എറിഞ്ഞുവീഴ്​ത്തി ഇന്ത്യ; ന്യൂസിലൻഡിന്​ 32 റൺസ് ​ലീഡ്​

സതാംപ്​ടൺ: മഴമാറിനിന്നതോടെ കളമുണർന്ന ​ലോക ടെസ്റ്റ്​ ചാമ്പ്യൻഷിപ്പിൽ ഇന്ത്യക്ക്​ മുന്നിൽ 32 റൺസിന്‍റെ ലീഡുയർത്തി ന്യൂസിലൻഡ്​. അഞ്ചാം ദിനം ഉജ്ജ്വലമായി പന്തെറിഞ്ഞ ഇന്ത്യൻ ബൗളർമാർ ന്യൂസിലൻഡ്​ മധ്യനിരയെയും വാലറ്റത്തെയും നിലയുറപ്പിക്കാൻ അനുദവിക്കാതെ മടക്കിയതോടെ ചെറിയ ലീഡിൽ കിവികൾക്ക്​ തൃപ്​തിപ്പെടേണ്ടി വന്നു. ഇന്ത്യയുടെ 217 റൺസിനെതിരെ 249 റൺസാണ്​ ന്യൂസിലൻഡ്​ കുറിച്ചത്​. ഇന്ത്യക്കായി മുഹമ്മദ്​ ഷമി നാലും ഇശാന്ത്​ ശർമ മൂന്നും ആർ.അശ്വിൻ രണ്ടും വിക്കറ്റുകൾ വീഴ്​ത്തി.

177 പന്തുകൾ നേരിട്ട്​ 49 റ​ൺസെടുത്ത നായകൻ കെയ്​ൻ വില്യംസണാണ്​ കിവികളുടെ ആയുസ്​ നീട്ടിയത്​. രണ്ടു വിക്കറ്റ്​ നഷ്​ടത്തിൽ 101 റൺസെന്ന നിലയിൽ ബാറ്റിങ്​ തുടങ്ങിയ ന്യൂസിലൻഡിന്​ അഞ്ചാംദിനം ആദ്യം നഷ്​ടമായത്​ റോസ്​ ടെയ്​ലറെയാണ്​ (11). ടെയ്​ലറെ ഗില്ലിന്‍റെ കൈകളിലെത്തിച്ച്​ മുഹമ്മദ്​ ഷമിയാണ്​ കിവികൾക്ക്​ ആദ്യ പ്രഹരമേൽപ്പിച്ചത്​. തൊട്ടുപിന്നാലെ ഹെൻട്രി നിക്കോൾസിനെ (7) ഇശാന്ത്​ ശർമയും ബി​.ജെ വാൽട്ടിങിനെ (1) ഷമിയും ​പുറത്താക്കി. 30 റൺസെടുത്ത ടിം സൗത്തിയും 21 റൺസെടുത്ത കൈൽ ജാമിസണുമാണ്​ വാലറ്റത്ത്​ ചെറുത്ത്​ നിൽപ്പ്​ നടത്തിയത്​. ​

ഇന്ന്​ ശേഷിക്കുന്ന ഓവറുകളും റിസർവ്​ ദിനമായ ബുധനാഴ്​ചയുമാണ്​ ഇനി ശേഷിക്കുന്നത്​. അത്​ഭുതങ്ങളൊന്നും സംഭവിച്ചില്ലെങ്കിൽ മത്സരം സമനിലയിലേക്ക്​ നീങ്ങാനാണ്​ സാധ്യത.