പാകിസ്​താനെ പ്രോത്സാഹിപ്പിക്കുന്നവനല്ലേ താങ്കളെന്ന്​ ചോദ്യം; തകർപ്പൻ മറുപടിയുമായി വസിം ജാഫർ

ന്യൂഡൽഹി: പാകിസ്​താൻ പര്യടനം ഒഴിവാക്കിയതിൽ ഇംഗ്ലണ്ട്​ ക്രിക്കറ്റ്​ ബോർഡിനെ വിമർശിച്ച മുൻ ഇന്ത്യൻ താരം വസിം ജാഫറിനെതിരെ സൈബർ ആക്രമണം. വസിം ജാഫറിനെ പാകിസ്​താൻ അനുകൂലിയാക്കി നിരവധി കമന്‍റുകളാണ്​ ട്വിറ്ററിൽ എത്തിയത്​.

വസിം ജാഫർ ട്വീറ്റ്​ ചെയ്​തത്​ ഇങ്ങനെ: ''ഇംഗ്ലണ്ട്​ ക്രിക്കറ്റ്​ ബോർഡിനോട്​ നിരാശ പ്രകടിപ്പിക്കാൻ പാക്​ ക്രിക്കറ്റ്​ ബോർഡിന്​ കാരണങ്ങളുണ്ട്​. പാകിസ്​താനും വെസ്റ്റിൻഡീസും കോവിഡ്​ പടർന്നപ്പോൾ വാക്​സിൻ​ പോലും എത്തുന്നതിന്​ മുമ്പ്​ ഇംഗ്ലണ്ട്​ സന്ദർശിച്ചിരുന്നു. അതുകൊണ്ട്​ തന്നെ ഇംഗ്ലണ്ടിന്​ തിരിച്ച് ഇവരോട്​​ കടപ്പാടുണ്ട്​. ഏറ്റവും കുറഞ്ഞത്​ പരസ്​പരമുള്ള ടൂർ എങ്കിലും റദ്ദാക്കരുതായിരുന്നു. ക്രിക്കറ്റ്​ ഉപേക്ഷിക്കു​േമ്പാൾ ആരും ജയിക്കുന്നില്ല''.

ഇതിന്​ പിന്നാലെയാണ്​ വിദ്വേഷ കമന്‍റുകൾ എത്തിയത്​. ഒരു കമന്‍റ്​ ഇങ്ങനെയായിരുന്നു. '' വസിം ഒക്കെ സ്​പോർട്ടിങ്​ സ്​പിരിറ്റിന്‍റെ പേരിൽ ഇന്ത്യ-പാകിസ്​താൻ മത്സരം നടക്കു​േമ്പാൾ പാകിസ്​താനെ പ്രോത്സാഹിപ്പിക്കുന്നവരാണ്​''. ഇതിന്​ പിന്നാലെ ഇതിന്​ വസിം ജാഫറിന്‍റെ മറുപടിയുമെത്തി.

2007 ഡിസംബർ നാലിന്​ കൊൽക്കത്ത ഈഡൻ ഗാർഡൻസിൽ പാകിസ്​താനെതിരെ നേടിയ ഡബിൾ സെഞ്ച്വറിയു​െട സ്​ക്രീൻഷോട്ട്​ പങ്കുവെച്ചാണ്​ ജാഫർ മറുപടി നൽകിയത്​. അന്ന്​ 274 പന്തിൽ 202 റൺസായിരുന്നു ജാഫർ നേടിയത്​.