ചരിത്രം കുറിച്ച് സാത്വിക്-ചിരാഗ് സഖ്യം; മലേഷ്യൻ ഓപൺ ഫൈനലിൽ

മലേഷ്യൻ ഓപൺ ബാഡ്മിന്റണിൽ ചരിത്രം കുറിച്ച് ഇന്ത്യയുടെ സാത്വിക് സായ് രാജ്-ചിരാഗ് ഷെട്ടി സൂപ്പർ സഖ്യം. സെമിഫൈനലിൽ നേരിട്ടുള്ള സെറ്റുകൾക്ക് ദക്ഷിണ കൊറിയയിൽനിന്നുള്ള കാങ് മിൻ ഹ്യൂക്-സ്യോ സ്യൂങ് ജേ സഖ്യത്തെയാണ് ലോക രണ്ടാം റാങ്കുകാർ തകർത്തുവിട്ടത്. സ്കോർ: 21-18, 22-20.

നേരത്തെ നാലുതവണ പരസ്പരം ഏ​റ്റുമുട്ടിയപ്പോൾ മൂന്നു തവണയും ജയം ഇന്ത്യൻ സഖ്യത്തിനായിരുന്നു. ജയത്തോടെ ഓപൺ യുഗത്തിൽ മലേഷ്യൻ ഓപൺ ഫൈനലിലെത്തുന്ന ആദ്യ ഇന്ത്യൻ സഖ്യമെന്ന നേട്ടവും സാത്വിക്-ചിരാഗ് ടീം സ്വന്തമാക്കി. ക്വാർട്ടർ ഫൈനലിൽ ലോക 32ാം റാങ്കുകാരായ ചൈനയുടെ ഹെ ജി ടിങ്-റെൻ സിയാങ് ഹു സഖ്യത്തെ 21-11, 21-8 എന്ന സ്കോറിന് തോൽപിച്ചായിരുന്നു സെമിഫൈനലിലേക്ക് മുന്നേറിയത്.

ഫൈനലിൽ ടോപ് സീഡ് ചൈനീസ് സഖ്യം ലിയാങ് വെയ് കെങ്-വാങ് ചാങ് എന്നിവരോ ജപ്പാന്റെ തകുരോ ഹോകി-യുഗൊ കബായാഷി സഖ്യമോ ആയിരിക്കും എതിരാളികൾ. 2023ൽ ആറ് കിരീടങ്ങളുമായി സ്വപ്നക്കുതിപ്പ് നടത്തിയ സാത്വികും ചിരാഗും പുതുവർഷവും കിരീട നേട്ടത്തോടെ തുടങ്ങാമെന്ന ആത്മവിശ്വാസത്തിലാണ്.