'ഈ കളി ജനങ്ങളെ ഒന്നിപ്പിക്കാനുള്ളതാണ്, ഭിന്നിപ്പിക്കാനുള്ളതല്ല'; ഷമിക്ക്​ പിന്തുണയുമായി​ പാക്​ താരം റിസ്​വാൻ

ദുബൈ: പാകിസ്​താനെതിരായ മത്സരത്തിലെ തോൽവിക്ക്​ പിന്നാലെ ഇന്ത്യൻ പേസർ മുഹമ്മദ്​ ഷമിക്ക്​ നേരെയുണ്ടായ വംശീയ ആക്രമണത്തിൽ പ്രതിഷേധവുമായി പാക്​ ഓപ്പണർ മുഹമ്മദ്​ റിസ്​വാൻ. 55 പന്തിൽ 79 റൺസുമായി പുറത്താകാതെ നിന്ന റിസ്​വാൻ ഇന്ത്യക്കെതിരായ വിജയത്തിൽ നിർണായക പങ്കുവഹിച്ചിരുന്നു.

''ഒരു കളിക്കാരനെന്ന നിലയിൽ രാജ്യത്തിനും ജനങ്ങൾക്കും വേണ്ടി സമ്മർദവും പോരാട്ടവും ത്യാഗവും അനുഭവിക്കുന്നത്​ ​ വിവരണാതീതമാണ്​. മുഹമ്മദ്​ ഷമി ഒരു ​ മികച്ച താരവും ലോകത്തിലെ ഏറ്റവും മികച്ച ബൗളർമാരിൽ ഒരാളുമാണ്​. നിങ്ങളുടെ താരങ്ങളെ ബഹുമാനിക്കൂ. ഈ കളി ജനങ്ങളെ ഒന്നിപ്പിക്കാനുള്ളതാണ്​, ഭിന്നിപ്പിക്കാനുള്ളതല്ല'' - റിസ്​വാൻ ട്വീറ്റ്​ ചെയ്​തു.

ഷമിക്ക്​ പിന്തുണയർപ്പിച്ച് മുൻ ഇന്ത്യൻ താരങ്ങളായ സചിൻ ടെണ്ടുൽക്കർ, വി.വി.എസ്​ ലക്ഷ്​മൺ, വീരേ​ന്ദർ സെവാഗ്​, മുഹമ്മദ്​ അസ്​ഹറുദ്ദീൻ, ഹർഭജൻ സിങ്​, വെങ്കിടേഷ്​ പ്രസാദ്​ അടക്കമുള്ളവർ രംഗത്തെത്തിയിരുന്നു. എന്നാൽ ബി.സി.സി.ഐയും ഇന്ത്യൻ ടീമിലെ സഹതാരങ്ങളും ഇതുവരെയും പ്രതികരിച്ചിട്ടില്ല.