സീറ്റിൽനിന്നെണീറ്റ്​, ബാൽക്കണിയിലേക്കോടി.. പന്തിന്‍റെ സെഞ്ച്വറിനേട്ടം കോഹ്​ലി ആഘോഷിച്ചതിങ്ങനെ -വിഡിയോ വൈറൽ

അഹ്​മദാബാദ്​: അതിനിർണായക പോരാട്ടത്തിൽ, ബാറ്റിങ്​ ദുഷ്​കരമായ ട്രാക്കിൽ ചാരുതയാർന്നൊരു സെഞ്ച്വറിയിലേക്ക്​ ഋഷഭ്​ പന്ത്​ കത്തിക്കയറു​േമ്പാൾ നായകൻ വിരാട്​ കോഹ്​ലിക്ക്​ തന്‍റെ സീറ്റിൽ ഇരിപ്പുറപ്പിക്കാനായില്ല. അമ്പതു കടക്കുന്നതുതന്നെ ​േക്ലശകരമായ പിച്ചിൽ കണ്ണിനിമ്പമേറിയ ഷോട്ടുകളുടെ കെട്ടഴിച്ച്​ പന്ത്​ ശതകത്തിലേക്ക്​ മുന്നേറു​േമ്പാൾ ഇംഗ്ലണ്ടിന്‍റെ ഒന്നാമിന്നിങ്​സ്​ സ്​കോർ പിന്നിട്ട്​ ഇന്ത്യ ലീഡ്​ പിടിച്ചെടുത്തിരുന്നു. പരമ്പര നേടാൻ ജയം ലക്ഷ്യമിട്ട്​ ക്രീസിലിറങ്ങിയ ആതിഥേയ നിരയിൽ പന്ത്​ പൊരുതി നേടിയ സെഞ്ച്വറി തന്നെയായിരുന്നു ഏറ്റവും ശ്രദ്ധേയം.

സുപ്രധാന മത്സരത്തിൽ മുൻനിര തകർന്നിട്ടും രക്ഷാദൗത്യമേറ്റെടുത്ത്​ ക്രീസ്​ വാണ പന്തിന്‍റെ ശൗര്യവും ധൈര്യവും ക്രിക്കറ്റ്​ പ്രേമികളുടെ പ്രശംസക്ക്​ നടുവിലാണിന്ന്​. കരിയറിന്‍റെ തുടക്കത്തിൽ തുടർപിഴവുകളുടെ പേരിൽ ടീമിലെ സ്​ഥാനം തന്നെ ത്രിശങ്കുവിലായ വിക്കറ്റ്​ കീപ്പർ ബാറ്റ്​സ്​മാന്​ ഏറ്റവും വലിയ പിന്തുണ നൽകിയത്​ കോഹ്​ലി തന്നെയായിരുന്നു. ഒടുവിൽ വമ്പൻ പോരാട്ടങ്ങളിൽ ഋഷഭ്​ നിറഞ്ഞുകളിക്കു​േമ്പാൾ അതേറെ സന്തോഷം നൽകുന്നതും ക്യാപ്​റ്റന്​ തന്നെ. താൻ പൂജ്യത്തിന്​ പുറത്തായ അതേദിവസം, അഹ്​മദാബാദിൽ അതുല്യമായ സെഞ്ച്വറിയിലേക്ക്​ ബാറ്റുവീശിയ പ്രിയസഹതാരത്തിന്‍റെ നേട്ടം അതുകൊണ്ടുതന്നെ കോഹ്​ലിയെ അത്രയേറെ ആവേശഭരിതനാക്കി.

നാലാം ടെസ്റ്റിന്‍റെ രണ്ടാം ദിനം അവസാന സെഷനിൽ ജോ റൂട്ടിന്‍റെ പന്ത്​ സിക്​സറിന്​ പറത്തിയാണ്​ പന്ത്​ സെഞ്ച്വറി തികച്ചത്​. നിലംതൊടാതെ പന്ത്​ അതിർവര കടന്നയുടൻ ഇരിക്കുന്ന സീറ്റിൽനിന്ന്​ കോഹ്​ലി ചാടിയെണീറ്റു. പിന്നെ അളവറ്റ ആവേശത്താൽ ഓടി ഡ്രസ്സിങ്​ റൂമിന്‍റെ ബാൽക്കണിയിലെത്തി. ടെസ്റ്റിൽ മൂന്നാം സെഞ്ച്വറി നേടിയ പന്തിനെ കരഘോഷത്താൽ ക്യാപ്​റ്റൻ അഭിനന്ദിച്ചു. സ്​റ്റേഡിയത്തിലെ ഈ ആവേശനിമിഷങ്ങൾ ഗാലറിയിൽനിന്ന്​ പകർത്തി സാമൂഹിക മാധ്യമങ്ങളിൽ ചിലർ പങ്കുവെച്ചപ്പോൾ വൈറലാകാൻ ഒട്ടും താമസമുണ്ടായില്ല. സഹതാരങ്ങളെ പ്രശംസിക്കുന്നതിൽ പിശുക്കുകാട്ടാത്ത ഇന്ത്യൻ ടീമിന്‍റെ കെട്ടുറപ്പിനെയാണ്​ ഇൗ ദൃശ്യങ്ങൾ സൂചിപ്പിക്കുന്നതെന്ന്​ പലരും കമന്‍റു ചെയ്​തു.