രണ്ടാം ട്വന്‍റി 20 യിൽ ഇന്ത്യക്ക്​ ഉജജ്വല ജയം

അഹമ്മദാബാദ്​: അരങ്ങേറ്റ താരം ഇഷാൻ കിഷൻന്‍റെ അർധ സെഞ്ച്വറി പ്രകടനത്തിന്‍റെ മികവിൽ രണ്ടാം ട്വന്‍റി 20 മത്സരത്തിൽ ഇംഗ്ലണ്ടിനെതിരെ ഇന്ത്യക്ക്​ ഏഴ്​ വിക്കറ്റിന്‍റെ ഉജ്ജ്വല വിജയം. ഇംഗ്ലണ്ട്​ ഉയർത്തിയ​ 165 റൺസിന്‍റെ വിജയലക്ഷ്യം 13 പന്ത്​ ബാക്കിയിരിക്കെയണ്​ ഇന്ത്യ മറികടന്നത്​. യുവതാരങ്ങളിലേക്ക്​ ആവേശം നിറച്ച്​ അർധ സെഞ്ച്വറി കുറിച്ച ക്യാപ്​റ്റൻ വിരാട്​ കോഹ്​ലി ഇന്ത്യൻ വിജയത്തിന്​ ചുക്കാൻ പിടിച്ചു.

ആദ്യ ഓവറിൽ തന്നെ ഓപ്പണർ ലോകേഷ്​ രാഹുലിനെ പൂജ്യത്തിന്​ നഷ്​ടമായ ഇന്ത്യക്കായി അരങ്ങേറ്റക്കാരൻ ഇഷാൻ അതിശയിപ്പിക്കുന്ന പ്രകടനമാണ്​ കാഴ്ചവെച്ചത്​. കഴിഞ്ഞ ഐ.പി.എല്ലിൽ മുംബൈ ഇന്ത്യൻസിനെ കിരീടത്തിലേക്ക്​ നയിച്ചതിൽ മുഖ്യപങ്ക്​ വഹിച്ച ഇഷാൻ അതേ പ്രകടനം മെ​േട്ടരയിലും തുടരുകയായിരുന്നു. ക്യാപ്​റ്റൻ വിരാട്​ കോഹ്​ലിയെ മറുവശത്ത്​ ബാറ്റിങ്ങ്​ വിരുന്ന്​ ആസ്വദിക്കാൻ നിർത്തി ഇഷാൻ കത്തിക്കയറി. 32 പന്തിൽ നാല്​ സിക്​സറുകളുടെയും അഞ്ച്​ ബൗണ്ടറിയുടെയും അകമ്പടിയിലാണ്​ ഇഷാൻ 56 റൺസെടുത്ത്​ ആദിൽ റഷീദിന്‍റെ പന്തിൽ വിക്കറ്റിനു മുന്നിൽ കുടുങ്ങി പുറത്തായത്​. ഒമ്പത്​ ഓവറിൽ ഇഷാൻ - കോഹ്​ലി സഖ്യം പടുത്തുയർത്തിയത്​ 94 റൺസിന്‍റെ കൂട്ടുകെട്ടായിരുന്നു. 13 പന്തിൽ 26 റൺസെടുത്ത ഋഷഭ്​ പന്തിന്‍റെ മിന്നൽ പ്രകടനവും ഇന്ത്യക്ക്​ തുണയായി.

49 പന്തിൽ പുറത്താകാതെ 73 റൺസെടുത്ത ക്യാപ്​റ്റൻ വിരാട്​ കോഹ്​ലിയുടെ ആങ്കറിങ്​ ഇന്നിങ്​സായിരുന്നു വിജയത്തിന്‍റെ അടിത്തറ. അഞ്ച് ബൗണ്ടറികളും മൂന്ന് സിക്സറും കോഹ്ലിയുടെ ബാറ്റിൽനിന്ന് പറന്നു.

നേരത്തേ ടോസ്​ നേടിയ ഇന്ത്യ വമ്പൻ സ്​കോറിലേക്ക്​ കുതിച്ചുയരുമെന്നു കരുതിയ ഇംഗ്ലണ്ടിനെ ​സ്​ലോഗ്​ ഓവറുകളിൽ പിടിച്ചു നിർത്തുകയായിരുന്നു. ഷാർദൂൽ ഠാക്കൂറും വാഷിങ്​ടൺ സുന്ദറും രണ്ടു വീതം വിക്കറ്റുമായി മികച്ച ബൗളിങ്ങ്​ കാഴ്ചവെച്ചപ്പോൾ ഇംഗ്ലണ്ടിന്‍റെ തുടക്കത്തിലെ കുതിപ്പിന്​ കടിഞ്ഞാണായി. 20 ഓവറിൽ ഇംഗ്ലണ്ടിന്‍റെ ആറ്​ വിക്കറ്റുകൾ പിഴുത ഇന്ത്യ 164 റൺസിൽ ഒതുക്കി.

ആദ്യ മത്സരത്തിലെ പരാജയത്തിൽ നിന്ന്​ ഉയിർത്തെണീറ്റ ഇന്ത്യക്കയി ആദ്യ ഓവറിൽ തന്നെ ഭുവനശ്വർ കുമാർ ആഞ്ഞടിച്ചു. അപകടകാരിയായ ജോസ്​ ബട്​ലറെ റണ്ണെടുക്കാനനുവദിക്കാതെ വിക്കറ്റിനു മുന്നിൽ കുടുക്കിയായിരുന്നു തുടക്കം. ജാസൺ റോയിയും ഡേവിഡ്​ മലനും ചേർന്ന്​ വമ്പൻ അടികളിലൂടെ സ്​കോർ ഉയർത്തുന്നതിനിടയിൽ ഇന്ത്യ വീണ്ടും തിരിച്ചടിച്ചു. 24 റൺസെടുത്ത മലനെ ചഹൽ വിക്കറ്റിനു മുന്നിൽ കുടുക്കി. 35 പന്തിൽ 46 റൺസെടുത്ത ജാസൺ റോയിയെ വാഷിങ്​ടൺ സുന്ദർ ഭുവനേശ്വറിന്‍റെ കൈയിലെത്തിച്ചു. 13ാമത്തെ ഓവറിൽ നൂറു കടന്ന ഇംഗ്ലണ്ടിനെ ശേഷിച്ച ഓവറുകളിൽ ഇന്ത്യൻ ബൗളർമാർ വരച്ച വരയിൽ നിർത്തി.

ഇയോൺ മോർഗനെയും (28), ബെൻ സ്​റ്റോക്​സിനെയും (24) ഷാർദൂലിന്‍റെ ബൗളിങ്​ തന്ത്രം ചതിച്ചു. യുസ്​വേന്ദ്ര ചഹലും ഭുവനേശ്വർ കുമാറും ഓരോ വിക്കറ്റ്​ നേടി.