ഓൾ ഇംഗ്ലണ്ട് ഓപൺ: പ്രണോയ്, ശ്രീകാന്ത് മടങ്ങി; ഇനി പ്രതീക്ഷ ട്രീസ- ഗായത്രി സഖ്യത്തിൽ

പി.വി സിന്ധു നേരത്തെ പുറത്തായ ഓൾ ഇംഗ്ലണ്ട് ഓപണിൽ പുരുഷ സിംഗിൾസിലും ഇന്ത്യൻ സാന്നിധ്യം അവസാനിച്ചതോടെ ഇനി പ്രതീക്ഷ കൗമാര സഖ്യമായ ട്രീസ ജോളി- ഗായത്രി ഗോപിചന്ദ് കൂട്ടുകെട്ടിൽ. തുടർച്ചയായ സെറ്റുകളിൽ ജപ്പാന്റെ ലോക ആറാം നമ്പർ താരം കോഡയ് നരോകയോടായിരുന്നു ശ്രീകാന്തിന് തോൽവി. പ്രണോയ് മൂന്ന് സെറ്റിൽ ആന്റണി ജിന്റിങ്ങിനു മുന്നിലും വീണു- സ്കോർ 20-22, 21-15, 17- 21.

തുടർച്ചയായ രണ്ടാം ഓൾ ഇംഗ്ലണ്ട് ഓപണിലും സെമിയിലെത്തിയ ട്രീസ- ഗായത്രി സഖ്യം ചൈനീസ് താരങ്ങളാണയ ലി വെൻ മെയ്- ല്യു ഷുവാൻ സഖ്യത്തെ 21-14, 18-21, 21-12നാണ് കടന്നത്. നേരത്തെ മുൻലോക ഒന്നാം നമ്പർ ജോഡി യുകി ഫുകുഷിമ- സയാക ഹിരോത സഖ്യത്തെ വീഴ്ത്തിയ ഇന്ത്യൻ സഖ്യം ഇത്തവണ കിരീടം പിടിക്കാനാകുമെന്ന ആത്മവിശ്വാസവുമായാണ് പ്രകടന മികവ് തുടരുന്നത്.