ഐ.പി.എല്ലിൽ പുതിയ നിയമം പ്രഖ്യാപിച്ച്​ ബി.സി.സി.ഐ; ബൗളർമാർക്ക്​ തലവേദനയാവും

ഇന്ത്യൻ പ്രീമിയർ ലീഗ്​ 14-ാം എഡിഷ​െൻറ അവേശഷിക്കുന്ന മത്സരങ്ങൾ യു.എ.ഇയിൽ നടക്കാനിരിക്കെ പുതിയ മാർഗനിർദേശങ്ങൾ പുറപ്പെടുവിച്ചിരിക്കുകയാണ്​ ബി.സി.സി.ഐ. അതിൽ താരങ്ങൾക്ക്​ ഗുണകരമാവുന്ന​ നിർണായകമായ പുതിയ നിയമവും പ്രഖ്യാപിച്ചു. രണ്ടാം പാദ മത്സരങ്ങൾ നടക്കു​േമ്പാൾ ഗ്യാലറിയിൽ പന്ത്​ പോയാൽ അത്​ വീണ്ടും ഉപയോഗിക്കില്ലെന്നും മറിച്ച്​, പുതിയ പന്തിലാകും കളി തുടരുകയെന്നുമാണ്​ ബി.സി.സി.ഐ അറിയിച്ചിരിക്കുന്നത്​.

പുതിയ നിയമം അനുസരിച്ച്​, ഗ്യാലറിയിലേക്ക്​ പോയ പന്ത്​ അണുവിമുക്തമാക്കി ബാൾ ലൈബ്രറിയിലേക്കായിരിക്കും മാറ്റുക. അതിന്​ പകരമായി ബാൾ ലൈബ്രറിയിൽ നിന്നുള്ള പുതിയ പന്ത്​ ഉപയോഗിച്ച്​ കളിതുടരുകയും ചെയ്യും. ഇത്തവണ കാണികൾക്ക്​ ​പ്രവേശനം അനുവദിക്കാൻ തീരുമാനിച്ചതിനാൽ, ഗ്യാലറി സ്റ്റാൻഡിലേക്ക്​ പോകുന്ന പന്തുകൾ കാണികൾ തൊടാൻ സാധ്യതയുണ്ട്​. അത്​ രോഗവ്യാപനത്തിനുള്ള സാധ്യത വർധിപ്പിക്കുന്നതിനാലാണ്​ ബാളുകളുടെ കാര്യത്തിൽ കർശനമായ തീരുമാനം അധികൃതരെടുത്തത്​.

കഴിഞ്ഞ ​വർഷം യു.എ.ഇയിൽ നടന്ന ​​െഎ.പി.എല്ലിൽ സ്​റ്റേഡിയത്തിന്​ പുറത്തേക്കോ, സ്റ്റാൻഡിലേക്കോ പോകുന്ന പന്തുകൾ അമ്പയർമാർ സാനിറ്റൈസ്​ ചെയ്​ത്​ വീണ്ടും ഉപയോഗിക്കുന്ന രീതിയായിരുന്നു പിന്തുടർന്നിരുന്നത്​. അതേസമയം, മാറ്റിയെത്തുന്ന പുതിയ പന്തുകൾ ഏളുപ്പം ബാറ്റിലേക്ക്​ വരുമെന്നതിനാൽ പുതിയ നിയമം ബാറ്റ്​സ്​മാൻമാരെ സംബന്ധിച്ചിടത്തോളം ഏറെ ഗുണം ചെയ്​തേക്കും. കൂറ്റനടികൾ ഏറെയുണ്ടാവാൻ സാധ്യതയുള്ള പ്രീമിയർ ലീഗിൽ പുതിയ പന്തുകൾ ഇടക്കിടെ മാറ്റിയെറിയേണ്ടിവരുന്നത്​ ബൗളർമാർക്ക്​ തലവേദനയായേക്കും.