ബൂംറ ട്വന്‍റി20യിലെ മികച്ചവൻ; ശഹീൻ അഫ്രീദിയുമായി താരതമ്യം ചെയ്യുന്നത്​ മണ്ടത്തരമെന്ന്​ മുഹമ്മദ്​ ആമിർ

ദുബൈ: പാകിസ്​താനെതിരായ ​ബ്ലോക്ക്​ബസ്റ്റർ പോരാട്ടത്തിലൂടെയാണ്​ ഇന്ത്യ ട്വന്‍റി20 ലോകകപ്പ്​ പോരാട്ടങ്ങൾക്ക്​ തുടക്കം കുറിക്കുന്നത്​. ഞായറാഴ്ച വൈകീട്ട്​ നടക്കുന്ന മത്സരത്തിന്​ മുന്നോടിയായി ഇന്ത്യൻ പേസർ ജസ്​പ്രീത്​ ബൂംറയെ പുകഴ്​ത്തിയിരിക്കുകയാണ്​ പാകിസ്​താന്‍റെ മുഹമ്മദ്​ ആമിർ.

പരിമിത ഓവർ ക്രിക്കറ്റിൽ നിലവിലെ ഏറ്റവും മികച്ച ബൗളറാണ്​ ബൂംറയെന്ന്​ ആമിർ അഭിപ്രായപ്പെട്ടു. യൂട്യൂബ്​ ചാനലായ 'അൺകട്ടിൽ' പുറത്തുവിട്ട വിഡിയോയിൽ ബൂംറയെയും പാക്​ പേസർ ശഹീൻ അഫ്രീദിയെയും താരതമ്യം ചെയ്യുന്നത്​ മണ്ടത്തരമാണെന്നും താരം കൂട്ടിച്ചേർത്തു.

'നിലവിലെ സാഹചര്യത്തിൽ ശഹീനെ ബൂംറയുമായി താരതമ്യം ചെയ്യുന്നത്​ മണ്ടത്തരമാണ്​. അവൻ ചെറുപ്പമാണ്​. കാര്യങ്ങൾ പഠിച്ചുകൊണ്ടിരിക്കുകയാണ്​. എന്നാൽ ബൂംറ അങ്ങനെയല്ല. സമീപകാലത്തായി ബൂംറ ഇന്ത്യക്കായി മികച്ച പ്രകടനമാണ്​ പുറത്തെടുക്കുന്നത്​. നിലവിൽ ട്വന്‍റി20യിലെ ഏറ്റവും മികച്ച ബൗളറാണ്​ ബൂംറ. പ്രത്യേകിച്ച്​ ഡെത്ത്​ ഓവറുകളിൽ' -ആമിർ പറഞ്ഞു.

'ഇപ്പോൾ പാകിസ്​താന്‍റെ ഏറ്റവും മികച്ച ബൗളറാണ് ശഹീൻ. ഒന്നര വർഷത്തിനിടയിൽ അദ്ദേഹം നടത്തിയ പ്രകടനം മികച്ചതാണ്​. ബുംറ ന്യൂബോളിൽ ഉജ്ജ്വലമായി പന്തെറിയുന്നു. യുവതാരങ്ങളുടെ ഇടയിൽ ന്യൂബോളിൽ അത്​ ശഹീനാണ്'-ആമിർ കൂട്ടി​േച്ചർത്തു​.

ഞായറാഴ്ച ദുബൈ അന്താരാഷ്​ട്ര സ്​റ്റേഡിയത്തിലാണ്​ സൂപ്പർപോരാട്ടം. ഇംഗ്ലണ്ടിനെതിരായ സന്നാഹ മത്സരത്തിൽ നാലോവറിൽ 26 റൺസ്​ മാത്രം വഴങ്ങി ബൂംറ ഒരു വിക്കറ്റ്​ വീഴ്​ത്തിയിരുന്നു. വെസ്റ്റിൻഡീസിനെതിരായ സന്നാഹ മത്സരത്തിൽ പാകിസ്​താൻ ജഴ്​സിയണിഞ്ഞ ശഹീൻ 41 റൺസ്​ വഴങ്ങി രണ്ട്​ വിക്കറ്റ്​ വീഴ്​ത്തി.