ഉസൈൻ ബോൾട്ടിനെ തോൽപ്പിക്കുമോ ഈ 70കാരൻ​! ഓട്ടംകണ്ട് കണ്ണുതള്ളി സോഷ്യൽമീഡിയ

വാഷിങ്ടൺ: ​വേഗ രാജാവ് എന്നതിന് ഉസൈൻ ബോൾട്ട് എന്ന ഒറ്റ ഉത്തരമായിരിക്കും ആദ്യം നമ്മുടെ മനസ്സിൽ വരിക. ബോൾട്ടും അസഫ പവലുമൊക്കെ വേഗത്തിൽ റെക്കോർഡിട്ടത് പക്ഷേ അവരുടെ 'നല്ല കാലത്താണ്'. എന്നാൽ വേഗത്തിന് പ്രായം ഒരു തടസ്സമാവുകയേ ഇല്ല എന്ന് ​തെളിയിക്കുകയാണ് അമേരിക്കയിലെ ഈ 70കാരൻ.

മൈക്കേൽ കിഷ് ആണ് ഇന്ന് സാമൂഹിക മാധ്യമങ്ങളിലെ താരം. വെറും 14 സെക്കൻഡ് കൊണ്ട് 100 മീറ്റർ ഓടി ഫിനിഷ് ചെയ്ത കിഷിന്റെ വിഡിയോ ഇ​​പ്പോൾ തരംഗമാവുകയാണ്. ശരിക്കും പറഞ്ഞാൽ 14 സെക്കൻഡ് പോലും എടുത്തിട്ടില്ല കിഷ്.

ഫിനിഷിങ് ടൈം 13:47 എന്നാണ് വിഡിയോയിൽ രേഖപ്പെടുത്തിയിരിക്കുന്നത്. '​ഫ്ലോട്രാക്ക്' എന്ന ട്വിറ്റർ പേജിലൂടെയാണ് വിഡിയോ സാമൂഹിക മാധ്യമങ്ങളിൽ പ്രത്യക്ഷപ്പെട്ടത്. പിന്നാലെ വിവിധ പ്ലാറ്റ്ഫോമുകളിൽ വിഡിയോ ​വൈറലാവുകയും ചെയ്തു. ലക്ഷക്കണക്കിനുപേരാണ് വിഡിയോ ഷെയർ ചെയ്ത് കുറഞ്ഞ സമയത്തിനുള്ളിൽ കണ്ടത്.

ചെറുപ്പക്കാർ പോലും 14 സെക്കൻഡിനുള്ളിലെല്ലാം 100 മീറ്റർ ഓടി ഫിനിഷ് ചെയ്യാൻ കഷ്ടപ്പെടുമ്പോഴാണ് മത്സരത്തിൽ കിഷ് പ്രായത്തെ വെല്ലുന്ന പ്രകടനം കാഴ്ചവെച്ചത്. അതേ സമയം ഈ ഓട്ടത്തിൽ കിഷിന് റെ​​ക്കോഡ് ഒന്നും കരസ്ഥമാക്കാൻ കഴിഞ്ഞിട്ടില്ല. 70 വയസ്സുള്ള മറ്റൊരു അമേരിക്കക്കാരൻ ബോബി വിൽഡൻ എന്നയാളുടെ പേരിലാണ് 70ാം വയസ്സിൽ 12.77 സെക്കൻഡിൽ 100 മീറ്റർ ഫിനിഷ് ചെയ്ത റെക്കോഡ്. എന്നിരുന്നാലും കിഷ് ആണ് ഇന്ന് സോഷ്യൽ മീഡിയയിലെ താരം.