'മകൾക്ക്​ പേരിട്ടു'; കോഹ്​ലിയോടൊപ്പമുള്ള ചിത്രം പങ്കുവെച്ച്​ അനുഷ്​ക

ഇന്ത്യൻ ക്രിക്കറ്റ്​ നായകൻ വിരാട്​ കോഹ്​ലിയുടേയും ബോളിവുഡ്​ സൂപ്പർതാരം അനുഷ്​ക ശർമയുടെയും പെൺകുഞ്ഞിന്​ പേരിട്ടു. കോഹ്​ലിക്കും കുഞ്ഞിനുമൊപ്പമുള്ള ചിത്രം പങ്കുവെച്ച്​ 'ഇൻസ്റ്റഗ്രാമിലൂടെ' അനുഷ്​കയാണ്​ പേര്​ പുറത്തുവിട്ടത്​. 'വാമിക' എന്നാണ്​ പേര്​.

''ഞങ്ങൾ ഒരുമിച്ച്​ സ്​നേഹത്തോടെയും സന്തോഷത്തോടെയുമാണ്​ ജീവിച്ചിരുന്നത്​. പക്ഷേ ഈ ഈ കുഞ്ഞ്​ വമിക ഞങ്ങളുടെ ജീവിതത്തെ പുതിയൊരുതലത്തിലേക്ക്​ എത്തിച്ചു. കണ്ണീരും ചിരിയും സങ്കടവും ആനന്ദവുമെല്ലാം ചിലപ്പോൾ മിനുറ്റുകൾക്കുള്ളിൽ തന്നെ ഞങ്ങളനുഭവിച്ചു. ഉറക്കം കുറവാണെങ്കിലും ഞങ്ങളുടെ ഹൃദയം നിറഞ്ഞിരിക്കുന്നു. എല്ലാവരുടെയും ആശംസകൾക്ക്​ നന്ദി'' -അനുഷ്​ക ഇൻസ്റ്റഗ്രാമിൽ കുറിച്ചു.

'എന്‍റെ ലോകം ഒരൊറ്റ ഫ്രെയിമിൽ' എന്നാണ്​ കോഹ്​ലി ചിത്രത്തിന്​ താഴെ കമന്‍റ്​ ചെയ്​തത്​. ചിത്രം ഇൻസ്റ്റഗ്രാമിൽ 55 ലക്ഷത്തിലേറെപ്പേർ ഇതിനോടകം ലൈക്​ ചെയ്​തുകഴിഞ്ഞു. ഏറെനാളത്തെ പ്രണയത്തിനൊടുവിൽ 2017 ഡിസംബറിലാണ്​ ഇരുവരും വിവാഹിതരായത്​. ഭാര്യയുടെ പ്രസവതീയ്യതിയോടനുബന്ധിച്ച്​ ആസ്​ട്രേലിയയിൽ നടന്ന ആദ്യ ടെസ്റ്റിന്​ ശേഷം കോഹ്​ലി നാട്ടിലേക്ക്​ മടങ്ങിയിരുന്നു.