വിദേശ ലീഗുകൾ കളിക്കുന്നതിന് ഇംഗ്ലണ്ട് താരങ്ങൾക്ക് നിയന്ത്രണം; ഐ.പി.എല്ലിന് ‘പ്രത്യേക പരിഗണന’

ഇംഗ്ലണ്ട് ക്രിക്കറ്റ് താരങ്ങൾക്ക് വിദേശ ലീഗുകളിൽ കളിക്കുന്നതിൽ നിന്നും നിയന്ത്രണമേർപ്പെടുത്താൻ ഇംഗ്ലണ്ട് ആൻഡ് വെയിൽസ് ക്രിക്കറ്റ് ബോർഡ്. ഇം​ഗ്ലിഷ് കൗണ്ടി ക്രിക്കറ്റിൽ കൂടുതൽ താരങ്ങളെ പങ്കെടുപ്പിക്കാൻ വേണ്ടിയാണ് ഇത്തരത്തിലൊരു നീക്കമെന്ന് ‘ദ് ടെലി​ഗ്രാഫി’ൽ വന്ന റിപ്പോർട്ടിൽ സൂചിപ്പിക്കുന്നു. താരങ്ങൾ വിദേശ ലീ​ഗുകൾ കളിക്കാൻ പോയതിനാൽ ഇം​ഗ്ലണ്ടിലെ കഴിഞ്ഞ ആഭ്യന്തര സീസണിന്‍റെ തീയതികൾ പലതവണ മാറ്റിയിരുന്നു. അതേസമയം, ഇം​ഗ്ലണ്ട് താരങ്ങൾക്ക് ഇന്ത്യൻ പ്രീമിയർ ലീ​ഗിൽ കളിക്കാൻ തടസമുണ്ടാവില്ല.

ഇംഗ്ലണ്ട് താരങ്ങൾക്ക് ഏർപ്പെടുത്തിയിരിക്കുന്ന ഈ വിലക്ക് ഏറ്റവും കൂടുതലും ബാധിക്കുക പാകിസ്താൻ സൂപ്പർ ലീ​ഗിനെയാണ് . 2024ൽ നടന്ന പാകിസ്താൻ സൂപ്പർ ലീഗ് സീസണിൽ 16 ഇം​ഗ്ലണ്ട് ക്രിക്കറ്റ് താരങ്ങളാണ് വ്യത്യസ്ത ടീമുകളുമായി കരാറിലെത്തിയത്. അലക്സ് ഹെയ്ൽസ്, ജേസൺ റോയ്, ഡേവിഡ് മലൻ, ജെയിംസ് വിൻസ്, ക്രിസ് ജോർദാൻ, ഡേവിഡ് വില്ലി, ലൂക്ക് വുഡ്, ​ഗസ് അറ്റ്കിൻസൺ എന്നിവരാണ് ഇതിൽ പ്രധാനികൾ.

ഇം​ഗ്ലീഷ് കൗണ്ടി ടീമുകളുമായി കരാറിലെത്തുകയും പരിശീലന സൗകര്യങ്ങൾ ഉൾപ്പടെ ഉപയോ​ഗിക്കുകയും ചെയ്തശേഷം ഒരു താരം കളിക്കുന്നതിൽ നിന്ന് ഒഴിവാകുന്നത് ടീമുകളുടെ ഇഷ്ടക്കേടിന് വഴിവെച്ചിരുന്നു. അടുത്ത വർ‌ഷത്തോടെ നിയമം പ്രാബല്യത്തിൽ വരുത്താനാണ് ഇം​ഗ്ലണ്ട് ക്രിക്കറ്റ് ശ്രമിക്കുന്നത്.

ലോകത്ത് നടക്കുന്ന വ്യത്യസ്ത ലീഗുകളിൽ ഒരുപാട് ടീമുകളെ ഐ.പി.എൽ ഉടമകൾ സ്വന്തമാക്കിയിട്ടുണ്ട്. അതിനാൽ ഭാവിയിൽ ഇംഗ്ലണ്ടിലെ 'ദി ഹണ്ട്രഡ്' എന്ന ലീഗിൽ ഐ.പി.എൽ ഫ്രാഞ്ചൈസികൾ പണമെറിയാൻ സാധ്യതയുള്ളതിനാലാണ് ഇംഗ്ലീഷ് താരങ്ങളെ ഐ.പി.എൽ കളിക്കുന്നതിൽ നിന്നും വിലക്കാത്തതെന്ന് റിപ്പോർട്ടുകളുണ്ട്.