ലേലത്തിന്​ ആരും എടുക്കാത്തതിൽ നാണക്കേടുണ്ട്​, കൂട്ടുകാർക്ക്​ ആശംസ നേരുന്നു -ജേസൺ റോയ്​

ലണ്ടൻ: ഐ.പി.എൽ ലേലത്തിൽ ഉൾപ്പെടാത്തതിന്‍റെ സങ്കടം തുറന്നുപറഞ്ഞ്​ ഇംഗ്ലണ്ട്​ ഓപ്പണർ ജേസൺ റോയ്​. ഈ വർഷത്തെ ഐ.പി.എല്ലിൽ ഉൾപ്പെടാത്തതിൽ നാണക്കേടുണ്ടെന്ന്​ ജേസൺ റോയ്​ പ്രതികരിച്ചു.

''ഈ വർഷത്തെ ഐ.പി.എല്ലിൽ ​എടുക്കാത്തതിൽ വലിയ നാണക്കേടുണ്ട്​. പക്ഷേ തെരഞ്ഞെടുക്കപ്പെട്ട എല്ലാ ഇംഗ്ലണ്ട്​ താരങ്ങളേയും ഞാൻ അഭിനന്ദിക്കുന്നു. സീസൺ കാണാൻ കാത്തിരിക്കുന്നു'' -ജേസൺ റോയ്​ ട്വീറ്റ്​ ചെയ്​തു.

​രണ്ടുകോടി അടിസ്ഥാന വിലയുണ്ടായിരുന്ന ജേസൺ റോയിയെ ലേലത്തിൽ വാങ്ങാൻ ആരുമുണ്ടായിരുന്നില്ല. ഏകദിന ലോകകപ്പിൽ മികച്ച പ്രകടനം കാഴ്ച വെച്ച​ റോയ്​ 38 ട്വന്‍റി 20 കളിൽ നിന്നും 23.42 ശരാശരിയിൽ 890 റൺസ്​ നേടിയിട്ടുണ്ട്​. ഐ.പി.എല്ലിൽ ഡെൽഹി ഡെയർ ഡെവിൾസിനായി എട്ടുമത്സരങ്ങളിൽ കളത്തിലിറങ്ങിയ റോയ്​ 179 റൺസാണ്​ നേടിയത്​. 91ആണ്​ ഉയർന്ന സ്​കോർ. ആസ്​ട്രേലിയൻ ബിഗ്​ബാഷിൽ മികച്ച ഫോമിലുള്ള ഇംഗ്ലണ്ട്​ താരം അലക്​സ്​ ഹെയിൽസിനെയും ലേലത്തിൽ വാങ്ങാൻ ആളുണ്ടായിരുന്നില്ല.