'രോഹിത്തിന്​ പകരം ഇഷാനെ ഇറക്കാമായിരുന്നില്ലേ​​?'; മാധ്യമപ്രവർത്തകന് ചുട്ടമറുപടി നൽകി​ കോഹ്​ലി

ദുബൈ: ട്വന്‍റി20 ലോകകപ്പിലെ തങ്ങളുടെ ആദ്യ മത്സരത്തിൽ പാകിസ്​താനോട്​ 10 വിക്കറ്റിന്‍റെ തോൽവി വഴങ്ങിയതിന്​ പിന്നാലെ ഇന്ത്യൻ നായക​ൻ വിരാട്​ കോഹ്​ലി മാധ്യമങ്ങളെ കണ്ടിരുന്നു. രോഹിത്​ ശർമക്ക്​ പകരം ഇഷാൻ കിഷനെ ടീമിൽ എടുത്തുകൂടായിരുന്നോ എന്നായിരുന്നു വാർത്താ സമ്മേളനത്തിനിടെ ഒരു മാധ്യമപ്രവർത്തകൻ ചോദിച്ചത്​.

മാധ്യമപ്രവർത്തകന്​ ചുട്ടമറുപടി നൽകി കോഹ്​ലി വീണ്ടും ആരാധകരുടെ മനം കവർന്നു. 'ട്വന്‍റി20 ടീമിൽ നിന്ന്​ നിങ്ങൾ രോഹിത്​ ശർമയെ തഴയുമോ​? അതും കഴിഞ്ഞ മത്സരത്തിലെ അദ്ദേഹത്തിന്‍റെ പ്രകടനം കണ്ടതിന്​ ശേഷവും? വിശ്വസിക്കാനാവുന്നില്ല. നിങ്ങൾക്ക്​ വിവാദമാണ്​ വേണ്ടതെങ്കിൽ ആദ്യമേ പറയുക' -കോഹ്​ലി ചുട്ട മറുപടി നൽകി. നേരിട്ട ആദ്യ പന്തിൽ തന്നെ ഷഹീൻ അഫ്രീദിയുടെ പന്തിൽ വിക്കറ്റിന്​ മുന്നിൽ കുടുങ്ങി പൂജ്യനായാണ്​ രോഹിത്​ മടങ്ങിയത്​.

കഴിഞ്ഞ ദിവസം നടന്ന സന്നാഹ മത്സരത്തിൽ രോഹിത്തിന്‍റെ അർധസെഞ്ച്വറി മികവിലായിരുന്നു ഇന്ത്യ ആസ്​ട്രേലിയയെ മറികടന്നത്​. ​സന്നാഹ മത്സരത്തിൽ കിഷനും ഇന്ത്യക്കായി ബാറ്റിങ്ങിൽ തിളങ്ങിയിരുന്നു.

ചരിത്രം തിരുത്തി പാകിസ്​താൻ

അതേസമയം ലോകവേദിയിൽ ഇന്ത്യക്ക് ​മുന്നിൽ എന്നും അപമാനിതരായി മടങ്ങിയ പാകിസ്​താന്​ ഞായറാഴ്​ച വിജയദിനമാക്കി. ദുബൈ അന്താരാഷ്​ട്ര സ്​റ്റേഡിയത്തിൽ എല്ലാം ശരിയായ ദിനത്തിൽ ഇന്ത്യയെ പത്തു വിക്കറ്റിന്​ തോൽപ്പിച്ചാണ്​​ പാകിസ്​താൻ ചരിത്രം തിരുത്തിയെഴുതിയത്​.

ട്വന്‍റി 20, ഏകദിന ലോകകപ്പ്​ ചരിത്രത്തിൽ ഇതുവരെയും ഇന്ത്യയെ തോൽപ്പിച്ചിട്ടില്ലെന്ന ചീത്തപ്പേര്​ ബാബർ അസമിലൂടെ പാകിസ്​താൻ മാറ്റി. തുടക്കത്തിലെ പതർച്ചക്ക്​ ശേഷം ഇന്ത്യ പടുത്തുയർത്തിയ 151 റൺസ്​ പാകിസ്​താൻ ഒരുവിക്കറ്റ്​ പോലും നഷ്​ടമാക്കാതെ മറികടന്നു. ഓപ്പണർമാരായെത്തിയ മുഹമ്മദ്​ റിസ്​വാൻ 55 പന്തിൽ 79 റൺസോടെയും ബാബർ അസം 52 പന്തിൽ 68 റൺസോടെയും വിജയശ്രീലാളിതരായി മടങ്ങി.

