വർക്​ഫ്രം ഹോമിലുള്ള ഭർത്താവിനെ വേഗം മടക്കിവിളിക്കണമെന്ന്​ ബോസിനോട്​ ആവശ്യപ്പെട്ട്​ യുവതി; കാരണം വിചിത്രം

കോവിഡ്​ മഹാമാരി വന്നതോടെ സർക്കാർ ഓഫീസുകൾ മുതൽ സ്വകാര്യ കമ്പനികളിൽ വരെ 'വർക്​ ഫ്രം ഹോം' സ​മ്പ്രദായം നിലവിൽ വന്നിരുന്നു. ഇതോടെ കുടുംബാന്തരീക്ഷത്തിൽ പ്രിയപ്പെട്ടവർക്കൊപ്പം ജോലി ചെയ്യാനാകുന്ന സാഹചര്യം നിരവധിയാളുകൾക്ക്​ സന്തോഷം പകർന്നു. വർക്ക്​ ​ഫ്രം ഹോം വിജയകരമാക്കുന്നതിൽ കുടുംബവും വലിയ പങ്കുവഹിക്കുന്നുണ്ട്​.

എന്നാൽ വീട്ടിൽ നിന്നും ജോലിയെടുക്കാൻ തുടങ്ങിയതിൽ പിന്നെ ഒട്ടും പ്രഫഷനൽ അല്ലാതായി മാറുന്ന ചിലരുണ്ടെന്ന സത്യം പുറത്തെത്തിച്ചിരിക്കുകയാണ്​ വീട്ടമ്മ. തങ്ങളുടെ വീട്​ വൃത്തിയായിരിക്കാനായി ഭർത്താവിനെ വീണ്ടും ഓഫീസിലേക്ക്​ വിളിക്കണമെന്ന്​ മുതലാളിയോട്​ ആവശ്യപ്പെട്ടിരിക്കുകയാണ്​​ യുവതി.

ആർ.പി.ജി ഗ്രൂപ്പ്​ ചെയർമാനായ ഹർഷ്​ ഗോയങ്കയാണ്​ യുവതിയുടെ രസകരമായ ആവശ്യം​ സാമൂഹിക മാധ്യമങ്ങളിൽ പങ്കുവെച്ചിരിക്കുന്നത്​. ഭർത്താവ്​ രണ്ട്​ ഡോസ്​ വാക്​സിൻ സ്വീകരിച്ചതാണെന്നും കോവിഡ്​ ചട്ടങ്ങൾ പാലിക്കുമെന്നും അവർ ബോസിന്​ ഉറപ്പുനൽകുന്നു.

'വർക്​ ഫ്രം ഹോംകുറച്ച്​ നാളുകൾ കുടി തുടർന്നാൽ അത്​ ഞങ്ങളുടെ ദാമ്പത്യത്തെ ബാധിക്കും. ദിവസം 10 തവണയാണ്​ അദ്ദേഹം കാപ്പി കുടിക്കുന്നത്​. വിവിധ റൂമുകളിൽ ഇരുന്ന്​ അവിടെയെല്ലാം നാശമാക്കും ഇടക്കിടെ​ ഭക്ഷണം ചോദിച്ച്​ കൊണ്ടിരിക്കും. ജോലിക്കിടെ വരുന്ന കോളുകൾക്കിടെ ഉറക്കം തൂങ്ങുന്നത്​ വരെ ഞാൻ കണ്ടിട്ടുണ്ട്​' -അവർ തുറ​ന്ന്​ എഴുതി. തന്‍റെ വീടിന്‍റെ വൃത്തി വീണ്ടെടുക്കാൻ ഭർത്താവിനെ എത്രയും വേഗം ഓഫീസിലേക്ക്​ മടക്കി വിളിക്കണമെന്ന്​ പറഞ്ഞാണ്​ അവർ അവസാനിപ്പിക്കുന്നത്​.

ഗോയങ്ക പങ്കുവെച്ച ട്വീറ്റ്​ വൈറലായി. പതിനായിരത്തിനടുത്ത്​ ആളുകൾ പോസ്റ്റിന്​ ലൈക്കടിച്ചു. ആയിരത്തിനടുത്താളുകൾ റീട്വീറ്റ്​ ചെയ്​തു.