ക്രിക്കറ്റ്​ കളിക്കുന്നതിനിടെ യുവാവിന്​ ദാരുണ​ മരണം; വിഡിയോ പുറത്ത്​ VIDEO

പൂനെ: ക്രിക്കറ്റ്​ കളിക്കുന്നതിനിടെ വീണ്ടുമൊരു ദാരുണ മരണം കൂടി. മഹാരാഷ്​ട്രയിലെ പുനെ ജില്ലയി​ലെ ജുന്നാർ നഗരത്തിലാണ്​ സംഭവം. പ്രാദേശിക ക്രിക്കറ്റ് ലീഗിനിടെയാണ്​ ബാറ്റ്‌സ്മാന് ദാരുണാന്ത്യം സംഭവിച്ചത്​.

കളിയിൽ ബാറ്റുചെയ്യവേ നോൺ സ്‌ട്രൈക്കേഴ്‌സ് എൻഡിൽ വെച്ച് ഹൃദയാഘാതം സംഭവിച്ചാണ് മരണം. ബാബു നലാവ്‌ഡെ എന്നയാളാണ് മരണത്തിന് കീഴടങ്ങിയത്. താരം ക്രീസിലേക്ക്​ വീഴുന്നതും അന്തിമദൃശ്യങ്ങളുമടങ്ങിയ വീഡിയോ സാമൂഹിക മാധ്യമങ്ങളിൽ പ്രചരിക്കുന്നുണ്ട്.

അംപയറോട് സംസാരിക്കുന്നതിനിടെ താരം പിച്ചിൽ ഇരിക്കുകയും​ പതിയെ ഗ്രൗണ്ടിലേക്ക് മറിഞ്ഞുവീഴുകയായിരുന്നു. കളി നിർത്തിയ അംപയറും സഹതാരങ്ങളും ഉടൻ തന്നെ നലാവ്‌ഡെയെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.