നാല്​ വർഷം മുമ്പ്​ മരിച്ച ഭർത്താവിന്‍റെ ഓർമ്മക്കായ്​ ക്ഷേത്രം പണിത്​ വീട്ടമ്മ

മരിച്ചുപോയ ഭർത്താവിനുവേണ്ടി ക്ഷേത്രം നിർമ്മിച്ച്​ ഭർത്താവിന്‍റെ പ്രതിഷ്​ഠയെ പൂജിക്കുകയാണ്​ ആന്ധ്രാപ്രദേശിലെ ഈ വീട്ടമ്മ. പ്രകാശം ജില്ലയിലെ പൊഡിലി ടൗണിലെ നിമ്മവാരം ഗ്രാമത്തിൽ 43കാരിയായ പദ്​മാവതിയാണ്​ ഭർത്താവിന്‍റെ ഓർമ്മക്കായി ക്ഷേത്രം പണിതത്​. 2017ലാണ്​ ഇവരുടെ ഭർത്താവ്​ അങ്കി റെഡ്​ഡി റോഡപകടത്തിൽ മരിച്ചത്​.

ഇത്​ പത്​മാവതിയെ ഏറെ തളർത്തിയിരുന്നു. തുടർന്നാണ്​ ഭർത്താവിന്‍റെ ഓർമ്മക്കായി ഇവർ ക്ഷേത്രം പണിയുന്നത്​. ദൈവങ്ങളുടെ വിഗ്രഹങ്ങൾക്കൊപ്പം ഇ്വിടെ അങ്കി റെഡ്​ഡിയുടെ പ്രതിഷ്​ഠയും നടത്തിയിട്ടുണ്ട്​. ഭർത്താവിനുവേണ്ടി എല്ലാ ദിവസവും ഇവർ ഇവിടെ പൂജ നടത്തും. മാർബിൾ കൊണ്ട്​ നിർമ്മിച്ച ഭർത്താവിന്‍റെ പ്രതിഷ്​ഠയിൽ മാല ചാർത്തുകയും അതിന്​ മുന്നിൽ നിന്ന്​ എല്ലാ ദിവസവും പ്രാർഥിക്കുകയും ചെയ്യും.

ഭർത്താവ്​ ഇപ്പോഴും തന്‍റെ കൂടെയുണ്ടെന്ന്​ ഇവർ പറയുന്നു. ഒരിക്കൽ സ്വപ്​നത്തിൽ പ്രത്യക്ഷപ്പെട്ട ഭർത്താവ്​ തനിക്കുവേണ്ടി ക്ഷേത്രം നിർമ്മിക്കുകയും വിഗ്രഹം സ്​ഥാപിക്കുകയും ചെയ്യണമെന്ന്​ ആവശ്യപ്പെടുകയായിരുന്നെന്നന്നാണ്​ പത്​മാവതി പറയുന്നത്​. അതിനുശേഷമാണ്​ ഇവർ ക്ഷേത്രം നിർമ്മിച്ച്​ പൂജയും കർമങ്ങളും ആയി മുന്നോട്ടു പോയിക്കൊണ്ടിരിക്കുന്നത്. ഭർത്താവിന്‍റെ സുഹൃത്തുക്കളായ തിരുപ്പതി റെഡ്​ഡിയുടെയും മകൻ ശിവശങ്കറിന്‍റെയും സഹായത്താലാണ്​ അങ്കി റെഡ്​ഡിയുടെ രൂപത്തിൽ വിഗ്രഹം മാർബിളിൽ കൊത്തി എടുത്തത്​. എല്ലാ ദിവസവും ക്ഷേത്രത്തിൽ ഇവർ അന്നദാനവും നടത്താറുണ്ട്​. പത്​മാവതിയുടെ ക്ഷേത്രത്തിന്‍റെ വാർത്തയും ചിത്രങ്ങളും ഇപ്പോൾ സമൂഹ മാധ്യമങ്ങളിൽ വൈറലാണ്​.