ആറു റൺസിന്​ രണ്ട്​ ഓപ്പണർമാരെയും നഷ്​ടമായ ഇന്ത്യ ഏഴുവിക്കറ്റിന്​ 151 റൺസെന്ന നിലയിലാണ്​ ഇന്നിങ്​സ്​ അവസാനിപ്പിച്ചത്​. ചങ്കുതുളക്കുന്ന സമ്മർദ്ദത്തിലും ഒരറ്റത്ത്​ വിക്കറ്റ്​ കാത്ത നായകൻ വിരാട് കോഹ്​ലിയാണ്​ ഇന്ത്യൻ ഇന്നിങ്​സിന്​ നിറം പകർന്നത്​​. 30 പന്തിൽ 39 റൺസുമായി റിഷഭ്​ പന്തും കനപ്പെട്ട സംഭാവന നൽകി.

ടോസ്​ നഷ്​ടപ്പെട്ട്​ ബാറ്റിങ്ങിനിറങ്ങിയ ഇന്ത്യക്ക്​ ആദ്യ ഓവറുകൾ ദുസ്വപ്​നം പോലെയായിരുന്നു. ആദ്യ ഓവറിൽ നേരിട്ട ആദ്യ പന്തിൽ തന്നെ തന്നെ ഓപണർ രോഹിത്​ ശർമയെ വിക്കറ്റിന്​ മുന്നിൽ കുരക്കി ഷഹീൻ ഷാ അഫ്രീദി കൊടുങ്കാറ്റായി ആഞ്ഞടിക്കുകയായിരുന്നു. പിന്നാലെ ലോകേഷ്​ രാഹുലിനെ (3) ക്ലീൻ ബൗൾഡാക്കി അഫ്രീദി വീണ്ടും ഇന്ത്യ​ക്ക്​ പ്രഹരമേൽപിച്ചു. ടീം സ്​കോർ 31ൽ നിൽക്കേ നന്നായി തുടങ്ങിയ സൂര്യകുമാർ യാദവും (11) പുറത്തായതോടെ സമ്മർദത്തിലായ ഇന്ത്യക്കായി വിരാട്​ കോഹ്​ലിയും (27 പന്തിൽ 28) റിഷഭ്​ പന്തും (28 പന്തിൽ 37 ) ഒത്തുചേരുകയായിരുന്നു.

ഒരറ്റത്ത്​ വിരാട്​ കോഹ്​ലി പക്വതയോടെ ബ​ാറ്റേന്തിയപ്പോൾ റൺനിരക്കുയർത്തി റിഷഭ്​ പന്ത്​ പിന്തുണനൽകി. ഹസൻ അലിയെ തുടർച്ചയായി രണ്ട്​ സിക്​സറുകൾക്ക്​ പറത്തിയ ആക്രമണ മൂഡിലേക്ക്​ മാറിയ റിഷഭ്​ പന്തിനെ ഷദാബ്​ ഖാൻ പുറത്താക്കുയായിരുന്നു. തുടർന്നെത്തിയ രവീന്ദ്ര ജദേജക്ക്​ (13 പന്തിൽ 13) ആഞ്ഞുവീശാനായില്ല. ഇതിനിടയിൽ അർധ സെഞ്ച്വറി പൂർത്തിയാക്കിയ കോഹ്​ലി നായകനൊത്ത ഇന്നിങ്​സ്​ കാഴ്ചവെച്ചു മടങ്ങി.

നാലോവറിൽ 31റൺസിന്​ മൂന്നുവിക്കറ്റ്​ വീഴ്​ത്തിയ അ​ഫ്രീദിയാണ്​ പാക്​ നിരയിൽ മികച്ചുനിന്നത്​. രണ്ട്​ വിക്കറ്റ്​ വീഴ്​ത്തിയെങ്കിലും നാലോവറിൽ 44റൺസ്​ വഴങ്ങിയ ഹസൻ അലി പാക്​ നിരയിൽ നന്നായി തല്ലുവാങ്ങി.