർത്തിയ ഒരു ചിത്രമാണ്... ഇന്ന് ബത് സേഥായിൽ വന്ന പുതിയ അംഗമാണ്. കൊണ്ടു വന്നാക്കിയവർ മടങ്ങുന്ന ഓട്ടോയും കാണാം. പക്ഷേ വൃദ്ധനേത്രം പരതിയ ഒരു മുഖം ആ ചെറിയ വാഹനത്തിന്‍റെ അകത്തേ മറവിൽ തല കുനിച്ചിരുപ്പുണ്ടായിരുന്നു. തന്‍റെ സ്വന്തം മകൻ. മകന്‍റെനിസ്സഹായകതയിലാണ് ഈ പിതാവ് ഇവിടെ എത്തിയത് എന്നതും സത്യമാണ്. ഓട്ടോ പോയ ശേഷം 10 മിനിറ്റോളം ആ നിൽപ്പ് തുടർന്നു. എവിടെയോ നീറി പുകയുന്ന നഷ്ടബോധ്യങ്ങളുടെ ഓർമ്മകളിലൂടെ ഇന്നത്തെ രാത്രി ഈ പിതാവ് ഉറങ്ങാതെ തീർക്കും. പക്ഷെ ഇവിടെ അദ്ദേഹത്തിന് ദുഃഖിക്കേണ്ടി വരില്ല. തനിച്ചുമായിരിക്കില്ല. 85 വയസ്സുള്ള എന്‍റെ പിതാവ് തൊട്ടപ്പുറത്തെ മുറിയുടെ വരാന്തയിൽ കസേരയിൽ ഇരുന്ന് ഈ കാഴ്ച കാണുന്നുണ്ടായിരുന്നു. ഞാനങ്ങോട്ട് ചെന്നു പറഞ്ഞു പുതിയ ആൾ വന്നതാണ്. എന്‍റെ കൈയിൽ ബലം കുറഞ്ഞ ആ കൈകൾ ഒന്നു മുറുകെ പിടിച്ച് എനിക്ക് ഒരു ചിരി നൽകി. ആ ചിരിയിൽ എല്ലാമുണ്ടായിരുന്നു...'