ഐ.പി.എല്ലിൽ താരങ്ങൾക്ക്​​ കോവിഡ്​; ഇന്നത്തെ കൊൽക്കത്ത- ബാംഗ്ലൂർ കളി മാറ്റി

മുംബൈ: കൊൽക്കത്ത നൈറ്റ്​ ​റൈ​േഡഴ്​സ്​ താരങ്ങളായ സന്ദീപ്​ വാര്യറും വരുൺ ചക്രവർത്തിയും കോവിഡ്​ പോസിറ്റീവായതോടെ ഇന്ത്യൻ പ്രിമിയർ ലീഗിൽ തിങ്കളാഴ്​ചത്തെ കളി നീട്ടി. കൊൽക്കത്തയും ബാംഗ്ലൂരും തമ്മിലെ മത്സരമാണ്​ നീട്ടിവെച്ചത്​. കൊൽക്കത്ത ക്യാമ്പിൽ പലർക്കും രോഗബാധ സംശയിക്കുന്നതായും ചില റിപ്പോർട്ടുകൾ പറയുന്നു. മലയാളി താരമാണ്​ സന്ദീപ്​ വാര്യർ.

ചക്രവർത്തിയുടെ കോവിഡ്​ പരിശോധനാ ഫലം പൊസിറ്റീവ്​ ആണെന്ന്​ ഞായറാഴ്ച വൈകീട്ടാണ്​ വിവരം ലഭിച്ചത്​. പിന്നാലെ, സന്ദീപിന്‍റെ ഫലവും പോസിറ്റീവ്​ ആയി. തുടർന്ന്​ ടീമംഗങ്ങൾ ഐസൊലേഷനിലേക്ക്​ മാറുകയായിരുന്നു. ഇതിനകം പാതി പിന്നിട്ട ഐ.പി.എൽ പുതിയ സീസൺ ബയോ ബബ്​ൾ സുരക്ഷയോടെ അടച്ചിട്ട സ്​റ്റേഡിയങ്ങളിലാണ്​ നടക്കുന്നത്​.

ഇത്ര കനത്ത സുരക്ഷാ വലയങ്ങൾക്കിടയിൽനിന്ന്​ താരങ്ങൾക്ക്​ ​കോവിഡ്​ ബാധിക്കാൻ കാരണം എന്തെന്ന്​ ടീം അധികൃതർ സൂചന നൽകിയിട്ടുണ്ട്​. പരിശീലനത്തിനും കളിക്കുമിടെ പരിക്കേറ്റതിനെ തുടർന്ന്​ സ്​കാനിങ്ങിനും പരിശോധനകൾക്കുമായി ഇരുവരും ആശുപത്രിയിൽ പോയിരുന്നു. അവടെ നിന്നാകാം രോഗം പകർന്നതെന്നാണ്​ നിഗമനം.

അവസാനമായി ഡൽഹി ക്യാപിറ്റൽസിനെതിരെ അഹ്​മദാബാദിലാണ്​ കൊൽക്കത്ത കളിച്ചത്​. കോവിഡ്​ സ്​ഥിരീകരിച്ച സാഹചര്യത്തിൽ കളിക്കാൻ ബാംഗ്ലൂരിന്​ താൽപര്യമില്ലെന്ന്​ കണക്കാക്കിയാണ്​ നീട്ടിവെക്കൽ. നീട്ടിവെച്ച മത്സരത്തിന്‍റെ പുതിയ തീയതി പിന്നീട്​ അറിയിക്കും.