പൊള്ളാർഡിന്‍റെ കൈക്കരുത്തിൽ പൊള്ളി ചെന്നൈ; ഐ.പി.'എൽ ക്ലാസികോ' പിടിച്ചെടുത്ത്​ മുംബൈ

ന്യൂഡൽഹി: തലങ്ങും വിലങ്ങും സിക്​സറുകൾ ആകാശം മു​േട്ട പറന്ന മത്സരത്തിൽ അവസാന പന്തിൽ വിജയം നെഞ്ചോടക്കി മുംബൈ ഇന്ത്യൻസ്. ഐ.പി.എല്ലിലെ 'എൽ ക്ലാസികോ'യുടെ സർവ ആവേശവും ദൃശ്യമായ മത്സരത്തിൽ അവസാന പന്തിൽ രണ്ടുറൺസ്​ ഓടിയെടുത്തായിരുന്നു മുംബൈയുടെ ജയം. 218 റൺസിന്‍റെ കൂറ്റൻ വിജയലക്ഷ്യം മുന്നിലുയർത്തി ആത്മവിശ്വാസത്തിന്‍റെ നെറുകയിൽ നിന്ന ചെന്നൈയെ കീറൺ പൊള്ളാർഡ്​ (34 പന്തിൽ 87) വലിച്ച്​ താഴെയിടുകയായിരുന്നു. കൈക്കരുത്തു കൊണ്ട്​ സംഹാര താണ്ഡവമാടിയ പൊള്ളാർഡ്​ ഐ.പി.എൽ ചരിത്രത്തിലെത്തന്നെ വീരോചിത ഇന്നിങ്​സുകളിലൊന്നാണ്​ കാഴ്ചവെച്ചത്​. എട്ടു സിക്​സറുകളും ആറുബൗണ്ടറികളും പൊള്ളാർഡിന്‍റെ കൈക്കരുത്തിൽ പിറന്നു. ​ലുൻഗി എൻഗിഡി നാലോവറിൽ 62 റൺസും ഷർദുൽ താക്കൂർ 56 റൺസും വഴങ്ങിയപ്പോൾ 34 റൺസിന്​ 3 വിക്കറ്റെടുത്ത സാം കറനാണ്​ ​ചെന്നൈക്കായി ഭേദപ്പെട്ട നിലയിൽ പന്തെറിഞ്ഞത്​.

ക്വിന്‍റൺ ഡികോക്കും (38) രോഹിത്​ ശർമയും (35) നന്നായി തുടങ്ങിയ ഇന്നിങ്​സിൽ സൂര്യകുമാർ യാദവ്​ (3) പെ​ട്ടെന്ന്​ മടങ്ങിയതോ​െട ചെന്നെ വിജയം മണത്തു. അവിടന്നങ്ങോട്ടായിരുന്നു പൊള്ളാർഡ്​ പെയ്​തിറങ്ങിയത്​.ക്രുണാൽ പാണ്ഡ്യ (32), ഹാർദിക്​ പാണ്ഡ്യ (16) എന്നിവർ പൊള്ളാർഡിന്​ ഒത്ത കൂട്ടായി.

ടോസ്​ നഷ്​ടപ്പെട്ട്​ ബാറ്റിങ്ങിനിറങ്ങിയ ചെന്നൈക്ക് മിന്നും ഫോമിലുളള ഫാഫ്​ ഡു​െപ്ലസി (28 പന്തിൽ 50), മുഈൻ അലി (36 പന്തിൽ 58) എന്നിവർക്കൊപ്പം അവസാന ഓവറുകളിൽ ആടിത്തിമിർത്ത അമ്പാട്ടി റായുഡുവും (27 പന്തിൽ 72) ചേർന്നതോടെ മുംബൈ തല്ലു കൊണ്ട്​ തളർന്നിരുന്നു. മുംബൈയുടെ പ്രീമിയം ഫാസ്റ്റ്​ ബൗളർ സാക്ഷാൽ ജസ്​പ്രീത്​ ബുംറ നാലോവറിൽ വഴങ്ങിയത്​ 56 റൺസാണ്​.

ആദ്യം ഓവറിൽ തന്നെ നാലു റൺസെടുത്ത റിഥുരാജ്​ ഗ്വെയ്​ക്​വാദിനെ ചെന്നൈക്ക്​ നഷ്​ടമായി. എന്നാൽ തൊട്ടുപിന്നാലെയത്തിയ മുഇൗൻ അലിയും ഡു​െപ്ലസിയും ചേർന്ന്​ അടിച്ചുതുടങ്ങിയതോടെ മുംബൈ ബൗളർമാർ വെള്ളം കുടിച്ചു. 108 റൺസിന്‍റെ കൂട്ടുകെട്ടിനൊടുവിലാണ്​ബുംറയുടെ പന്തിൽ പുറത്തായി അലി മടങ്ങിയത്​. തൊട്ടുപിന്നാലെ ഡു​െപ്ലസിയും സുരേഷ്​ റെയ്​നയും (2) അടുത്തടുത്ത പന്തുകളിൽ പുറത്തായതോടെ മുംബൈ മത്സരത്തിലേക്ക്​ മടങ്ങി വരുന്നുവെന്ന്​ തോന്നിച്ചു.

എന്നാൽ തുടർന്നങ്ങോട്ട്​ അമ്പാട്ടി റായുഡുവിന്‍റെ മാരക പ്രഹരമായിരുന്നു. ഏഴ്​ സിക്​സറുകളും നാലു ബൗണ്ടറികളുമാണ്​ റായുഡുവിന്‍റെ ബാറ്റിൽ നിന്നും പറന്നത്​. റായുഡു അടിച്ചുതുടങ്ങിയപ്പോൾ ഒരറ്റത്ത്​ കാഴ്ചക്കാരനായി നിൽക്കേണ്ട ചുമതലയേ ജദേജക്കുണ്ടായിരുന്നുള്ളൂ (22 പന്തിൽ 22). രണ്ടോവറിൽ 12 റൺസ്​ വഴങ്ങി രണ്ട്​ വിക്കറ്റെടുത്ത കീറൺ പൊള്ളാർഡാണ്​ മുംബൈ നിരയിൽ ഭേദപ്പെട്ട നിലയിൽ പന്തെറിഞ്ഞത്​.