രാജ്യത്തിന്‍റെ കളിയുണ്ട്​; മാറ്റിവെക്കുന്ന ഐ.പി.എല്ലിന്​ താരങ്ങളെ നൽകാനാകില്ലെന്ന്​ ഇംഗ്ലണ്ട്​ ക്രിക്കറ്റ്​ ബോൾഡ്​

ലണ്ടൻ: പുനക്രമീകരിക്കുന്ന ഐ.പി.എൽ മത്സരങ്ങൾക്ക്​ താരങ്ങളെ വിട്ടുനൽകാനാവില്ലെന്ന സൂചന നൽകി ഇംഗ്ലണ്ട്​ ക്രിക്കറ്റ്​ ബോർഡ്​. ജൂൺ മുതൽ തിരക്കേറിയ അന്താരാഷ്​ട്ര മത്സരങ്ങൾ നടക്കുന്നതിനാലാണ്​ നടപടിയെന്ന്​ ഇ.സി.ബി ഡയറക്​ടർ ആഷ്​ലി ജൈൽസ്​ പ്രതികരിച്ചു.

ഐ.പി.എൽ ബയോ ബബ്​ൾ തകർത്ത്​ കോവിഡ്​ കടന്നുകയറിയതോടെ ​ടൂർണമെന്‍റ്​ നിർത്തിവെച്ച്​ താരങ്ങളെല്ലാം നാട്ടിലേക്ക്​ മടങ്ങിയിരുന്നു. പാതിവഴിയിലായ ഐ.പി.എൽ സെപ്​റ്റംബർ പകുതിയോ ഒക്​ടോബർ നവംബർ മാസങ്ങളിലോ ആയി നടത്തുമെന്നാണ്​ കരുതപ്പെട്ടിരുന്നത്​.

''ഞങ്ങളുടെ പ്രധാന കളിക്കാരെല്ലാം ആ സമയം തിരക്കിലാകും. സെപ്​റ്റംബർ -ഒക്​ടോബർ മാസങ്ങളിലായി ​പാകിസ്​താനിലും ബംഗ്ലദേശിലും പര്യടനം നടത്തുന്നുണ്ട്​. തുടർന്ന്​ ട്വന്‍റി 20​ ലോകകപ്പിന്​ ഇന്ത്യയിലും നിർണായകമായ ആഷസ്​ സീരീസിനായി ആസ്​ട്രേലിയയിലേക്കും ടീമിന്​ പോകേണ്ടതുണ്ട്​'' -ആഷ്​ലി ജൈൽസ്​ പറഞ്ഞു.

ഐ.പി.എല്ലിലെ ശേഷിക്കുന്ന മത്സരങ്ങൾ ഇംഗ്ലണ്ടിൽ വെച്ചുനടക്കാൻ സാധ്യതയേറുകയും ലണ്ടൻ മേയർ സാദിഖ്​ ഖാൻ അടക്കമുള്ളവർ ടൂർണമെന്‍റിനെ സ്വാഗതം ചെയ്യുകയും ചെയ്​തിരുന്നു. ഇതിനിടയിലാണ്​ ഇ.സി.ബി തങ്ങളുടെ നിലപാട്​ വ്യക്തമാക്കുന്നത്​. ബെൻ സ്​റ്റോക്​സ്​, ജോസ്​ ബട്ലർ,​ ജോണി ബാരിസ്​റ്റോ, ഒയിൻ മോർഗൻ, സാം കറൻ, മുഈൻ അലി അടക്കമുള്ള ഇംഗ്ലണ്ടിൻെറ വൻ താരനിര ഐ.പി.എല്ലിലുണ്ട്​.