ഗാംഗുലിയുടെ ആരോഗ്യനിലയിൽ പുരോഗതി​; ​"പ്രാർഥിച്ചവർക്ക്​ നന്ദി"

ന്യൂഡൽഹി: മുൻ ഇന്ത്യൻ ക്രിക്കറ്റ്​ നായകനും ബി.സി.സി.ഐ പ്രസിഡന്‍റുമായ സൗരവ്​ ഗാംഗുലിയെ ആശുപത്രിയിൽനിന്ന്​ ഡിസ്​ചാർജ്​ ചെയ്​തു. നെഞ്ചുവേദനയെ തുടർന്ന്​ ശനിയാഴ്ച അദ്ദേഹത്തെ ആശുപത്രിയിൽ പ്രവേശിപ്പിച്ചത്​. പിന്നീട്​ ആൻജിയോപ്ലാസ്റ്റി ശസ്​ത്രക്രിയക്കും വിധേയമാക്കിയിരുന്നു.

"പ്രാർഥിച്ച എല്ലാവർക്കും നന്ദിയറിയിക്കുകയാണ്​. എനിക്ക്​ ഇപ്പോൾ സുഖമാണ്​. വൈകാതെ ദൈനംദിന പ്രവർത്തനങ്ങളിലേക്ക്​ മടങ്ങാൻ കഴിയുമെന്നാണ്​ പ്രതീക്ഷ" -​ഗാംഗുലി പറഞ്ഞു. ബുധനാഴ്ചയാണ്​ ഗാംഗുലിയെ ഡിസ്​ചാർജ്​ ചെയ്യാൻ തീരുമാനിച്ചതെങ്കിലും ഒരു ദിവസം കൂടി ആശുപത്രിയിൽ തുടരുകയായിരുന്നു.

ഗാംഗുലിക്ക്​ ഇപ്പോൾ ഗുരുതരമായ ആരോഗ്യപ്രശ്​നങ്ങളില്ല. അദ്ദേഹ​ം വീട്ടിലേക്ക്​ പോകാൻ പൂർണസജ്ജനാണെന്ന്​ വുഡ്​ലാൻഡ്​ ആശുപത്രി എം.ഡിയും സി.ഇ.ഒയുമായ ഡോ.രുപാലി ബസു പ്രതികരിച്ചു. ഗാംഗുലിയെ എല്ലാ ദിവസവും വീട്ടിൽ നിരീക്ഷിക്കുമെന്നും അദ്ദേഹത്തിന്‍റെ ഡോക്​ടർമാർ അറിയിച്ചു.