പ്രതിസന്ധികളെ ക്ലീൻ ബൗൾഡാക്കിയ എടവണ്ണ എക്​സ്​പ്രസ്

ദുബൈ: നാലുവർഷം മുമ്പ്​​ ദുബൈയുടെ ചൂടി​േലക്ക് പ്രാരബ്​ധങ്ങളുടെ ഭാണ്ഡക്കെട്ടുമായി​ ജോലി തേടി ഒരു ചെറുപ്പക്കാരൻ എത്തിയിരുന്നു. പേര്​ കെ.എം. ആസിഫ്​. അന്ന്​ വയസ്സ്​​ 23. ഏഴുപേർ തിങ്ങിഞെരുങ്ങിക്കിടന്ന ഇടുങ്ങിയ മുറിയിലേക്കായിരുന്നു എട്ടാമനായി അവ​െൻറ വരവ്​. ദുബൈയിലെ ബിവറേജസ്​ ബോട്ടില്‍ പ്ലാൻറിലെ സ്​റ്റോർ കീപ്പറുടെ ജോലിയായിരുന്നു. ഒരു മാസത്തിനുശേഷം ജോലി മതിയാക്കി നാട്ടിലേക്ക്​ മടങ്ങി. നാലു വർഷങ്ങൾക്കിപ്പുറം വീണ്ടും ദുബൈയിൽ തിരിച്ചെത്തിയതാണ്​ ആസിഫ്​. പഴയ താമസ സ്ഥലത്തിൽനിന്ന്​ ഏറെ അകലെയല്ലാതെ താജ്​ ഹോട്ടലി​െൻറ അത്യാഡംബര മുറിയിലാണ്​ ഇപ്പോൾ താമസം. പഴയ സ്​റ്റോർ കീപ്പറിൽനിന്ന് എതിരാളികളുടെ മുനയൊടിക്കുന്ന വലങ്കൈയൻ പേസ്​ ബൗളറുടെ റോളിലാണ്​ മടങ്ങിവരവ്​. എം.എസ്​. ധോണിയുടെ​ ചെന്നൈ സൂപ്പർ കിങ്​സി​െൻറ മഞ്ഞക്കുപ്പായത്തിൽ കളത്തിലിറങ്ങാനൊരുങ്ങുന്ന ആസിഫി​േൻറത്​ അതിജീവനകാലത്ത്​ കേട്ടിരിക്കേണ്ട കഥയാണ്​. ​പ്രതിസന്ധികളുടെ വന്മലകളെ ക്ലീൻ ബൗൾഡാക്കി​ എടവണ്ണ എക്​സ്​പ്രസ്​ കുതിക്കുകയാണ്​.

അഞ്ചംഗ കുടുംബത്തി​െൻറ ഏക അത്താണി. തലച്ചോറിന്​ ശസ്​ത്രക്രിയ കഴിഞ്ഞ സഹോദരിയും ഭിന്നശേഷിക്കാരനായ സഹോദരനും ദിവസവേതനക്കാരനായ പിതാവും വീട്ടമ്മയായ മാതാവും ഉൾപ്പെടുന്നതാണ്​ ആസിഫി​െൻറ കുടുംബം. നല്ലൊരു മഴ പെയ്​താൽ വീടിനുള്ളിൽ വെള്ളം നിറയും. ക്രിക്കറ്റ്​ എന്ന സ്വപ്​നം മനസ്സിലൊതുക്കി എടവണ്ണയിൽനിന്ന്​ ദുബൈയിലേക്ക്​ ആസിഫ്​ വിമാനം കയറിയത്​ അങ്ങനെയാണ്​. ബോട്ടില്‍ പ്ലാൻറിൽ സ്​റ്റോർ കീപ്പറുടെ ജോലിയി​െട്ടറിഞ്ഞ്​ അവൻ ക്രിക്കറ്റ്​ ഭ്രാന്തുമായി വീണ്ടും നാട്ടിലേക്ക്​ മടങ്ങി. വയനാട്ടിൽ മുൻ ഓസീസ്​ താരം ജെഫ്​ തോംസണി​െൻറ നേതൃത്വത്തിൽ നടന്ന സെലക്​ഷൻ ട്രയൽസിൽ പ​ങ്കെടുത്തെങ്കിലും അന്തിമ പട്ടികയിൽ ഇടംനേടിയില്ല. ഇതോടെ വീണ്ടും ദുബൈയിലേക്ക്​ തന്നെ മടങ്ങി.യു.എ.ഇ ദേശീയ ടീമി​െൻറ സെലക്​ഷൻ ട്രയൽസെന്ന ലക്ഷ്യവും വിജയം കണ്ടില്ല.

കേരളം വഴി ചെന്നൈ

2017-18 സീസണിൽ കേരള ടീമിലേക്കുള്ള വിളിയെത്തിയതാണ്​ ആസിഫി​െൻറ കരിയറിലെ വഴിത്തിരിവായത്​. ഗോവക്കെതിരായ ട്വൻറി20 മത്സരത്തി​ലായിരുന്നു അരങ്ങേറ്റം. മത്സരത്തി​ൽ ആസിഫി​െൻറ പ്രകടനം ഉൾപ്പെടുത്തിയ 45 സെക്കൻഡ്​​ വിഡിയോ വൈറലായിരുന്നു. ഇത്​ കണ്ട കമ​േൻററ്റർ എൽ. ശിവരാമകൃഷ്​ണൻ ആസിഫി​െൻറ പരിശീലകൻ ബിജു ജോണിനെ ബന്ധപ്പെട്ടു. ചെന്നെ ടീമിൽ അവസരം ഒരുക്കാം എന്നായിരുന്നു അറിയിപ്പ്​. അങ്ങനെയാണ്​ ആസിഫ്​ ആദ്യമായി ചെന്നൈ സൂപ്പർ കിങ്​സിൽ എത്തുന്നത്​. ഇതിനുമുമ്പ്​​ സഞ്​ജു സാംസണി​െൻറ സഹാ​യത്തോടെ ഡൽഹി ഡെയർഡെവിൾസി​െൻറ പരിശീലക ക്യാമ്പിൽ എത്തിയിരുന്നു. 2018ൽ 40 ലക്ഷം രൂപക്കാണ്​ ചെന്നൈ സൂപ്പർ കിങ്​സ്​ ആസിഫിനെ സ്വന്തം തട്ടകത്തിൽ എത്തിച്ചത്​. രണ്ടു​ സീസണിൽ ചെന്നൈക്കൊപ്പമുണ്ടായിരുന്നെങ്കിലും രണ്ടു​ മത്സരത്തിൽ മാത്രമാണ്​ ഗ്രൗണ്ടിലിറങ്ങാൻ അവസരം ലഭിച്ചത്​. ദുബൈയിലേക്കുള്ള ആസിഫി​െൻറ മൂന്നാം വരവാണിത്​. ഐ.പി.എല്ലിലെ മൂന്നാം സീസണും. പ്രതിസന്ധികളെ അതിജീവിച്ച ആസിഫ്​ പ്രതീക്ഷയോടെ കാത്തിരിപ്പിലാണ്​.