അടിക്ക്​ തിരിച്ചടി; ധവാന്‍റെ ശിക്കാറിൽ റൺമല കടന്ന്​ ഡൽഹി

മുംബൈ: വാംഖഡെ സ്​റ്റേഡിയത്തിൽ റൺമഴ പെയ്​ത മത്സരത്തിൽ പഞ്ചാബ്​ കിങ്​സിനെ തകർത്ത്​ ഡൽഹി കാപ്പിറ്റൽസ്​. പഞ്ചാബ്​ കിങ്​സ്​ ഉയർത്തിയ 195 റൺസിന്‍റെ കൂറ്റൻ വിജയലക്ഷ്യം പിന്തുടർന്നിറങ്ങിയ ഡൽഹിക്കായി ശിഖർ ധവാൻ പടനയിക്കുകയായിരുന്നു. 49 പന്തിൽ 92 റൺസെടുത്ത ധവാൻ പഞ്ചാബിന്‍റെ തോൽവി ഉറപ്പാക്കിയാണ്​ മടങ്ങിയത്​. 13 ബൗണ്ടറികളും രണ്ട്​ സിക്​സറുമടക്കമായിരുന്നു ധവാന്‍റെ മാച്ച്​ വിന്നിങ്​ ഇന്നിങ്​സ്​. 17 പന്തിൽ 32 റൺസെടുത്ത ​പൃഥ്വി ഷായും 27 റൺസെടുത്ത മാർകസ്​ സ്​റ്റേയ്​നിസും ഡൽഹിയുടെ ജയത്തിന്​ തങ്ങളുടെ സംഭാവനകൾ അർപ്പിച്ചു.

സീസണിൽ ആദ്യമായി അവസരം ലഭിച്ച സ്റ്റീവൻ സ്​മിത്തിന്​ (9) തിളങ്ങാനായില്ല. 15റൺസായിരുന്നു നായകൻ ഋഷഭ്​ പന്തിന്‍റെ സംഭാവന. അടങ്ങാത്ത വിജയ ദാഹവുമായി ബാറ്റ്​ ചെയ്​ത ഡൽഹി ബാറ്റ്​സ്​മാൻമാർക്ക്​ മുമ്പിൽ പഞ്ചാബ്​ ബൗളർമാർ തല്ലുകൊണ്ട്​ തളർനു. നാലോവറിൽ 53 റൺസ്​ വഴങ്ങിയ മുഹമ്മദ്​ ഷമിയാണ്​ ഏറ്റവുമധികം തല്ലുവാങ്ങിയത്​.

ആദ്യം ബാറ്റുചെയ്​ത പഞ്ചാബ്​ തകർത്തടിച്ചാണ്​ തുടങ്ങിയത്​. താളം വീണ്ടെടുത്ത മായങ്ക്​ അഗർവാളും (36 പന്തിൽ 69) കെ.എൽ രാഹുലും (51പന്തിൽ 61) ചേർന്ന്​ ഒന്നാം വിക്കറ്റിൽ 122റൺസാണ്​ കുറിച്ചത്​. ഒരുഘട്ടത്തിൽ 200ഉം പിന്നിട്ട്​ കുതിക്കുമെന്ന കരുതിയ പഞ്ചാബിന്​ പിന്നീട്​ അതേ വേഗത്തിൽ സ്​കോർ ചലിപ്പിക്കാനായില്ല. മൂന്നുമത്സരങ്ങളിൽ നിന്നുമുള്ള ഡൽഹിയുടെ രണ്ടാം വിജയവും പഞ്ചാബിന്‍റെ രണ്ടാം തോൽവിയുമാണിത്​.