നമീബിയയെ തരിപ്പണമാക്കി; അസ്​ഗറിന്​ വിജയത്തോടെ യാത്രയയപ്പ്​ നൽകി അഫ്​ഗാൻ

അബൂദബി: നമീബിയ അഫ്​ഗാനിസ്​താന്​ ഒത്ത എതിരാളികളേ ആയിരുന്നില്ല. 62 റൺസിന് നമീബിയയെ​ തകർത്ത്​ അഫ്​ഗാൻ ട്വന്‍റി 20 ലോകകപ്പിൽ തങ്ങളുടെ രണ്ടാം ജയം സ്വന്തമാക്കി. ഈ മത്സരത്തോടെ വിരമിക്കുമെന്ന്​ പ്രഖ്യാപിച്ച ​വെറ്ററൻ താരം അസ്​ഗർ അഫ്​ഗാന്​ വിജയത്തോടെ യാത്രയപ്പ്​ നൽകാൻ ടീമിനായി. അഫ്​ഗാൻ ഉയർത്തിയ 160 റൺസ്​ പിന്തുടർന്നിറങ്ങിയ നമീബിയക്ക്​ നിശ്ചിത ഓവറിൽ 98 റൺസെടുക്കാനേ സാധിച്ചുള്ളൂ. മൂന്ന്​ വിക്കറ്റ്​ വീതം വീഴ്​ത്തിയ നവീനുൽ ഹഖും ഹാമിദ്​ ഹസനുമാണ്​ നമീബിയയെ ചുരുട്ടിക്കൂട്ടിയത്​.

ടോസ്​ നേടി ബാറ്റിങ്​ തെരഞ്ഞെടുത്ത അഫ്​ഗാൻ ഓപ്പണർമാരായ ഹസ്​റത്തുള്ള സസായിയും (27 പന്തിൽ 33) മുഹമ്മദ്​ ഷഹ്​സാദും (33 പന്തിൽ 45) മികച്ച തുടക്കമാണ്​ നൽകിയത്​. അസ്​ഗർ അഫ്​ഗാൻ 23 പന്തിൽ 31ഉം മുഹമ്മദ്​ നബി 17 പന്തിൽ 32 റൺസുമെടുത്തു. മികച്ച പ്രകടനം നടത്തി മടങ്ങിയ അസ്​ഗറിന്​ ടീമംഗങ്ങൾ ആദരവ്​ നൽകി.

മറുപടി ബാറ്റിങ്ങിനിറങ്ങിയ നമീബിയക്ക്​ അഫ്​ഗാൻ ബൗളിങ്ങിന്​ മുന്നിൽ ചെറുത്തുനിൽക്കാൻ പോലുമായില്ല. 30 പന്തിൽ 26 റൺസെടുത്ത ഡേവിഡ്​ വീസാണ്​ നമീബിയയുടെ ടോപ്​ സ്​കോററർ. ആദ്യ മത്സരത്തിൽ ​സ്​കോട്​ലാൻഡിനെ തകർത്ത അഫ്​ഗാൻ രണ്ടാം മത്സരത്തിൽ പാകിസ്​താനോട്​ പരാജയപ്പെട്ടിരുന്നു. രണ്ട്​ മത്സരങ്ങളിലും മികച്ച മാർജിനിൽ വിജയിച്ചത്​ അഫ്​ഗാന്​ റൺറേറ്റിൽ വലിയ ആധിപത്യം നൽകുന്നുണ്ട്​.