മുട്ടുകുത്തിയുള്ള ഐക്യദാർഢ്യത്തിന്​​ വിയോജിച്ചു; ക്വിന്‍റൺ ​ഡികോക്കിനെ മത്സരത്തിന്​ ഇറക്കിയില്ല

ദുബൈ: ദക്ഷിണാഫ്രിക്കൻ ക്രിക്കറ്റിന്​ മുകളിൽ ഇരുണ്ടുകൂടിയ വർണവിവേചനവുമായി ബന്ധപ്പെട്ട വിവാദങ്ങൾ പൊട്ടിത്തെറിയിലേക്ക്​. ചൊവ്വാഴ്ച ട്വന്‍റി 20 ലോകകപ്പിലെ വെസ്​റ്റിൻഡിസിനെതിരായ മത്സരത്തിൽ ടീമിലെ സ്റ്റാർ ബാറ്റ്​സ്​മാനും മുൻ നായകനുമായ ക്വിന്‍റൺ ​ഡികോക്കിനെ ഇറക്കിയില്ല.

ദക്ഷിണാഫ്രിക്കയുടെ എല്ലാ മത്സരങ്ങളിലും ബ്ലാക്​ ലൈവ്​സ്​ മാറ്ററിന്​ ഐക്യദാർഢ്യമാർപ്പിച്ച്​ മുട്ടുകുത്തി നിൽക്കാൻ തീരുമാനിച്ചതിനോട്​ ഡികോക്ക്​ വിയോജിച്ചതിനാലാണ്​ മാറ്റി നിർത്തിയതെന്ന്​ ദക്ഷിണാഫ്രിക്കൻ ക്രിക്കറ്റ്​ ബോർഡ്​ അറിയിച്ചു. ഡികോക്കിന്‍റെ നടപടി പരിശോധിച്ച്​ വരികയാണെന്നും തുടർനടപടികൾ കൈകൊള്ളുമെന്നും ക്രിക്കറ്റ്​ സൗത്ത്​ ആഫ്രിക്ക പ്രതികരിച്ചു. ഡികോക്കിന്​ പകരം റീസ​ ഹെന്‍റിക്​സാണ്​ കളത്തിലിറങ്ങിയത്​.

ഡികോക്ക്​ മത്സരത്തിനിറങ്ങാത്തത്​ സ്വകാര്യ കാരണങ്ങൾ കൊണ്ടാണെന്നാണ്​ വാർത്ത സമ്മേളനത്തിൽ​ നായകൻ ടെമ്പ ബാവുമ പ്രതികരിച്ചത്​.. ''ഞാൻ കേട്ടതിനെക്കുറിച്ച്​ ഭയപ്പെടുന്നു. ഡികോക്കിനെ ഇനി ദക്ഷിണാഫ്രിക്കൻ ജഴ്​സിയിൽ കണ്ടില്ലെങ്കിലും അത്​ഭുതപ്പെടാനില്ല'' -എന്നാണ്​ കമ​േന്‍ററ്റർ ഹർഷ ഭോഗ്​ലെ വിഷയത്തെക്കുറിച്ച്​ ട്വിറ്ററിൽ കുറിച്ചത്​.

മുട്ടുകുത്തിനിന്നുള്ള ഐക്യദാർഢ്യത്തോട്​ വിയോജിച്ചതാണ്​ ഡികോക്ക്​ പുറത്തിരിക്കാൻ കാരണമെന്ന്​ ദക്ഷിണാഫ്രിക്കയിലെ സ്​പോർട്​ സംപ്രേക്ഷകരായ സൂപ്പർസ്​പോർട്​സും ​റിപ്പോർട്ട്​ ചെയ്​തു. മുമ്പ്​ വെസ്റ്റിൻഡീസിനെതിരായ പര്യടനത്തിലും മുട്ടുകുത്തി നിൽക്കുന്നതിന്​ ഡികോക്ക്​ വിയോച്ചിരുന്നു. ഇത്​ തന്‍റെ വ്യക്തിപരമായ തീരുമാനമാണെന്നും ആരെയും ഈ വിഷയത്തിൽ നിർബന്ധിക്കരുതെന്നും ​ഡികോക്ക്​ പറഞ്ഞിരുന്നു.

തകർപ്പൻ ഫോമിലായിരുന്നിട്ടും മുൻ നായകൻ ഫാഫ്​ ഡു​െപ്ലസിസിനെ ടീമിലെടുക്കാത്തതിന്​ പിന്നിലും വംശീയതയുമായി ബന്ധപ്പെട്ടാണെന്ന്​ നേരത്തെ സൂചനകളുണ്ടായിരുന്നു. ​ഐ.പി.എൽ ഫൈനലിൽ മാൻ ഓഫ്​ ദി മാച്ചായ ചെന്നൈയുടെ ഡു​െപ്ലസിസിനെ അഭിനന്ദിക്കാതെ സൈഡ്​ ബെഞ്ചിലിരുന്ന ലുൻഗി എൻഗിഡിയെ സമൂഹമാധ്യമങ്ങളിലൂട ദക്ഷിണാഫ്രിക്കൻ ബോർഡ്​ അഭിനന്ദിച്ചത്​ വിവാദമായിരുന്നു. ദക്ഷിണാഫ്രിക്കയുടെ സൂപ്പർതാരം എ.ബി ഡിവി​ല്ലിയേഴ്​സ്​ അപ്രതീക്ഷിതമായി കളി മതിയാക്കിയതിന്​ പിന്നിലും വംശീയതയുമായ ബന്ധപ്പെട്ട വിവാദങ്ങൾ ഉണ്ടായിരുന്നു.