അർധ സെഞ്ച്വറിയുമായി ഷമിയുടെ ചെറുത്തുനിൽപ്പ്​; ഇന്ത്യക്ക്​ മികച്ച ലീഡ്​

ഇംഗ്ലണ്ട്​-ഇന്ത്യ രണ്ടാം ടെസ്റ്റ് ലോർഡ്​സിൽ​ ആവേശകരമായ അന്ത്യത്തിലേക്ക്​ കടക്കുകയാണ്​. ആദ്യ ടെസ്റ്റിൽ വിജയം നഷ്​ടപ്പെടുത്തിയ ടീം ഇന്ത്യ രണ്ടാം ടെസ്റ്റിൽ വിജയത്തിൽ കുറഞ്ഞതൊന്നും പ്രതീക്ഷിക്കുന്നില്ല. ഇംഗ്ലണ്ടിനെ 391 റൺസിന്​ ഒതുക്കി രണ്ടാം ഇന്നിങ്​സ്​ ആരംഭിച്ച ഇന്ത്യ​ ഒരു ഘട്ടത്തിൽ 200 റൺസ്​ ലീഡ്​ പോലും നേടില്ലെന്ന്​ കരുതിയിരുന്നു. എന്നാൽ, വാലറ്റക്കാരുടെ കരുത്തിൽ അഞ്ചാം ദിനം 298 റൺസ്​ സ്​കോർ ബോർഡിൽ ചേർത്താണ്​ ഇന്ത്യ ഡിക്ലയർ ചെയ്​തത്​​​.

മത്സരത്തിൽ 271 റൺസ്​ ലീഡാണ്​ നിലവിൽ ഇന്ത്യക്കുള്ളത്​. അജിൻക്യ രഹാനെ (146 പന്തിൽ അഞ്ച് ഫോറുകളടക്കം 61 റൺസ്​) ഒഴികെ മുൻ നിര ബാറ്റ്​സ്​മാൻമാർക്കാർക്കും തിളങ്ങാനാവാത്ത മത്സരത്തിൽ ടെസ്റ്റ്​ കരിയറിലെ രണ്ടാമത്തെ മാത്രം അർധസെഞ്ച്വറി (56) കുറിച്ചുകൊണ്ട്​ വാലറ്റക്കാരൻ മുഹമ്മദ്​ ഷമിയാണ്​ ചെറുത്തുനിൽപ്പ്​ നടത്തിയത്​​. 36 റൺസുമായി ജസ്​പ്രീത ബുമ്രയും ഉറച്ച പിന്തുണ നൽകി​. റിഷഭ്​ പന്ത്​ (46), ഇഷാന്ത്​ ശർമ (24) എന്നിവരെയായിരുന്നു അവസാന ദിനം ഇന്ത്യക്ക്​ നഷ്​ടമായത്​. രോഹിത്​ ശർമ (21), കെ.എൽ രാഹുൽ (3), ചേതേശ്വർ പുജാര (45), വിരാട്​ കോഹ്​ലി (20) രവീന്ദ്ര ​ജഡേജ (3) എന്നിവരെയും നാലാം ദിവസം ഇന്ത്യക്ക്​ നഷ്​ടമായിരുന്നു.

ആതിഥേയർക്ക്​ വേണ്ടി മാർക്​ വുഡ്​ മൂന്ന്​ വിക്കറ്റുകൾ വീഴ്​ത്തി. മെയീൻ അലി, ഒലി റോബിൻസൺ എന്നിവർ രണ്ട്​ വിക്കറ്റ്​ വീതവും വീഴ്​ത്തി. സാം കറന്​ ഒരു വിക്കറ്റുമുണ്ട്​.