തായ്‍ലൻഡ് ഓപൺ ബാഡ്മിന്റൺ: കിരൺ ക്വാർട്ടറിൽ പുറത്ത്

ബാങ്കോക്: തായ്‍ലൻഡ് ഓപൺ ബാഡ്മിന്റൺ ചാമ്പ്യൻഷിപ്പിൽനിന്ന് ഇന്ത്യയുടെ മലയാളിതാരം കിരൺ ജോർജ് പുറത്ത്. ജയന്റ് കില്ലറായി അറിയപ്പെട്ട കിരൺ പുരുഷ സിംഗ്ൾസ് ക്വാർട്ടർ ഫൈനലിൽ ഫ്രാൻസിന്റെ ടോമ ജൂനിയർ പോപോവിനോടാണ് തോറ്റത്. സ്കോർ: 16-21, 17-21. ഏറെ പ്രതീക്ഷയോടെ ഇറങ്ങിയ കിരൺ മുൻ മത്സരങ്ങളിലെ ഫോമിലെത്തിയില്ല. ആദ്യ ഗെയിമിൽ ടോമ തുടർച്ചയായി അഞ്ചു പോയന്റുമായി കുതിപ്പിന് തുടക്കമിടുകയായിരുന്നു. പിന്നീട് മൂന്നു പോയന്റ് നേടി 3-5ലേക്ക് കിരൺ കുതിച്ചു.

ക്രോസ് കോർട്ട് ഷോട്ടിലൂടെ പോയന്റ് നേടിയ കിരൺ 10-10ന് ഒപ്പമെത്തി. ശരീരം ലക്ഷ്യമാക്കിയുള്ള എതിരാളിയുടെ സ്മാഷുകൾക്ക് മറുപടി നൽകാൻ മലയാളി താരത്തിന് കഴിഞ്ഞില്ല. 16-19 വരെ പോയന്റ് എത്തിയെങ്കിലും 21-16ന് ഫ്രഞ്ച് താരം ആദ്യ ഗെയിം കൈയിലാക്കി.

തിരിച്ചുവരവിനായുള്ള ശ്രമമായിരുന്നു രണ്ടാം ഗെയിമിൽ. 8-8ന് എതിരാളിക്കൊപ്പമെത്തിയ കിരൺ ഇടവേളയിൽ 11-8ന് ലീഡ് നേടി. കനമേറിയ ആക്രമണത്തിൽ ഫ്രഞ്ചുകാരൻ പതറി. 16-16ൽ പോയന്റ് തുല്യമായി. ടോമോയുടെ ബോഡി സ്മാഷുകളിൽ വീണ്ടും പതറിയതോടെ 17-21ന് ഗെയിമും മത്സരവും കൈവിട്ടു.

അതേസമയം, പ്രകാശ് പദുകോൺ അക്കാദമിയിൽ കിരണിന്റെ കൂട്ടുകാരനായ ലക്ഷ്യ സെൻ സെമിയിലെത്തി.

മലേഷ്യയുടെ ലിയോങ് ജുൻ ഹാവോയെ 21-19, 21-11 എന്ന സ്കോറിനാണ് ഇന്ത്യൻ താരം ക്വാർട്ടറിൽ തോൽപിച്ചത്. സീസണിൽ ആദ്യമായാണ് ലക്ഷ്യ സെൻ പ്രധാന ടൂർണമെന്റുകളിൽ അവസാന നാലിൽ ഇടംനേടുന്നത്.