വഴിയരികില്‍ പച്ചക്കറി വിറ്റത്​ യു.പിയിലെ ഐ.എ.എസ് ഉദ്യോഗസ്ഥന്‍ ത​ന്നെ; അതിനുപിന്നിലൊരു കഥയുണ്ട്​

ലഖ്‌നോ: റോഡരികൾ നിരത്തിവെച്ചിരിക്കുന്ന പച്ചക്കറികൾ, തക്കാളിപ്പെട്ടിക്കുമേൽ ഇരുന്ന് അത്​ വിൽക്കുന്നത്​ ഉത്തര്‍പ്രദേശിലെ മുതിർന്ന എ.എ.എസ് ഉദ്യോഗസ്ഥൻ! ഈ ഫോ​ട്ടോ വൈറലാകാൻ അധികം നേരമൊന്നും വേണ്ടിവന്നില്ല. ഉത്തർപ്രദേശ് ഗതാഗത വകുപ്പിൽ സ്‌പെഷൽ സെക്രട്ടറിയായ അഖിലേഷ് മിശ്രയാണ്​ ഫോ​​ട്ടോയിലുണ്ടായിരുന്നത്​. അത്​ വ്യാജ ഫോ​ട്ടോയാണെന്ന്​ പലരും കരുതി. പക്ഷേ, ആ ഫോ​ട്ടോ പങ്കുവെച്ചിരിക്കുന്നത്​ അഖിലേഷ്​ മിശ്രയുടെ സ്വന്തം ഫേസ്​ബുക്ക്​ പേജിലാണ്​.

അഭിനന്ദനങ്ങളും വിമർശനങ്ങളുമായി ഫോ​േട്ടാ സമൂഹ മാധ്യമങ്ങളിൽ അതിവേഗം പ്രചരിച്ചു. സർക്കാറിനെ നാണംകെടുത്താനാണ്​ അദ്ദേഹമിത്​ ചെയ്​തതെന്ന്​ ചിലർ വിമർശിച്ചു. ഉന്നത ഉദ്യോഗസ്​ഥ​െൻറ എളിമയെ അഭിനന്ദിച്ചും നിരവധി പേർ രം​​ഗത്തെത്തി. ഇപ്പോൾ, അഖിലേഷ്​ മിശ്ര തന്നെ സംഭവത്തി​െൻറ സത്യാവസ്​ഥ വെളിപ്പെടുത്തിയിരിക്കുകയാണ്​. ഫേസ്​ബുക്കിലൂടെയാണ്​ അദ്ദേഹം സംഭവത്തി​െൻറ വിശദീകരണം നൽകിയത്​.

'ഔദ്യോഗിക ആവശ്യങ്ങൾക്കായി കഴിഞ്ഞ ദിവസം ഞാൻ പ്രയാഗ് രാജിൽ പോയിരുന്നു. തിരികെവരുമ്പോൾ കുറച്ച് പച്ചക്കറി വാങ്ങാനാണ്​ ഞാൻ വഴിയോരത്തിരുന്ന്​ പച്ചക്കറി വിൽക്കുന്ന സ്​ത്രീയുടെ അടുത്തെത്തിയത്​. ഒരു പ്രായമായ സ്​ത്രീയാണ്​ അവിടെ പച്ചക്കറി വിൽക്കാൻ ഇരുന്നത്​. അവരുടെ കുട്ടി സ്​റ്റാളിൽനിന്ന്​ വളരെ ദൂരെ പോയെന്നും തിരികെ കൊണ്ടുവരുന്നതു വരെ അവിടെ ഇരിക്കാ​േമായെന്നും അവർ എന്നോട്​ ചോദിച്ചു. ആ അഭ്യർഥന സ്വീകരിച്ചാണ്​ ഞാൻ പച്ചക്കറി സ്​റ്റാളിൽ ഇരുന്നത്​. അപ്പോൾ സാധനം വാങ്ങാനായി ആളുകൾ എത്തുകയും ഞാൻ അവരുമായി സംസാരിക്കുകയും ചെയ്​തു. അപ്പോൾ ഒപ്പമുണ്ടായിരുന്ന സുഹൃത്ത്​ ആ ഫോ​ട്ടോ എടുക്കുകയും എ​െൻറ ഫോണിൽ നിന്ന്​ അത്​ എ​െൻറ ഫേസ്​ബുക്ക്​ അക്കൗണ്ടിൽ പോസ്​റ്റ്​ ചെയ്യുകയുമായിരുന്നു. വളരെ വൈകിയാണ്​ ഇതെല്ലാം എ​െൻറ ശ്രദ്ധയിൽപ്പെട്ടത്​. ദയവായി എല്ലാവരും മനസ്സിലാക്കുക' -അഖിലേഷ്​ മി​ശ്ര ഫേസ്​ബുക്കിൽ കുറിച്ചു.

ഉത്തർപ്രദേശിലെ ഏറെ മികച്ച ഉദ്യോഗസ്​ഥരിൽ ഒരാളും ജനപ്രിയനുമാണ്​ അഖിലേഷ്​ മിശ്ര. സാധാരണ ജനങ്ങളുടെ പ്രശ്​നങ്ങളിൽ ഇടപെട്ട്​ പരിഹാരം കാണുന്ന ​ഉ​േദ്യാഗസ്​ഥനെന്ന്​ പേരെടുത്ത ആളാണ്​ അദ്ദേഹം. സാംസ്​കാരിക പ്രവർത്തനങ്ങളിലും സാഹിത്യ ചർച്ചകളിലുമൊക്കെ ഏറെ സജീവമാണ്​ അഖിലേഷ്​ മിശ്ര.