പിറന്നാൾ സമ്മാനം; ഷാർജ സ്​റ്റേഡിയത്തിൽ സച്ചിന്‍റെ പേരിൽ സ്റ്റാൻഡ്​

ഷാർജ: ജീവിതത്തിന്‍റെ അർധസെഞ്ച്വറി പിന്നിട്ട സച്ചിൻ ടെണ്ടുൽക്കറുടെ പേരിൽ ഷാർജ ക്രിക്കറ്റ്​ സ്​റ്റേഡിയത്തിൽ പുതിയ സ്റ്റാൻഡ്​. ഷാർജയിൽ സ്​റ്റേഡിയത്തിൽ നടന്ന ചടങ്ങിൽ ഷാർജ ക്രിക്കറ്റ്​ സി.ഇ.ഒ ഖലഫ്​ ബുഖാതിറാണ്​ സച്ചിൻ ടെണ്ടുൽക്കർ സ്റ്റാൻഡ്​ ഉദ്​ഘാടനം ചെയ്തത്​. 1998ൽ ഷാർജ സ്​റ്റേഡിയത്തിൽ സച്ചിൻ തുടർച്ചയായി രണ്ട്​ സെഞ്ച്വറികൾ നേടിയതിന്‍റെ 25ാം വാർഷികത്തിന്‍റെ ഓർമ പുതുക്കൽ കൂടിയായാണ്​ സ്റ്റാൻഡ്​ സ്ഥാപിച്ചത്​.

ഓസ്​ട്രേലിയക്കെതിരായ മത്സരങ്ങളിൽ 143, 134 റൺസാണ്​ സച്ചിൻ നേടിയത്​. സ്​റ്റേഡിയത്തിലെ വെസ്റ്റ്​ സ്റ്റാൻഡിനാണ്​ സച്ചിന്‍റെ പേര്​ നൽകിയത്​. 34 സ്​റ്റേഡിയങ്ങളിലായാണ്​ സച്ചിൻ 49 സെഞ്ച്വറി നേടിയത്​. ഇതിൽ ഏഴും ഷാർജ സ്​റ്റേഡിയത്തിലായിരുന്നു.ഷാർജയിലെ ചടങ്ങിൽ പ​ങ്കെടുക്കണമെന്ന്​ ആഗ്രഹിച്ചിരുന്നുവെന്നും നിർഭാഗ്യവശാൽ അതിന്​ കഴിഞ്ഞില്ലെന്നും സച്ചിൻവീഡിയോ സന്ദേശത്തിൽ പറഞ്ഞു.

ഷാർജയിൽ കളിക്കുന്നത്​ എപ്പോഴും ഗംഭീരമായ അനുഭവമാണ്​. ലോകമെമ്പാടുമുള്ള ക്രിക്കറ്റ്​ ആരാധകർക്കും ​കളിയെ സ്​നേഹിക്കുന്നവർക്കും ഷാർജ സമ്മാനിക്കുന്നത്​ പ്രത്യേക അനുഭൂതിയാണ്​. ഷാർജ സ്​റ്റേഡിയത്തിലെ ആരവങ്ങൾ നിറഞ്ഞ അന്തരീക്ഷവും പിന്തുണയുമെല്ലാം മറക്കാനാവാത്തതാണെന്നും പിറന്നാൾ ദിനത്തിൽ സ്റ്റാൻഡ്​ സ്ഥാപിച്ച ബുഖാതിറിനും സംഘത്തിനും നന്ദി അറിയിക്കുന്നതായും സച്ചിൻ പറഞ്ഞു.