ഐ.പി.എൽ മാറ്റിവെക്കില്ല, താൽപ്പര്യമുള്ള താരങ്ങൾക്ക്​ വിട്ടുപോകാം -ബി.സി.സി.ഐ

മുംബൈ: ഇന്ത്യ വലിയൊരു ദുരന്തമുഖത്താണ്​. കോവിഡിന്‍റെ രണ്ടാം തരംഗം പിടി​ച്ചുകെട്ടാനാവാത്തവിധം ആഞ്ഞടിക്കുകയാണ്​. നിരവധി പേരാണ്​ പ്രാണവായു പോലും കിട്ടാതെ മരിച്ചുവീണത്​. ഇതിനിടയിൽ ​ കോടികൾ ചെലവഴിച്ച്​ നടക്കുന്ന ഐ.പി.എൽ ക്രിക്കറ്റ്​ പൂരത്തിനെതിരെ വ്യാപക വിമർശനമാണ്​ ഉയർന്നിട്ടുള്ളത്​. കോവിഡ്​ ഭീതി കാരണം മൂന്ന്​ ആസ്​ട്രേലിയൻ താരങ്ങളും ഇന്ത്യൻ താരം രവിചന്ദ്രൻ അശ്വിനും ഐ.പി.എല്ലിൽനിന്ന്​ പിന്മാറുകയും ചെയ്​തു.

എന്നാൽ, ഐ.പി.എൽ മാറ്റിവെക്കില്ലെന്നും ഇതുപോലെ മുന്നോട്ടുപോകുമെന്നും ബി.സി.സി.ഐയിലെ മുതിർന്ന ഉദ്യോഗസ്​ഥൻ അറിയിച്ചതായി ദേശീയ മാധ്യമങ്ങൾ റിപ്പോർട്ട്​ ചെയ്​തു. ആരെങ്കിലും ടൂർണമെന്‍റിൽനിന്ന്​ വിട്ടുപോകാൻ ആഗ്രഹിക്കുന്നുണ്ടെങ്കിൽ അത് നല്ലതാണെന്നും അദ്ദേഹം പറഞ്ഞു.

കഴിഞ്ഞദിവസം ബാംഗ്ലൂർ റോയൽ ചലഞ്ചേഴ്​സ്​ ബൗളർമാരായ ആസ്​ട്രേലിയയുടെ ആദം സാംപയു​ം കെയിൻ റിച്ചാർഡ്​സണും​ മടങ്ങിയിരുന്നു​. വ്യക്​തിഗത കാരണങ്ങളാണ്​ ഇരുവരും ബോധിപ്പിച്ചിരിക്കുന്നത്​. കൂടാതെ രാജസ്​ഥാൻ റോയൽസ്​ ​ഫാസ്റ്റ്​ ബൗളർ ആൻഡ്രൂ ടൈയും കഴിഞ്ഞ ദിവസം തിരിച്ചുപോയി.

ആദം സാംപയും റിച്ചാർഡസണും സീസണിലെ ഇനിയുള്ള കളികളിൽ ഉണ്ടാകില്ലെന്ന്​ റോയൽ ചലഞ്ചേഴ്​സ്​ ബാംഗ്ലൂർ വാർത്ത കുറിപ്പിൽ സ്​ഥിരീകരിച്ചിട്ടുണ്ട്​. 1.5 കോടിക്കാണ്​ സാംപയെ വാങ്ങിയിരുന്നത്​. മുൻനിര താരമായ റിച്ചാർഡ്​സണ്​ നാലു കോടിയും നൽകി. ഒരു കോടിക്ക്​ രാജസ്​ഥാൻ സ്വന്തമാക്കിയ ടൈയും ആസ്​ട്രേലിയക്കാരനാണ്​. തന്‍റെ ജന്മനാടായ പെർത്തിൽ ഇന്ത്യയിൽനിന്നെത്തി ക്വാറന്‍റീനിൽ കഴിയുന്നവരുടെ എണ്ണം കൂടുന്നത്​ കണ്ടാണ്​ ടൈ ഞായറാഴ്ച തീരുമാനം പ്രഖ്യാപിച്ചത്​. ഒരു കളിയിൽ പോലും ഇതുവരെ താരത്തിന്​ അവസരം ലഭിച്ചിരുന്നില്ല. കോവിഡ്​ ബാധ തടയാൻ താരങ്ങൾക്ക്​ ഏർപെടുത്തുന്ന ബയോ ബബ്​ൾ വീർപ്പുമുട്ടിക്കുന്നതാണെന്നും​ ടൈ സൂചിപ്പിക്കുന്നു.

17 ആസ്​ട്രേലിയൻ താരങ്ങളാണ്​ ​െഎ.പി.എല്ലിൽ രജിസ്റ്റർ ചെയ്​തിരുന്നത്​. പാറ്റ്​ കമ്മിൻസ്​, ഡേവിഡ്​ വാർണർ, ​െഗ്ലൻ മാക്​സ്​വെൽ തുടങ്ങിയവരും പരിശീലകക്കുപ്പായത്തിൽ റിക്കി പോണ്ടിങ്​, ഡേവിഡ്​ ഹസി തുടങ്ങിയവരുമുണ്ട്​.

കോവിഡിനെതിരെ പോരാടുന്ന കുടുംബത്തിന്​ തുണയാകാനാണ് ഡൽഹികാപ്പിറ്റൽസ്​ താരം രവിചന്ദ്രൻ അശ്വിൻ ഐ.പി.എല്ലിൽ നിന്നും ഇടവേളയെടുത്തത്​.​ ഞായറാഴ്ച സൺറൈസേഴ്​സ്​ ഹൈദരബാദിനെതിരായ മത്സരത്തി​ൽ വിജയിച്ച ശേഷമായിരുന്നു അശ്വിന്‍റെ അഭിപ്രായ പ്രകടനം.

കാര്യങ്ങളെല്ലാം ശരിയായ ദിശയിലായാൽ ടൂർണമെന്‍റിലേക്ക്​ മടങ്ങിവരാം എന്ന്​ ഉറപ്പുനൽകിയാണ്​ അശ്വിൻ മടങ്ങിയത്​. ഇത്തരം ബുദ്ധിമു​േട്ടറിയ സമയത്ത്​ കുടുംബത്തെ പിന്തുണക്കണമെന്ന് കരുതുന്നതായും അശ്വിൻ ട്വീറ്റിൽ പറഞ്ഞു. തന്‍റെ ട്വിറ്റർ പ്രൊഫൈലിന്‍റെ പേര്​ Stay home stay safe! Take your vaccine എന്നാക്കി അശ്വിൻ മാറ്റിയിട്ടുണ്ട്​. അശ്വിന്​ പിന്തുണനൽകുന്നതായും കുടുംബത്തിനായി പ്രാർഥിക്കുന്നതായും ഡൽഹി കാപ്പിറ്റൽസ്​ മറുപടിയായി ട്വീറ്റ്​ ചെയ്​തു.