സൂപ്പർ റബാദ; ത്രില്ലർ പോരിൽ പഞ്ചാബിനെ തകർത്ത്​ ഡൽഹി​

ദുബൈ: സുപ്പർ ഒാവറിലേക്ക്​ നീണ്ട ആവേശത്തിനൊടുവിൽ കിങ്​സ്​ ഇലവൻ പഞ്ചാബിനെതിരെ ഡൽഹി കാപിറ്റലിന്​ ജയം. വിജയസാധ്യത മാറിമറിഞ്ഞ മത്സരത്തിൽ ബാറ്റിലും ബൗളിലും നിറഞ്ഞാടിയ ഡൽഹിയുടെ മാർകസ്​ സ്​റ്റോയിണിസാണ്​ വിജയശിൽപിയായത്​.

ആദ്യം ബാറ്റുചെയ്​ത ഡൽഹി എട്ടു വിക്കറ്റ്​ നഷ്​ടത്തിൽ 157 റ​ൺസെടുത്തു. മുൻ നിര തകർന്നടിഞ്ഞപ്പോൾ 21 പന്തിൽ 53 റൺസടിച്ച സ്​റ്റോയിണിസാണ്​ സ്​കോർ പൊരുതാവുന്ന നിലയിലെത്തിച്ചത്​. പൃഥ്വി ഷാ (5), ശിഖർ ധവാൻ (0), ഷിംറോൺ ഹെറ്റ്​മയർ (7), ശ്രേയസ്​ അയ്യർ (39), ഋഷഭ്​ പന്ത്​ (31), അക്​സർ പ​േട്ടൽ (6) എന്നിങ്ങനെയായിരുന്നു മറ്റുള്ളവരുടെ സ്​കോർ.

മറുപടി ബാറ്റിങ്ങിനിറങ്ങിയ പഞ്ചാബ്​ എളുപ്പം തകർന്നു. അഞ്ചിന്​ 55ലേക്ക്​ പതിച്ച ടീമിനെ ഒാപണർ മായങ്ക്​ അഗർവാളാണ്​ (60 പന്തിൽ 89) വിജയ വക്കിലെത്തിച്ചത്​. അവസാന ഒാവറിൽ 13 റൺസ്​ വേണമെന്നിരിക്കെ സ്​റ്റോയിണിസ്​ എറിഞ്ഞ ഒാവറിൽ മൂന്ന്​ പന്തിൽ മായങ്ക്​ സ്​കോർ ഒപ്പമെത്തിച്ചു. എന്നാൽ, പിന്നീടാണ്​ ട്വിസ്​റ്റ്​. അഞ്ചും ആറും പന്തിൽ മായങ്കും ക്രിസ്​ ജോർഡനും (5) പുറത്ത്​.

കളി സൂപ്പർ ഒാവറിൽ. അവിടെ പഞ്ചാബ്​ ദയനീയമായി പരാജയപ്പെട്ടു. റബാദ എറിഞ്ഞ മൂന്ന്​ പന്തിൽ രാഹുലും നികോളസ്​ പൂരാനും പുറത്തായതോടെ പഞ്ചാബ്​ രണ്ട്​ റൺസിൽ അവസാനിച്ചു. മറുപടി ബാറ്റിങ്ങിനിറങ്ങിയ ഡൽഹിക്ക്​ മൂന്ന്​ പന്തിൽ ലക്ഷ്യം കണ്ടെത്താനായി. അർധസെഞ്ച്വറിയും നിർണായക രണ്ടു വിക്കറ്റും വീഴ്​ത്തിയ സ്​റ്റോയിണിസ്​ തന്നെ വിജയശിൽപി.