ഐ.പി.എൽ: സ്​റ്റേഡിയങ്ങളിൽ കാണികളെ എത്തിക്കാൻ യു.എ.ഇ

ന്യൂഡൽഹി: യു.എ.ഇയിൽ പുനരാരംഭിക്കാൻ പോകുന്ന ഇന്ത്യൻ പ്രീമിയർ ലീഗിലെ ശേഷിക്കുന്ന മത്സരങ്ങൾക്കായി സ്​റ്റേഡിയത്തിലേക്ക്​ കാണികൾ മടങ്ങിയെത്തിയേക്കും. ബി.സി.സി.ഐയും യു.എ.ഇ സർക്കാറുമായി ഇതു സംബന്ധിച്ച്​ ചർച്ചകൾ നടത്തുകയാണെന്ന്​ എമിറേറ്റ്​സ്​ ക്രിക്കറ്റ്​ ബോർഡ്​ ജനറൽ സെക്രട്ടറി മുബഷിർ ഉസ്​മാനി പറഞ്ഞതായി ഗൾഫ്​ ന്യൂസ്​ റിപ്പോർട്ട്​ ചെയ്​തു.

സ്വദേശികളും വിദേശികളുമായ ക്രിക്കറ്റ്​ ആരാധകർക്ക്​ സ്​റ്റേഡിയത്തിലിരുന്ന്​ മത്സരം ആസ്വദിക്കാൻ അവസരമൊരുക്കാൻ ഇ.സി.ബി രാജ്യാന്തര ക്രിക്കറ്റ്​ അസോസിയേഷന്‍റെയും അനുവാദം തേടി. സ്​റ്റേഡിയത്തിൽ 60 ശതമാനം കാണികളെ അനുവദിക്കാൻ യു.എ.ഇ സർക്കാർ അനുമതി നൽകിയതായി റിപ്പോർട്ടുകളുണ്ട്​. എന്നാൽ ബി.സി.സി.ഐ വാർത്തകളോട്​ ഔദ്യോഗികമായി പ്രതികരിച്ചിട്ടില്ല.

സെപ്​റ്റംബർ 19 മുതലാണ്​ ഐ.പി.എൽ 2021 പുനരാരംഭിക്കുന്നത്​. ചെന്നൈ സൂപ്പർ കിങ്​സും മുംബൈ ഇന്ത്യൻസും തമ്മിലാണ്​ ആദ്യ മത്സരം. ക്വാളിഫയറും ഫൈനലുമടക്കം 27 ദിവസങ്ങളിലായി 31 മത്സരങ്ങളാണ്​ കളിക്കുന്നത്​.