സാത്വിക്-ചിരാഗ് സഖ്യം കൊറിയ ഓപൺ ഫൈനലിൽ

സോൾ: ഇന്തോനേഷ്യ ഓപണിലും അതിനുമുമ്പ് സ്വിസ് ഓപണിലും കൈവെച്ച കിരീട നേട്ടങ്ങളുടെ പട്ടികയിൽ ഒന്നുകൂടി ചേർക്കാൻ ഒരു ചുവട് അകലെ സാത്വിക്- ചിരാഗ് സഖ്യം. കൊറിയ ഓപൺ സൂപ്പർ-500 ടൂർണമെന്റ് സെമിയിൽ ലോക രണ്ടാം നമ്പറായ ലിയാങ് വെയ് കെങ്- വാങ് ചാങ് കൂട്ടുകെട്ടിനെയാണ് ഇന്ത്യൻ ജോഡികൾ നേരിട്ടുള്ള സെറ്റുകളിൽ മറികടന്നത്.

സ്കോർ 21-15, 24-22. ഈ വർഷം ആദ്യം സ്വിസ് ഓപൺ സൂപ്പർ-300ലും കഴിഞ്ഞ മാസം ഇന്തോനേഷ്യ ഓപൺ സൂപ്പർ-1000ലും കിരീടമുയർത്തിയ സാത്വിക്-ചിരാഗ് സഖ്യത്തിന് നിലവിലെ ഫോം തുടരാനായാൽ ഫൈനലും ജയിക്കാനാകുമെന്നാണ് പ്രതീക്ഷ. മുമ്പ് രണ്ടുതവണയും മുഖാമുഖം നിന്നപ്പോൾ ചൈനക്കാർ ജയിച്ചതിനാൽ കരുതലോടെയാണ് സാത്വികും ചിരാഗും കളി നയിച്ചത്. ഒപ്പത്തിനൊപ്പം നീങ്ങിയ കടുത്ത പോര് ഒരുഘട്ടത്തിൽ 7-7ൽ നിന്നതിനൊടുവിൽ അതിവേഗ കുതിപ്പുമായി ഇന്ത്യക്കാർ 14-8നും അവസാനം 21-15നും സ്വന്തമാക്കുകയായിരുന്നു.

ആദ്യ സെറ്റ് കൈവിട്ട ക്ഷീണം തീർക്കാൻ അങ്കം കൊഴുപ്പിച്ച ചൈനീസ് ജോഡി കടുത്ത പോരാട്ടം കാഴ്ചവെച്ചതോടെ എന്തും സംഭവിക്കാമെന്നായി. എന്നാൽ, ആദ്യ സെറ്റിലെ ലീഡ് തിരിച്ചുപിടിച്ച ഇന്ത്യൻ സഖ്യം 12-8ന് കളിയിൽ ആധിപത്യം കാട്ടി. അവസാനത്തോടടുത്തപ്പോൾ കൊണ്ടും കൊടുത്തും കളി 18-18ലെത്തി. സെർവ് പിഴച്ചും അശ്രദ്ധ ഷോട്ടുകൾ പായിച്ചും സമ്മർദത്തിനടിപ്പെട്ട് ഇരു ടീമുകളും നീങ്ങിയതിനൊടുവിൽ കളി സാത്വികിനും ചിരാഗിനുമൊപ്പം.

ഫൈനലിൽ പക്ഷേ, ഇതിലേറെ കടുത്ത എതിരാളികളായ ഇന്തോനേഷ്യയുടെ ലോക ഒന്നാം നമ്പർ ജോഡി ഫജർ അൽഫിയൻ-മുഹമ്മദ് റിയാൻ അർഡിയാന്റോ ടീമാണ് എതിരാളികൾ. ഒന്നേകാൽ മണിക്കൂർ നീണ്ട പോരാട്ടത്തിലായിരുന്നു ഇന്തോനേഷ്യൻ സഖ്യം സെമി കടന്നത്. ഫൈനലിലെ എതിരാളികളുമായി മുമ്പ് നാലുതവണ മാറ്റുരച്ചതിൽ രണ്ടുതവണ ഇന്ത്യക്കാർക്കായിരുന്നു ജയം. ഇവരെ തകർത്തുവിട്ടാണ് ഇന്തോനേഷ്യൻ ഓപണിൽ കിരീടം ചൂടിയതും.