ബാറ്റിങ്ങിനിടെ ഗ്രൗണ്ടിലെത്തി രോഹിത്തിന്റെ കാൽതൊട്ട് ആരാധകൻ ‘വിരാട്’; വിഡിയോ വൈറൽ
text_fieldsഹൈദരാബാദ്: ഒന്നാം ടെസ്റ്റിന്റെ ആദ്യ ദിവസം തന്നെ ഇന്ത്യൻ സ്പിൻ കെണിയിൽ വീണ് ഇംഗ്ലണ്ട് ബാറ്റിങ് നിര തകർന്നടിഞ്ഞു.
ഹൈദരാബാദിലെ രാജീവ് ഗാന്ധി അന്താരാഷ്ട്ര സ്റ്റേഡിയത്തിൽ നടക്കുന്ന മത്സരത്തിൽ സന്ദർശകരുടെ ഒന്നാം ഇന്നിങ്സ് 64.4 ഓവറിൽ 246 റൺസിൽ അവസാനിച്ചു. നായകൻ ബെൻ സ്റ്റോക്സ് ആണ് ഇംഗ്ലീഷ് നിരയിലെ ടോപ് സ്കോറർ. 88 പന്തില് മൂന്ന് സിക്സും ആറ് ഫോറുമടക്കം 70 റണ്സെടുത്തു. രവീന്ദ്ര ജദേജയുടെയും ആർ. അശ്വിന്റെയും മൂന്നു വിക്കറ്റ് പ്രകടനമാണ് സന്ദർശകരുടെ ബാറ്റിങ്ങിന്റെ നടുവൊടിച്ചത്. കൂടാതെ, അക്സര് പട്ടേലും ജസ്പ്രീത് ബുംറയും രണ്ടു വിക്കറ്റ് വീതം നേടി.
ആദ്യദിനം സ്റ്റമ്പെടുക്കുമ്പോൾ ഇന്ത്യ ഒരു വിക്കറ്റ് നഷ്ടത്തിൽ 119 റൺസെടുത്തിട്ടുണ്ട്. 70 പന്തിൽ 76 റൺസെടുത്ത യശസ്വി ജയ്സ്വാളും 43 പന്തിൽ 14 റൺസെടുത്ത ശുഭ്മൻ ഗില്ലുമാണ് ക്രീസിൽ. 24 റൺസെടുത്ത രോഹിത് ശർമയുടെ വിക്കറ്റാണ് നഷ്ടമായത്. അതേസമയം, ഇന്ത്യൻ ബാറ്റിങ്ങിനിടെ ഒരു ആരാധകൻ ഗ്രൗണ്ടിലേക്ക് അതിക്രമിച്ചു കടന്ന് രോഹിത്തിന്റെ അടുത്തെത്തി കാലിൽ തൊട്ടതിന്റെ ദൃശ്യങ്ങളാണ് ഇപ്പോൾ സമൂഹമാധ്യമങ്ങളിൽ വൈറൽ.
സൂപ്പർതാരം വിരാട് കോഹ്ലിയുടെ പേരുള്ള 18ാം നമ്പർ വെള്ള ജഴ്സി ധരിച്ചാണ് ആരാധകൻ ഗ്രൗണ്ടിലെത്തിയത്. രോഹിത്തും ജയ്സ്വാളും ബാറ്റിങ്ങിനായി ഗ്രൗണ്ടിലെത്തിയപ്പോഴാണ് സംഭവം. രോഹിത്തിന്റെ കാൽ തൊട്ട് വന്ദിച്ച ആരാധകനെ പിന്നാലെ സുരക്ഷാ ജീവനക്കാരെത്തി ഗ്രൗണ്ടിനു പുറത്തേക്ക് കൊണ്ടുപോയി.
ചിരിച്ചില്ലെങ്കിലും ആരാധകനോട് ശാന്തനായാണ് രോഹിത് പെരുമാറിയത്. ഇതിന്റെ വിഡിയോ സമൂഹമാധ്യമങ്ങളിൽ വ്യാപകമായി പ്രചരിക്കുന്നുണ്ട്.
![Girl in a jacket](https://www.madhyamam.com/h-library/newslettericon.png)
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.